Say mamilagron impamakan nen Jesus ed nilibo et walaan na baleg ya epekto ed totoo. Inkuan da ya “talagan saya imay Propeta ya onsabi ed mundo,” say Mesias, tan seguradon magmaliw ya balibali so panuley to. (Juan 6:14; Deuteronomio 18:18) Kanian inanap day Jesus pian piliten dan gawaen ya ari.

Balet atebek nen Jesus so plaplanoen na saray totoo. Pinasempet to la ray totoo tan imbaga tod saray disipulo to ya onlugan la rad baloto. Iner so laen da? Diad Betsaida insan diad Capernaum. Si Jesus balet et tinmatdang ed palandey pian manpikasin bukor ed saman a labi.

Managaag so bulan tan manpalbangon la, tan anengneng nen Jesus ya walay baloto ed dayat. Agaylay kasil na daluyon, tan ‘naiirapan iray apostol ya manbebegsay, ta susubaen ira na dagem.’ (Marcos 6:48) Inmepas ed palandey si Jesus tan nanakar ed tapew na daluyon a paonlad sikara. “Akaarawi la ra na manga talora odino apatiran milya.” (Juan 6:19) Anengneng na saray disipulo ya singa lampasan ira nen Jesus kanian lapud takot da et inmeyag ira: “Aliwan tua yay nanenengneng tayo!”​—Marcos 6:49.

Oniay makapaligliwan imbaga nen Jesus: “Manpakpel kayo! Siak iya; agkayo natatakot.” Balet inmebat si Pedro: “Katawan, no sika itan, paasingger mo ak, a manakar ak diad tapew na saray danum.” Inkuan nen Jesus: “Gala!” Kanian inmepas si Pedro ed baloto tan nanakar ed tapew na danum paonlad si Jesus. Balet nen inimano nen Pedro so maksil a dagem, ataktakot tan onlelereg la. Inyeyag to: “Katawan, isalba mo ak!” Inyunat nen Jesus so lima to tan inegnaan toy Pedro a kuan to: “Sika a kulang na pananisia, akin et nanduaruwa ka?”​—Mateo 14:27-31.

Linmugan si Pedro tan Jesus ed baloto, tan tinmunda so maksil a dagem. Mankelaw iray disipulo, balet nepeg kasin pankelawan da itan? No atalosan day “kabaliksan na saray tinapay,” say milagron ginawa nen Jesus pigaran oras ni labat so apalabas nen pinakan toy nilibo, agda la komon pankelawan ya sikatoy makapanakar ed tapew na danum tan napadeen toy dagem. Natan et sikatoy inggalang da a kuan da: “Tuan sika so Anak na Dios.”​—Marcos 6:52; Mateo 14:33.

Akasabi rad balibali tan mabungan dalin na Genesaret, diad abalaten na Capernaum. Inyangkla day baloto tan inmepas ira. Abirbir na totoo si Jesus, tan inyakar dad sikato iray mansasakit pati saray nanlapud kakaabay a lugar. No nadiwit day anggan say saloy labat na kawes nen Jesus, onabig iran tampol.

Legan na satan, naamtaan na saray totoon akanengneng ed impamakan nen Jesus ed nilibo ya sikatoy tinmaynan la. Kanian nen sinmabi ray baloton nanlapud Tiberias, linmugan ira tan linma rad Capernaum pian anapey Jesus. Kasabi da, intepet da: “Rabbi, kapigan so insabim dia?” (Juan 6:25) Sikaray binagaan nen Jesus lapud dugan rason, a singa nanengneng tayod onsublay a kapitulo.