Akasabid Betsaida si Jesus tan saray disipulo to. Inyakar na saray totoo ed si Jesus so sakey a lakin bulag tan akikasi rad sikato ya diwiten to pian onabig.

Intabin nen Jesus so bulag a laki tan inyakar tod paway na baryo. Kayari ton inikdan na lutda iray mata na laki, intepet nen Jesus: “Wala lay nanenengneng mo?” Inmebat so laki: “Walay nanenengneng kon totoo, balet singa ra kakiewan a manaakar.” (Marcos 8:23, 24) Intapew lamet nen Jesus so lima to ed saray mata na laki tan sikatoy akanengneng la. Pinasempet la nen Jesus tan ingganggan to ya ag-onloloob ed baryo.

Insan nambiahe si Jesus tan saray disipulo to paonlad norte diad Cesarea Filipos. Andukey a patatdang itan ya manga 40 kilometro. Say katagey na baryo et 1,150 piye, tan walad bandad norte a mamabukig so Palandey Hermon ya asakbongay niebe odino snow. Sabien toy pigaran agew so pambiahe ra.

Legan iran manbiabiahe, sinmian si Jesus pian manpikasin bukor. Manga siamera o samploran bulan labat la antis ya ompatey, kanian mapaga si Jesus ed saray disipulo to. Diad agano ni et dakel lay tinmundan tinmumbok ed sikato, tan posiblin wala ray aguloan o adismaya. Nayarin agda natalosan no akin ya agto labay so magmaliw ya ari odino no akin ya agmangiter na tanda pian napaneknekan da no siopan talaga.

Nen linma ray disipulo ed pampipikasian nen Jesus, intepet to: “Siopa so Anak na too unong ed ibabaga na saray totoo?” Inkuan da: “Wala ray mangibabagan si Juan Bautista, ibabagay arum, si Elias, tan say kuan na arum et si Jeremias odino sakey ed saray propeta.” On, iisipen na totoo ya si Jesus et nayarin sakey ed saraman ya lalaki tan inmoli. Pian naamtaan toy nononoten da, tinepetan to ra: “Balet parad sikayo, siopa ak?” Inmebat a tampol si Pedro: “Sika so Kristo, say Anak na mabilay a Dios.”​—Mateo 16:13-16.

Imbaga nen Jesus ya maliket si Pedro ta impaamta itan na Dios ed sikato, tan inyarum to: “Ibagak met ed sika: Sika si Pedro, tan diad sayan bato so pangiletnegan ko na kongregasyon ko, tan ag-itan natalonaan na saray puerta na Lubok.” Imbaga nen Jesus ya sikaton mismo so mangipaalagey ed kongregasyon tan anggan say Lubok et agto nikulong iray membro to no mansiansia ran matoor diad dalin. Insipan tod si Pedro: “Iter kod sika iray tombok na Panarian na tawen.”​—Mateo 16:18, 19.

Aliwan si Pedro so pinili nen Jesus ya sankamanunaan ed saray apostol, tan aliwan sikato so ginawa ton pundasyon na kongregasyon. Si Jesus a mismo so Bato ya pangiletnegan na kongregasyon. (1 Corinto 3:11; Efeso 2:20) Balet niiter ed si Pedro so taloran tombok. Pribilehyo ton lukasan so pankanawnawa parad saray grupo na totoo ya onloob ed Panarian na tawen.

 Usaren nen Pedro so unonan tombok diad Pentecostes 33 C.E., no ipaamta tod saray magbabawin Judio tan proselita no antoy nepeg dan gawaen pian nilaban ira. Usaren toy komadua pian lukasan ed saray mananisian Samaritano so pankanawnawan makaloob ed Panarian na Dios. Insan diad 36 C.E., usaren toy komatlo pian lukasan itan ya pankanawnawa ed saray ag-asegat ya aliwan Judio, singa si Cornelio tan arum ni.​—Gawa 2:37, 38; 8:14-17; 10:44-48.

Diad sayan pantotongtong da, naaburido iray apostol to nen imbaga to ya magano lay panirap tan ipatey tod Jerusalem. Lapud agda atalosan ya napaoli ed tawen si Jesus, impireg nen Pedro tan binagaan to: “Kasian moy sarilim, Katawan; ag-iyan balot nagawa ed sika.” Balet sikatoy imbeneg nen Jesus tan inkuan to: “La kad benegan ko, Satanas! Makasbel kad siak, ta say iisipen mo et kanonotan na totoo, aliwan kanonotan na Dios.”​—Mateo 16:22, 23.

Natan et tinawag nen Jesus iray arum nilikud ed saray apostol to tan impaliwawa to ya aliwan mainomay so magmaliw a patumbok to. Inkuan to: “Siopaman a labay toy ontumbok ed siak, iburi toy sarili to tan sakbaten toy panamairapan a poste to tan mantultuloy ya ontumbok ed siak. Ta siopaman a malabay a mangisalba ed bilay to et nabalang to, balet siopaman a makabalang ed bilay to lapud siak tan ed maong a balita et nisalba to.”​—Marcos 8:34, 35.

On, pian naala day pabor nen Jesus, kaukolan ya makpel tan akaparaan ya mansakripisyo iray papatumbok to. Inkuan nen Jesus: “Siopaman a mangibaing ed siak tan ed saray salitak diad sayan mikakalugoran tan makasalanan a henerasyon, sikatoy ibaing met na Anak na too no onsabi ed gloria na Ama to a kaiba iray masanton anghel.” (Marcos 8:38) Kanian no onsabi si Jesus, “iter to so tumang na kada sakey unong ed gawa to.”​—Mateo 16:27.