AGNANLAPUD Biblia iray kabkabat ya holiday natan ed dakel a parte na mundo. Iner sirin so nanlapuan na saratan a selebrasyon? No makapan-research ka, seguradon naamtaan mo ray makapainteres ya ibabaga na saray reperensya nipaakar ed saray holiday ya kabkabat ed lugar yo. Nia ray pigaran alimbawa.

 Easter (odino Piesta na Inkioli). “Anggapoy nabasad Balon Sipan nipaakar ed panagselebra ed piesta na Easter,” so imbaga na The Encyclopædia Britannica. Panon a ginmapo so Easter? Nanlapu itan ed paganon panagdayew. Anggano iisipen na totoo ya sayan holiday et pannodnonot ed inkioli nen Jesus, saray kustombre ed panaon na Easter et aliwan Makristiano. Singa bilang, nipaakar ed samay kabkabat ya “kuneho ed Easter,” imbaga na The Catholic Encyclopedia: “Say kuneho et sakey a paganon simbolo tan irerepresenta toy pagmaliw a maanak.”

Balon Taon. Say petsa tan saray kustombre ed panagselebra na Balon Taon et manduruma ed kada bansa. Oniay imbaga na The World Book Encyclopedia no panon ya ginmapo iyan selebrasyon: “Nen 46 B.C., ingganggan na Romanon manuley ya si Julius Caesar ya gawaen so Enero 1 ya Agew na Balon Taon. Satan ya agew et indedika na saray Romano ed si Janus, say dios na saray wangalan [gate], puerta, tan gapoan. Say bulan ya Enero, ya diad English et January, et nanlapud ngaran nen Janus ya duaray lupa to ya nambenegan​—say sakey et akanengneng ed arap tan say sakey et akanengneng ed beneg.” Kanian say selebrasyon ya Balon Taon et nanlapud saray paganon tradisyon.

Pistay Inatey. Imbaga na 1910 ya edisyon na The Encyclopædia Britannica: “Say Pistay Inatey . . . et pinilin agew na Simbaan na Romano Katoliko pian nodnonoten iray matoor ya inatey. . . . Wala ray kabkabat ya sisisiaen ya mikonektaan ed Pistay Inatey ya nanlapud pagano tan abayag lan seselebraan. Kanian papanisiaan na karaklan ed saray Katolikon bansa ya ompapawil iray inatey ed kaabungan da diad labi na Pistay Inatey tan kanen day kakanen na mabilay.”​—Vol. I, p. 709.

Arum nin Holiday. Anggano agtayo sansakeyen so amin ya selebrasyon diad interon mundo, saray holiday ya mangidadayew ed totoo odino saray organisasyon na too et ag-aawaten nen Jehova. (Jeremias 17:5-7; Gawa 10:25, 26) Tandaan met ya depende ed nanlapuan na saray selebrasyon na relihyon no kasin makapaliket iratan ed Dios odino andi. (Isaias 52:11; Apocalipsis 18:4) Makatulong ed sika iray prinsipyod Biblia ya abitla diad Kapitulo 16 na sayan libro pian nasegurom no antoy iisipen na Dios ed panselebrad saray holiday odino piesta-opisyal.