Manga duay taon lan akapokus si Jesus ed panagpulong. Kasin panaon la pian ontunda tan manrelaks? Andi, mas pinalaknab to ni ingey impanpulong to. “Niliber nen Jesus so amin a syudad tan baryo, a nambabangat ed saray sinagoga ra tan impupulong to so maong a balita na panarian tan pinapaabig to so amin a klase na sakit tan amin a klase na beblay.” (Mateo 9:35) Anengneng ton kakkaukolan ya palaknaben so panagpulong a kimey. Balet, panon ton nagawaan itan?

Legan a manbiabiahe, naimano nen Jesus iray totoon mankaukolan na tulong tan ligliwa. Singa ra karneron andiay pastol, kinatatan, tan pinaulyanan. Akasian to ra tan inkuan tod saray disipulo to: “Tuan dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.”​—Mateo 9:37, 38.

Amta nen Jesus so solusyon. Imbaki toy 12 apostol to ya asanderwa kanian anemiran paris ira ya manpulong. Insan to ra inikdan na malinew ya instruksion: “Agyo lalaen iray totoo na saray nasyon, tan agkayo onloloob ed dinanman a syudad na saray Samaritano; balet say laen yo labat et saray abalang a karnero ed sankaabungan na Israel. Sano onla kayon manpulong, ibaga yo: ‘Asingger lay Panarian na tawen.’”​—Mateo 10:5-7.

Say Panarian ya ipulong da et nipaakar ed samay binitla nen Jesus ed modelon pikakasi. Nibagan ‘asingger lay Panarian’ ta wadia lay tinuro na Dios ya Ari, si Jesu Kristo. Anto balet so paneknek ya talagan irepresenta na saray disipulo  to iyan Panarian? Inikdan ira nen Jesus na pakayarin mamaabig na mansasakit tan mamaoli na inaatey. Ag-ira manpabayar. Iner balet so pangalaan na saray apostol na saray kaukolan da, singa say inagew-agew a kanen da?

Imbaga nen Jesus ed saray disipulo to ya agda la pampapagaay gastosen dad sayan pampulong da. Agda kakargaan na balitok, pilak, odino gansa iray pananginan day kuarta. Agda met la kaukolan so mangawit na pananginay naakan diad pambiahe ra, odino duaran kawes, odino sandalyas. Akin? Pinaseguroan ira nen Jesus: “Say komikimey et makanepegan ed kanen to.” (Mateo 10:10) Saray totoon mangapresya ed mensahe ra so mangitaryad pankaukolan da. Inkuan nen Jesus: “Inerman so looban yon ayaman, mansiansia kayo ditan anggad itaynan yo.”​—Marcos 6:10.

Angiter met si Jesus na instruksion no panon ya ipulong so mensahe na Panarian ed saray unabung. Imbaga to: “Sano onloob kayod abung, ibano yo so akan-abung. No awaten da kayo, niwala ditan so pipirawaten yon kareenan; balet no agda kayo awaten, ompawil ed sikayo so kareenan yo. Inerman a walay agmangawat ed sikayo odino ag-ondengel ed mensahe yo, ipagpag yoy dabok na saray sali yo sano ompaway kayod satan ya abung odino satan a syudad.”​—Mateo 10:12-14.

Posible ni ingen ya ag-awaten na interon syudad o baryo so mensahe ra. Antoy pansumpalan na satan ya lugar? Imbaga nen Jesus ya manresulta itan ed graben panangukom. Impaliwawa to: “Ibagak ed sikayoy tua, diad Agew na Panangukom et mas anlemew ni so dusa ed dalin na Sodoma tan Gomorra nen say diad satan a syudad.”​—Mateo 10:15.