Kayari na impanguman na itsura nen Jesus tan impamaabig tod ugaw ya aselepay demonyo ed Cesarea Filipos, sikatoy linmad Capernaum. Saray disipulo to labat so kaiba ton nambiahe pian ‘agnaamtaan’ na totoo. (Marcos 9:30) Lapud satan, walay pankanawnawa ton iparaan iray disipulo to parad ipatey to tan parad kimey da. Oniay imbaga tod sikara: “Say Anak na too et iyawat ed lima na totoo, tan sikatoy pateyen da, tan paolien ed komatlon agew.”​—Mateo 17:22, 23.

Aliwa lan balo itan ed saray disipulo to. Nibaga la nen Jesus ed sikara so ipatey to, anggaman agmanisia si Pedro ya nagawa itan. (Mateo 16:21, 22) Tan anengneng met na taloran apostol so impanguman na itsura to tan nadngel day tongtongan nipaakar ed “itaynan” nen Jesus. (Lucas 9:31) Saray papatumbok to et “maer-ermen” a maong anggano agda natatalosan so kabaliksan na imbaga to. (Mateo 17:23) Balet antakot ni ran mantepet nipaakar ed satan.

Akasabi ran siansiad Capernaum, say sentro na kimey tan baley na pigaran apostol. Saray lalaki diman ya mansisingil na buis ed templo et inasinggeran day Pedro. Ompan labay dan akusaan si Jesus ya agmanbabayar na buis kanian intepet da: “Manbabayar ta so managbangat yo na duaran drakma a buis [ed templo]?”​—Mateo 17:24.

“On,” so ebat nen Pedro. Anggano walad abung si Jesus, amta toy nagagawa. Kanian imbes ya alagaren toy Pedro ya mangibagad sikato, intepet nen Jesus: “Antoy nikuan mo, Simon? Siopa ray manbabayar odino manbubuis ed saray arari ed dalin? Saray anak da odino arum a totoo?” Inmebat si Pedro: “Arum a totoo.” Kanian imbaga nen Jesus: “No ontan sirin, agkaukolan a manbuis iray anak.”​—Mateo 17:25, 26.

Say Ama nen Jesus so Ari ed uniberso tan sikatoy dadayewen ed templo. Kanian base ed ganggan et agkapilitan ya manbayar na buis ed templo so Anak na Dios. Inkuan nen Jesus: “Balet ta pian anggapoy nibaga rad sikatayo, la kad dayat, manbanwit ka, tan alam so sira ya unonan nabanwit mo, tan sano lengaten moy sangi to et makaromog ka na sakey a pilak a sinsilyo [estater odino tetradrakma]. Alam itan tan bayaran moy buis ta.”​—Mateo 17:27.

Natan et saniiba la ray disipulo, tan intepet dad si Jesus no siopa so magmaliw ya manunaan ed Panarian. Sikara met may natatakot ya mantepet ed si Jesus nipaakar ed ipatey to, balet natan et ag-ira antakot ya onasingger ed sikato pian mantepet nipaakar ed arapen da. Amta nen Jesus so iisipen da. Atan may pansasangsangan da nen wala rad benegan to legan iran manbiabiahe paonlad Capernaum. Kanian intepet to: “Antoy pansasangsangan yod dalan?” (Marcos 9:33) Abaingan tan ag-inmesel iray disipulo ta pansasangsangan da no siopay manunaan ed sikara. Balet intepet lanlamang na saray apostol ed si Jesus so pantotongtongan da: “Siopan talaga so manunaan ed Panarian na tawen?”​—Mateo 18:1.

Singa agnaisip ya pansangsangan itan na saray disipulo ta ngalngali taloy taon da lan naoobserbaan tan narerengel si Jesus. Balet aliwa ran perpekto tan binmaleg irad lugar ya importante so posisyon ed relihyon tan ipapaseseg so pakawalaay betang. Sakey ni, kakkapangisipan nen Jesus ed si Pedro ya iter tod sikatoy “tombok” na Panarian. Kanian posiblin naisip to ya sikatoy  manunaan. Nayarin ontan met so alikna nen Santiago tan Juan ta anengneng day impanguman na itsura nen Jesus.

Antokaman so iisipen da, impetek nen Jesus so kanonotan da. Tinawag toy sakey ya ugaw, pinaalagey tod pegley da, tan inkuan tod saray disipulo to: “No agkayo magbabawi tan magmaliw a singa sarayan ugugaw, agkayon balot makaloob ed Panarian na tawen. Sirin, siopaman a manpaabeba a singa sayan melag ya ugaw, sikato so manunaan ed Panarian na tawen; tan siopaman a mangawat ed sakey ed sarayan ugugaw diad ngaran ko et mangaawat met ed siak.”​—Mateo 18:3-5.

Talagan makapakelaw so paraan na panagbangat to! Agnampasnokan nen Jesus iray disipulo to tan agto ra tinawag ya maagum odino maambisyon. Imbes, angusar na ilustrasyon. Saray ugugaw et anggapoy atagey ya posisyon odino rangko da. Indanet sirin dia nen Jesus ya kaukolan ya ontay panmoria na saray disipulo to ed sarili da. Insan oniay konklusyon nen Jesus ed leksion ya imbangat tod sikara: “Say mapaabeba ed sikayon amin, sikato so manunaan.”​—Lucas 9:48.