Say impawil nen Jesus et abalitaan na saray Judion manaayam diad asingger ed Dayat na Galilea. Nayarin nadngelan da ya pinadeen nen Jesus so bagyo, tan posiblin naamtaan na arum ed sikara so impamaabig tod lakin aselepan na demonyo. Kanian, “amayamay a totoo” so nantitipon ed gilig na dayat, nayarin diad sakop na Capernaum pian abrasaen si Jesus. (Marcos 5:21) Nen paepas lad baloto si Jesus, eksayted tan mantatalaran la ray totoo.

Say sakey ed saramay mapilit a makanengneng ed si Jesus et si Jairo, sakey a manangasikaso na sinagoga. Sikatoy dinmakmomo ed salian nen Jesus tan aminpigan akikasi: “Grabe so sakit na ana’kon bii. Ipangasim pay mila tan itapew mo ray limam ed sikato ta pian onabig tan manbilay.” (Marcos 5:23) Antoy reaksion nen Jesus ed impapuson kerew nen Jairo parad saksakey ya anak ton bii, ya 12 años to labat tan inad-aro ton maong?​—Lucas 8:42.

Nen paonla la rad abung nen Jairo, wala lamet so maemosyon ya situasyon. Eksayted ya maong iray totoon tinmumbok ed si Jesus. Tatalaranan da no kasin manggawa lamet na milagro. Balet, walay bii ya say pirpirawat to et natambal so graben sakit to.

Labinduay taon lan manpaparala so Judion bii. Amayamay lay nampatambalan to, tan inyupot to lay kuarta to ed amin ya inrekomenda dan panagtambal. Balet agnin siansia inmabig. Diad tua, “lalon linmoor” so sakit to.​—Marcos 5:26.

Natalosan mo ya aglabat makapakapuy so sakit to, makapabaing tan makapaingongot ni ingen itan. Kaslakan ya no ontan so sakit na sakey, nababaingan ton ibagad arum. Ontan met, diad Mosaikon Ganggan, no manpaparala so sakey a bii, sikatoy ipasen ya agmalinis. Siopaman a maniwit ed sikato tan ed adalaan a kawes to et kaukolan a manames tan agmalinis ya anggad labi.​—Levitico 15:25-27.

Sayan bii et “nadngelan toy balita nipaakar ed si Jesus,” kanian inanap to. Lapud agmalinis, sikatoy agnampalikas ya linmaok ed totoo, ya ibabaga tod sarili to: “No nadiwit ko labat so kawes to, onabig ak la.” Nen adiwit toy saloy na kawes nen Jesus, alikna ton tampol ya tinmunda so pampaparala to! Sikatoy “inmabig la ed makapairap a sakit to.”​—Marcos 5:27-29.

Inkuan nen Jesus: “Siopay aniwit ed siak?” Anto kasi alikna na bii nen nadngel to man? Inmebat si Pedro ya singa to babanoey Jesus: “Mumungkogen tan leletleten ka na saray totoo.” Akin sirin et intepet nen Jesus ya “Siopay aniwit ed siak?” Impaliwawa nen Jesus: “Walay aniwit ed siak, ta alikas kon pinmaway ed siak so pakayari.” (Lucas 8:45, 46) On, walay pinmaway ya pakayari nen Jesus nen inmabig imay bii.

Lapud amoria ton naimano da, dinmakmomo so bii ed arapan nen Jesus, natatakot tan manggiwgiw. Diad arap na amin, impaamta toy sakit to tan say inyabig to. Oniay makapaligliwan imbaga nen Jesus: “Ana’ko, pinaabig ka na pananisiam. La ka, niwala komon ed sikay kareenan, tan onabig ka lad makapairap a sakit mo.”​—Marcos 5:34.

Malinew, say Sakey ya pinili na Dios a manuley ed dalin et maaro tan maabagey. Agto labat iyaansakit iray totoo noagta walay pakayari ton tulongan ira!