LEKSION 2
Labay nen Rebeca ya Maliket si Jehova
Inad-aro nen Rebeca si Aman Jehova. Say asawa nen Rebeca et si Isaac. Inad-aro met nen Isaac si Jehova. Panon ya akabat nen Rebeca si Isaac? Antoy ginawa to pian maliket si Jehova? Amtaen ta ni so istorya nen Isaac.
Say tatay nen Isaac et si Abraham. Say nanay to et si Sara. Manaayam irad Canaan, tan saray totoo diman et aliwan si Jehova so Dios da. Balet say labay nen Abraham ya asawaen na anak to et biin say Dios to et si Jehova. Kanian imbaki toy aripen to, nayarin si Eliezer, ya onlad Haran pian mananap na magmaliw ya asawa nen Isaac. Diman manaayam iray kakanayon nen Abraham.
Makulikuli si Rebeca ya onasol pian makainum iray kamelyo
Wala ni ray aripen nen Abraham ya kaiba nen Eliezer ya linma. Arawdawi binyahe da. Angawit iray naakan tan regalo ya impalugan dad samploran kamelyo. Panon ya naamtaan nen Eliezer no siopay pilien to parad si Isaac? Nen akasabid Haran si Eliezer tan saray kaiba to, tinmunda rad bobon ta amta nen Eliezer ya oonlad man iray totoo pian onasol. Nampikasi ed si Jehova tan kuan to: ‘No onkerew ak na danum ed sakey a marikit tan ikdan to ak, tan painumen to ray kamelyok, naamtaan kon sikato so bii ya pinilim.’
Nagugunoyan, sinmabi Rebeca. Ibabaga na Biblia ya maganggana. Nen kinmerew na danum si Eliezer ed si Rebeca, inkuan to: ‘On. Ikdan ta kayoy danum tan painumen ko met irayay kamelyo yo.’ Antam, dakdakel so iinumen na apaet ya kamelyo, kanian batik lan batik si Rebeca pian onasol. Nengneng moy litrato, makulikuli si Rebeca awa?— Manbilib si Eliezer ed ebat nen Jehova ed pikakasi to.
Dakdakel so balibalin regalo ya inter nen Eliezer ed si Rebeca. Intagar nen Rebeca si Eliezer tan saray aripen ya kaiba to diad abung da. Imbaga nen Eliezer no akin ya sikatoy imbaki nen Abraham diman tan no panon ya inebatan nen Jehova so pikakasi to. Pinmayag so pamilya nen Rebeca ya magmaliw ya asawa toy Isaac.
Akilay Rebeca ed si Eliezer diad Canaan tan nagmaliw ya asawa nen Isaac
Pero, labay kasi nen Rebeca so miasawad si Isaac?— Amta nen Rebeca ya imbaki nen Jehova si Eliezer diman. Kanian nen tinepet na pamilya nen Rebeca no labay toy milad Canaan pian magmaliw ya asawa nen Isaac, kuan to: ‘On, mila ak.’ Akilay Rebeca ed si Eliezer. Kasabi dad Canaan, nankasal ira nen Isaac.
Ginawa nen Rebeca so labay nen Jehova kanian sikatoy agpinaulyanan nen Jehova. Kayari dakel a taon, nagmaliw ya apo toy Jesus! No aligen moy Rebeca tan labay mon maliket si Jehova, agto ka met paulyanan.
