Kayari nen Jesus ya akatongtong si Marta tan si Maria diad asingger ed Betania, linma rad lubok nen Lazaro. Sakey itan ya ungib ya asaraan na bato. Ingganggan nen Jesus, “Ekal yoy bato.” Apagaan si Marta, ta agto amta so nononoten nen Jesus a gawaen. Inkuan to, “Katawan, ambanget la natan, ta apat agew lay apalabas.” Balet imbaga nen Jesus ed sikato: “Agta imbagak ed sika a no manisia ka et nanengneng moy gloria na Dios?”​—Juan 11:39, 40.

Kanian inekal day bato. Insan tinmangay si Jesus tan nampikasi: “Ama, misalamat ak ed sika ta dinengel mo ak. Tua, amtak a naynay mo ak a dedengelen; balet nansalita ak nisengeg ed saray totoon akaalagey ed kaliberliber, pian manisia ra ya imbaki mo ak.” Diad impanpikasi nen  Jesus ed arap na totoo, impanengneng to a say gawaen to et diad panamegley na pakayari na Dios. Insan inmeyag si Jesus: “Lazaro, paway ka!” Tan pinmaway si Lazaro, a saray sali tan lima to et apotipotan na saray abel a parad ponpon, tan say lupa to et abalkot na abel. Inkuan nen Jesus ed sikara: “Ukbaran yo tan paulyan yo.”​—Juan 11:41-44.

Sayan milagro et anengneng na dakel a Judio a manliligliwa ed si Maria tan Marta tan anisia rad si Jesus. Balet saray arum et linmad saray Fariseo tan imbaga ray ginawa nen Jesus. Nantotongtong iray Fariseo tan saray atagey a saserdote a kaiba so atagey a korte na saray Judio, say Sanhedrin. Membro na sayan korte so atagey a saserdoten si Caifas. Inkuan na arum: “Antoy gawaen tayo, ta amayamay a tanda so gagawaen na sayan too? No paulyanan tayo labat ed gagawaen to, manisia la ran amin ed sikato, tan onsabi iray Romano tan ekalen dad sikatayo so pasen tayo tan say nasyon tayo.” (Juan 11:47, 48) Anggano nadngel na sarayan lalaki so testimonya na saramay akanengneng ya “amayamay a tanda so gagawaen” nen Jesus, agda panliketan so gagawaen na Dios ed panamegley to. Mas importante ed sikara so posisyon tan autoridad da.

Say inkioli nen Lazaro manlapud inaatey et singa tampal ed saray Saduceo ya agmanisia ed kikioli. Inkuan nen Caifas, a Saduceo: “Anggapon balot so amta yo, tan agyo nanenengneng a pakagunggonaan yo so ipatey na sakey a too parad saray totoo imbes a naderal so interon nasyon.”​—Juan 11:49, 50; Gawa 5:17; 23:8.

Lapud atagey a saserdote si Caifas, sikatoy pinakiwas na Dios ya ontan so ibaga to, ya aliwan “manlapud sarili to.” Say labay ya ibaga nen Caifas et nepeg a pateyen si Jesus pian agniyabeba so autoridad tan impluensya na saray Judion lider na relihyon. Balet sayan propesiya nen Caifas et manutukoy ed ipatey nen Jesus pian itarya so dondon, aliwan para labat ed saray Judio, noagta parad amin a “nitaytayak ya ananak na Dios.”​—Juan 11:51, 52.

Diad saman et naimpluensyaan nen Caifas so Sanhedrin pian iplano so pamatey ed si Jesus. Sayan plano et nayarin impasabi nen Nicodemo ed si Jesus, lapud sikatoy membro na Sanhedrin tan makaaro ed si Jesus. Kanian tinmaynan a tampol si Jesus ed Jerusalem, pian napaliisan toy ipatey sakbay na inggeter na Dios a panaon.