1-3. Anton kabusol so manguusil ed sikatayon amin, tan akin ya makaligliwa ed sikatayo so panaral ed ibabaga na Biblia?

IMADYIN mo pan uusilan kay sakey a masibesibeg ya kalaban. Sikatoy mabisbiskeg tan mapmaples. Antam ya anggapoy panangasi to ta anengneng mo lan pinatey toy arum ya kaarom. Anggan panon lay ibatik mo, asingsingger to ka lan naabotan. Singa anggapo lay nagawaan mo. Balet, biglan walay sinmabin mangisalba ed sika. Sikatoy mas mabiskeg nen say kalaban mo, tan impromisa ton tulongan to ka. Seguradon akainawa tan misalsalamat ka!

² Amin tayo et singa met uusilan na ontan ya kalaban. Singa naaralan tayo lad Kapitulo 6, say patey et tinawag na Biblia ya sakey a kabusol. Agtayo itan nibatikan o nalabanan. Anengneng la na maslak ed sikatayo ya satan a kabusol et inala toy bilay na saray inad-aro tayo. Balet si Jehova et mas makapanyari nen say patey. Sikatoy maaron Manangisalba tan impanengneng to lan sarasarag ton taloen itan ya kalaban. Tan impromisa ton deralen to itan a kabusol, say patey. Ibabangat na Biblia: “Say unor a kabusol, say patey, et paandien.” (1 Corinto 15:26) Maong a balita itan!

³ Imanoen tayo pan magano no antoy epekto ed sikatayo  no walay ompatey ya inad-aro tayo. Ontulong itan ed sikatayo pian lalon misalsalamat itayod impromisa nen Jehova ya bilayen to lamet iray inaatey. (Isaias 26:19) Atan may ilalon kikioli.

4. (a) Nen inatey so kaaro nen Jesus, antoy ipapanengneng na alikna to nipaakar ed liknaan nen Jehova? (b) Siopa ray kaaro nen Jesus?

⁴ Asalim lay inateyan? Agta singa agmo nasarag so graben ermen tan say pakaliknam et anggapo lay nagawaan mo? Kanian kakkaukolan tayoy naligliwa na Salitay Dios. (Basaen so 2 Corinto 1:3, 4.) Makatulong so Biblia pian natalosan tayoy nalilikna nen Jehova tan nen Jesus nipaakar ed patey. Perpekton inalig nen Jesus so personalidad nen Ama to, ansakisakit ed sikato so impatey na sakey ya inad-aro to. (Juan 14:9) Nen walad Jerusalem si Jesus, naynay ton papasyaren so sanaagin Lazaro, Maria, tan Marta, ya manaayam ed baley na Betania. Nagmaliw iran sankakaaro. Ibabaga na Biblia: “Inar-aro nen Jesus ira di Marta tan say yugtan ton bii tan si Lazaro.” (Juan 11:5) Balet, singa naaral tayo lad Kapitulo 6, inatey si Lazaro.

5, 6. (a) Antoy ginawa nen Jesus nen kaiba to ray maneermen a kapamilya tan kakaaro nen Lazaro? (b) Akin et makapabiskeg na liknaan so impanermen nen Jesus?

⁵ Antoy alikna nen Jesus nen inatey so kaaro to? Ibabagad sikatayo na Biblia ya nanermen si Jesus kaiba ray kakanayon tan kakaaro nen Lazaro. Nen anengneng to ra, akasian to ra. “Naney-ey si Jesus ed puso to tan agonigon.” Insan, imbaga na Biblia ya “akaakis si Jesus.” (Juan 11:33, 35) Kasin nanermen si Jesus lapud anggapo lay ilalo nen Lazaro? Andi! Diad tua, amta nen Jesus ya walay makapakelkelaw a nagawa. (Juan 11:3, 4) Balet, alikna to nin siansia so sakit tan ermen lapud inatey so inad-aro to.

⁶ Say impanermen nen Jesus et makapabiskeg na liknaan. Ibabangat na satan ya say patey et kabusol nen Jesus tan  na Ama to, si Jehova. Balet sarasarag nen Jehova a Dios ya labanan tan taloen itan ya kalaban! Amtaen tayo no panon itan ya ginawa na Dios panamegley nen Jesus.

7, 8. Akin ya parad saramay totoon wadman et singa anggapo lay ilalo nen Lazaro, balet antoy ginawa nen Jesus?

⁷ Imponpon si Lazaro ed sakey ya ungib, tan impaekal nen Jesus so baton akasara ed satan. Balet ag-inmabuloy si Marta ta apat-agew lay linmabas, tan seguradon nabubulok lay bangkay nen Lazaro. (Juan 11:39) No diad pakanengneng na too, singa anggapo lay ilalo.

⁸ Impaekal nen Jesus so bato, tan inyeyag to: “Lazaro, paway ka!” Antoy agawa? “Pinmaway imay toon inatey.” (Juan 11:43, 44) Isip mo pa labat so liket na saramay totoon wadman. Balanglan si Lazaro et agi, kanayon, kaaro, odino kaabay da, amta ra a sikatoy inatey la. Balet pinmaway so inad-aro dan too, tan akaalagey lamet ed arapan da. Singa imposible iman. Seguradon dakel so maliket ya linmalakap ed si Lazaro. Talagan atalo so patey!

9, 10. (a) Panon ya impaamta nen Jesus so Lapuan na pakayari ton mamaoli ed si Lazaro? (b) Anto ray pigaran nagunggona no basaen ed Biblia so nipaakar ed inkioli?

⁹ Ag-imbaga nen Jesus ya sikaton mismo so nanggawad satan ya makapakelaw a milagro. Diad pikakasi to sakbay ton pinapaway si Lazaro, impalinew to ya si Jehova so amaoli ed si Lazaro. (Basaen so Juan 11:41, 42.) Aglabat aminpisan ya inusar nen Jehova so pakayari ton mamaolid bilay. Say inkioli nen Lazaro et sakey ed saray siameran milagron impamaolid bilay ya nisulat ed Salitay Dios. * Balibalin basaen tan aralen iratan. Naaralan tayod saratan ya say Dios et anggapoy pipilien to, ta kaibad saray pinaoli to  et kalangweran tan matatken, lalaki tan bibii, Israelita tan aliwan Israelita. Talagan makapalikliket ya basaen iratan! Singa bilang, nen pinaoli nen Jesus so sakey a manmarmarikit, saray atateng to et “agda apokpokay liknaan da lapud agaylay liket da.” (Marcos 5:42) On, agdan balot nalingwanan so makapalikliket ya ginawa nen Jehova!

¹⁰ Siempre, saramay pinaoli panamegley nen Jesus et inatey lanlamang. Labay to kasin ibaga, anggapoy kana na impamaoli ed sikara? Andi! Saratan ya agawa nensaman ya nabasad Biblia et prueba ya tua so kioli ed bilay tan mangiiter iratan na ilalo ed sikatayo.

11. Panon ya makatulong so inkioli nen Lazaro pian napruebaan ya tua so walad Eclesiastes 9:5?

¹¹ Ibabangat na Biblia ya saray inaatey et “anggapon balot so amta ra.” (Eclesiastes 9:5) Aliwa la ran mabilay tan anggapoy pakalikna ra, agmet ira manbibilay diad arum a pasen. Say inkioli nen Lazaro so prueba ed satan. Nen sikatoy binilay, wala kasi inistorya to nipaakar ed tawen odino nipaakar ed makapataktakot tan mandarlang ya impierno? Anggapo. Anggapoy ontan ya nabasad Biblia ya imbaga nen Lazaro. Legay apat-agew ya inatey si Lazaro, ‘anggapon balot so amta to.’ (Eclesiastes 9:5) Sikatoy naugip labat ed patey.​—Juan 11:11.

12. Akin ya segurado tayon agawa so inkioli nen Lazaro?

¹² Naaralan tayo met ed samay agawad si Lazaro ya tudtua so kioli, aliwan is-istorya labat. Sanen pinaoli nen Jesus si Lazaro, dakdakel so akanengneng. Anggan saray lider na relihyon ya kabkabusol day Jesus et amta ran agawa iyan milagro. Kanian inkuan da: “Antoy gawaen tayo, ta amayamay a tanda so gagawaen na sayan too?” (Juan 11:47) Dakel so linma pian nengnengen so apaolin si Lazaro. Lapud satan et dakel ed sikara so anisia ed si Jesus. Anengneng dan  si Lazaro so mabilay ya ebidensya ya si Jesus et imbaki na Dios. Mabiskeg iyan ebidensya kanian implano na saray onkokontran Judion lider na relihyon ya pateyen si Jesus tan si Lazaro.​—Juan 11:53; 12:9-11.

13. Akin et manisia tayo ya talagan sarasarag nen Jehova ya paolien iray inaatey?

¹³ Duga kasin panisiaan so kioli? On, lapud imbangat nen Jesus ya onsabi so agew ya “amin a walad pakanodnonotan iran lubok” et napaoli. (Juan 5:28) Si Jehova so Amalsa ed amin a mabilay. Mairap kasin panisiaan ya sarag to ran palsaen lamet? Siempre akadepende itan ed memorya nen Jehova. Nanonotan to kasi iray inaatey ya inad-aro tayo? Say uniberso et napno na bitewen, balet amta toy ngaran na kada sakey ed saratan! (Isaias 40:26) Sarasarag sirin nen Jehova a Dios ya nonoten so amin ya detalye na saray inaatey ya inad-aro tayo, tan akaparaan ya bilayen ira lamet.

14, 15. Singa imbaga nen Job, antoy nalilikna nen Jehova diad pamaoli tod saray inaatey?

¹⁴ Balet, antoy nalilikna nen Jehova nipaakar ed pamaoli ed saray inaatey? Ibabangat na Biblia ya labalabay ton paolien iray inaatey. Intepet na matoor ya toon si Job: “No ompatey so sakey a too, nabilay lamet kasi?” Insan to imbagad si Jehova: “Ontawag ka, tan onebat ak ed sika. Pirawaten mo so kimey na saray limam.” Say tutukoyen nen Job et say panalagar tod lubok ya anggad sikatoy nonoten na Dios.​—Job 14:13-15.

¹⁵ Isip mo pa labat. Pirpirawat nen Jehova ya bilayen iray inaatey. Agta makapalikliket ya naamtaan ya ontan so nalilikna nen Jehova? Balet diad arapen, antoy nagawa nipaakar ed kioli? Siopa ray paolien, tan iner?

16. Anto ray kipapasen no paolien la ray inaatey?

¹⁶ No basaen tayod Biblia iray agawan inkioli ed bilay, dakel so naaralan tayo nipaakar ed kioli ed bilay ya nagawad  arapen. Akaiba lamet na saramay pinaolin totoo nensaman diad dalin iray inad-aro da. Ontan met so nagawad kioli ed arapen, balet ta mas marakep ni. Singa naaralan tayo lad Kapitulo 3, labay na Dios ya magmaliw a paraiso so interon dalin. Kanian saray inaatey et agbilayen ed mundon napnoy panlalaban, krimen, tan sakisakit. Nawalaan ira na pankanawnawan manbilay ya tuloytuloy diad dalin ya mareen tan maliket so kipapasen.

17. Siopa ray paolien?

¹⁷ Siopa ray paolien? Imbaga nen Jesus ya “amin a walad pakanodnonotan iran lubok et narengel day boses to [nen Jesus] tan ompaway ira.” (Juan 5:28, 29) Ontan met, ibabaga na Apocalipsis 20:13: “Inter na dayat iray inaatey a wadtan, tan say patey tan say Lubok et inter da ray inaatey da.” (Nengnengen so Apendise ed artikulon “Anto so Sheol tan Hades?”) Naandi so karga na amin ya lubok. Nabilay so amin a binilyon ya inaatey ya manpapainawa ditan. Imbaga nen apostol Pablo: “Walay kioli na saray matunong tan saray agmatunong.” (Gawa 24:15) Antoy labay ton ibaga ’tan?

18. Siopa ray kaibad “saray matunong” ya paolien, tan antoy epekto na sayan ilalo ed sika?

¹⁸ Kaibad “saray matunong” iramay nababasa tayod Biblia ya nambilay antis ya linma diad dalin si Jesus. Nayarin naisip moy Noe, Abraham, Sara, Moises, Ruth, Ester, tan dakel ni. Diad Kapitulo 11 na Hebreo et abitla so arum ed sarayan lalaki tan bibiin mabiskeg so pananisia ra. Balet kaiba met ed “saray matunong” iray lingkor nen Jehova ya inatey ed panaon tayo. Lapud walay ilalon kioli ed bilay, agtayo natatakot ya ompatey.​—Hebreo 2:15.

19. Siopa ray “agmatunong,” tan anton pankanawnawa so maar-aron iter ed sikara nen Jehova?

¹⁹ Panon to balet iramay totoon agnanlingkor odino agtinmulok ed si Jehova ta agdan balot akabat? Sarayan binilyon ya “agmatunong” et agnalingwanan. Paolien ira  met tan ikdan iray pankanawnawan nakabat so tuan Dios tan manlingkor ed sikato. Legan na sanlibon taon, paolien iray inaatey tan ikdan iray pankanawnawan nakaiba dan manlingkor ed si Jehova iray matoor ya totoo diad dalin. Makapalikliket itan a panaon. Satan a panaon et tinawag na Biblia ya Agew na Panangukom. *

20. Anto so Gehenna, tan siopa ray onla ditan?

²⁰ Kasin say labay ton ibaga et paolien so amin ya nambilay nensaman? Andi. Ibabaga na Biblia ya saray arum ya inaatey et walad “Gehenna.” (Lucas 12:5) Say salitan Gehenna et inalad samay tawag ed bantakan na basura diad paway na Jerusalem nensaman. Popoolan ditan iray bangkay tan basura. Ibabantak ditan iray bangkay, ya parad saray Judio et agnepeg ya iponpon tan napaoli. Kanian dugaruga so Gehenna ya simbolo na permanentin kadederal. Anggaman walay betang nen Jesus ed pangukom ed saray mabilay tan inaatey, si Jehova so manunan Ukom. (Gawa 10:42) Agton balot paolien iramay inukom ton mauges tan agda labay so manguman.

21, 22. (a) Antoy sakey nin klase na kioli? (b) Siopay sankaunaan ya pinaoli bilang espiritu?

²¹ Walay imbaga na Biblia ya sakey nin klase na kioli, say kioli ed bilay bilang espiritu ed tawen. Diad Biblia et saksakey so nabasa ya oniay klase na inkioli to, samay inkioli nen Jesus.

²² Nen pinatey si Jesus diad dalin, ag-inyabuloy nen Jehova ya mansiansia ed Lubok so matoor ya Anak To. (Salmo 16:10; Gawa 13:34, 35) Pinaoli na Dios si Jesus, balet ta aliwa lan bilang sakey a too. Impaliwawa nen apostol Pedro ya si Kristo et “pinatey ed laman balet binilay ed espiritu.”  (1 Pedro 3:18) Talagan baleg a milagro ‘ya! Mabilay lamet si Jesus bilang makapanyarin espiritu. (Basaen so 1 Corinto 15:3-6.) Si Jesus so sankaunaan ya angawat ed onian makapakelkelaw ya kikioli. Balet aliwan sikato so sampot.​—Juan 3:13.

23, 24. Siopa ray kaibad “melag a pulok” nen Jesus, tan pigara ra?

²³ Lapud amta nen Jesus ya sikatoy ompawil lad tawen, imbaga tod saray matoor a patumbok to ya sikatoy “mangiparaan na sakey a pasen” diman parad sikara. (Juan 14:2) Saramay onlad tawen et tinawag nen Jesus ya “melag a pulok.” (Lucas 12:32) Pigaray kaiba ed sayan melag a grupo na matoor a Kristiano? Diad Apocalipsis 14:1, imbaga nen apostol Juan: “Anengneng ko so Kordero [si Jesu-Kristo] ya akaalagey diad Palandey Sion, tan kaiba to so 144,000, ya akasulat ed saray moling da so ngaran to tan say ngaran na Ama to.”

²⁴ Sarayan 144,000 a Kristiano, kaiba la ray matoor ya apostol nen Jesus, et paolien pian manbilay ed tawen. Kapigan ira paolien? Insulat nen apostol Pablo ya nagawa itan legan na panaon na kiwawala nen Kristo. (1 Corinto 15:23) Naaralan mod Kapitulo 9 ya wala ti’ la natan ed satan a panaon. Kanian diad panaon tayo, no ompatey iray pigpigara lan kabiangan na 144,000, tamtampol ya onoli rad bilay ed tawen. (1 Corinto 15:51-55) Balet, say ilalo na maslak ya inaatey et paolien irad Paraison dalin diad arapen.

25. Antoy aralen ed ontumbok a kapitulo?

²⁵ On, talagan taloen nen Jehova so patey ya kalaban tayo, tan permanente lan naandi itan! (Basaen so Isaias 25:8.) Balet, ompan nitepet mo, ‘Antoy gawaen na saramay onolid tawen?’ Kaiba ran manuley ed makapakelkelaw ya gobierno odino Panarian ed tawen. Dakel ni naaralan tayo nipaakar ed satan a gobierno diad ontumbok a kapitulo.