Manga Marso o Abril lad saman. Kanian panaon la parad pamilya nen Jose kaiba ray kakaaro tan kakanayon da ya manbiahe paonlad Jerusalem. Tinaon da iman a gagawaen. Onla ra diman pian selebraan so Paskua a kakaukolanen na Ganggan. (Deuteronomio 16:16) Manlapud Nazaret anggad Jerusalem et manga 120 kilometro so kaarawi to. Busy tan maliket so amin. Si Jesus ya 12 años to la et eksayted a maong ed satan ya piesta ta makaonla lamet ed templo.

Parad si Jesus tan say pamilya to, say Paskua et aliwa labat ya sakey agew a selebrasyon. Sakey agew kayari na Paskua et onggapo so pitoran agew a Piesta na Andi-lebaduran Tinapay. (Marcos 14:1) Ipapasen itan ya kabiangay selebrasyon na Paskua. Say pambiahe ra manlapud Nazaret, say pampundo dad Jerusalem, tan say ipawil dad abung da et sabien toy manga duay simba. Balet diad sayan taon, mas binmayag ni ta walay agawad si Jesus. Nipaakar iyad problema ya naamtaan da nen pasempet la ra.

Nen manbiabiahe ra, inisip nen Jose tan Maria ya kaiba nen Jesus ya manbiabiahe iray kakanayon tan kakaaro da. Balet nen nampainawa ni ra ta labi la, agda manaya kaibay Jesus. Kanian inanap dad saray kakaiba da, balet anggapod man. Agda naalmo so ugaw! Pinmawil si Jose tan Maria ed Jerusalem pian anapen da.

Sanagew dan inanap balet agda naalmo. Anggad nen kabuasan la, anggapo ni. Balet diad komatlon agew, nalmo day anak da ed templo. Anengneng day Jesus ya akayurong ed pegley na saray Judion managbangat. Sikatoy ondedengel, mantetepet, tan pandinayewan da ed pakatalos to.

“Ana’ko, akin ya oniay ginawam ed sikami?” so tepet nen Maria. “Aburido kami lan maong nen amam ed panaanap mid sika.”​—Lucas 2:48.

Mankelaw si Jesus no akin ya agda amtay kulaan to. “Akin et aanapen yo ak?” so intepet to. “Agyo ta amta a nepeg a wala ak ed abung nen Amak?”​—Lucas 2:49.

Natan ta kompleto la ra, akila lay Jesus ed si Jose tan Maria diad Nazaret tan nampasakop ed sikara. Nantultuloy ya dinmunong tan binmaleg si Jesus. Anggano ugaw ni, naaala toy pabor na Dios tan totoo. Manlapud inkaugaw to, maabig so alimbawa nen Jesus, aliwa labat a diad pangiyuunad espiritual iran bengatla noagta ontan met ed panagrespetod atateng to.