Depende ed kipapasen na puso ra, nandurumay reaksion na totoo ed ibabaga tan gagawaen nen Jesus. Alinewan itan diad sakey ya abung ed Galilea. Inimbitaan na Fariseon manngaran na Simon si Jesus diad sakey a panangan, nayarin pian nanengneng ton mismo so manggagaway makapakelkelaw iran bengatla. Linmay Jesus ta nayarin inisip ton pankanawnawa lamet iman pian makapanpulong, a singa nen linmad imbitasyon a mangan kaiba iray managsingil na buis tan makasalanan.

Balet, agda inawat si Jesus a singa gagawaen dad maslak ya bisita ra. Diad saray marabok ya dalan ed Palestina, napepetangan tan narurutakan iray sali, kanian bilang panagparawes et kustombre dan urasan na ambetel a danum so sali na bisita. Agda itan ginawa ed si Jesus. Agda met inangoban, a kaslakan ya gagawaen da no palooben day bisita. Say sakey nin kustombre da et say pangikalbo na larak ed ulo na bisita pian ipanengneng so kaabigan tan inkamaparawes. Agda met itan ginawa ed si Jesus. Kanian talaga kasin pinarawes da?

Nen panangan la, inmirong iray bisita ed arap na lamisaan. Legan iran mamangan, agda alikas ya linmoob so sakey ya biin ag-imbitado. Say bii et “kabkabat ed syudad bilang makasalanan.” (Lucas 7:37) Amin ya imperpekton totoo et makasalanan, balet ta nayarin imoral so panagbilay na bii, ompan paabang ni ingen. Posiblin nadngel to la ray bangat nen Jesus, pati say imbitasyon to parad ‘amin ya mansasagpot tan nabebelatan ta pampainawaen to ra.’ (Mateo 11:28, 29) Lapud apakiwas ed ibabangat tan gagawaen nen Jesus, inanap to.

Linmad benegan nen Jesus so bii tan tinmalimukor. Matalareter iray lua to ed sali nen Jesus, tan pinunasan to iratan na buek to. Inangoban toy sali nen Jesus tan kinalboan to itan na ambalingit a larak ya awit to. Ag-agustoan iman nen Simon, tan inkuan tod sarili to: “No talagan propeta iyan too, amta to no siopa tan anton klase na bii so manidiwit ed sikato, a saya et makasalanan.”​—Lucas 7:39.

Lapud atebek nen Jesus so iisipen nen Simon, inkuan to: “Simon, walay ibagak ed sika.” Inmebat: “Anto man, Managbangat?” Intuloy nen Jesus: “Walay duaran laki ya akautang ed sakey a managpabayes; samay sakey et akautang na 500 a denario, balet samay sakey et 50. Nen anggapoy nibayar dad sikato, mabulos to ran pinerdona. Siopa sirin ed sikara so mas mangaro ed sikato?” Nayarin singa ag-interesado si Simon, tan oniay ebat to: “Say nibagak et samay pinerdona to a mas baleg so utang to.”​—Lucas 7:40-43.

Inmabobon si Jesus. Insan to ninengneng so bii tan inkuan tod si Simon: “Nanenengneng mo iyan bii? Linmoob ak ed abung mo, balet agmo ak inikdan na danum a panuras koy salik. Sayan bii et binasa toy lua to iray salik tan pinunasan to na buek to. Agmo ak inangoban, balet sayan bii et agto tinmundan inangoban iray salik manlapu lad insabik dia. Agmo kinalboay larak so ulok, balet sayan bii et kinalboan toy ambalingit a larak iray salik.” Atebek nen Jesus ya ipapanengneng na bii so impapuson panagbabawi to ed imoral ya panagbilay to. Kanian oniay konklusyon to: “Ibagak ed sika, anggaman dakel so kasalanan to et aperdona la iratan, lapud baleg so panangaro to. Balet samay naperdonay daiset et mangaro na daiset.”​—Lucas 7:44-47.

Agkokonsintien nen Jesus so imoralidad. Imbes, ipapatnag toy maabagey ya konsiderasyon ed saray totoon akagaway seryoson kasalanan ya magbabawi lanlamang tan onasingger ed Kristo pian nainawaan. Tan talagan nainawaan imay bii nen imbaga nen Jesus: “Aperdona la iray kasalanan mo. . . . Insalba kay pananisiam. La ka la, niwala komon ed sika so kareenan.”​—Lucas 7:48, 50.