LEKSION 8
Maong Iray Kakaaro nen Josias
Parad sika, mairap kasin gawaen so duga?— Ontan so iisipen na arum. Diad Biblia et walay sakey ya ugaw ya mairap ton gawaen so duga. Pero tinulongan na maong ya kakaaro to. Amtaen tay istorya to tan saray kakaaro to.
Say tatay nen Josias et si Amon, ya ari ed Juda. Mauges si Amon tan mandadayew ed saray diosdiosan. Nen inatey so tatay nen Josias, nagmaliw ya ari na Juda si Josias anggano 8 ni labat so taon to! Inalig kasi nen Josias si tatay to?— Andi, sikatoy maong ya ari!
Anggano nen uga-ugaw ni, labay to lan unoren si Aman Jehova. Kanian say pinili to labat ya kakaaro et saramay inaro day Jehova. Tan sikatoy tinulongan dan gawaen so duga. Siopa ray arum ya kakaaro nen Josias?
Binagaan nen Sofonias iray totoo ya ag-ira dapat mandayew ed diosdiosan
Say sakey et si Sofonias. Si Sofonias so propeta ya manbabagad saray totoo ed Juda ya mauges so nagawad sikara no mandayew irad saray diosdiosan. Dinmengel si Josias ed si Sofonias tan si Jehova so dinayew to, aliwan saray diosdiosan.
Say sakey nin kaaro nen Josias et si Jeremias. Agmanarawian so taon da tan sanabay so abung da. Talagan sankaaro ra, ta nen inatey si Josias, nanggawa si Jeremias na balibalin kansion ta naiiliw ton maong si Josias. Nantulongan ira pian gawaen so duga tan unoren si Jehova.
Nantulongan si Josias tan Jeremias ya gawaen so duga
Antoy naaralan mod si Josias?— Anggano nen uga-ugaw ni, labay to lan gawaen so duga. Amta to ya say dapat ya pilien ya kaaro et saramay inaro day Jehova. Komon ta say pilien mo met ya kakaaro et saramay inaro da si Jehova pian tulongan da kan gawaen so duga!
