Diad bandad bukig na Dayat na Galilea, mamilagron amakan si Jesus na nilibo balet binmatik nen labay dan gawaen ya ari. Diad saman a labi et nanakar ed dayat ya maksil so dagem tan insalba toy Pedro, ya akapanakar met ed danum balet linmereg nen kinmapuy so pananisia to. Pinadeen met nen Jesus so dagem, posiblin pian ag-onlereg so baloto na saray disipulo to.

Natan et akapawil lay Jesus ed bandad sagur ya parte na dayat, diad Capernaum. Sikatoy inanap na saramay mamilagron pinakan to tan intepet da: “Kapigan so insabim dia?” Binagaan ira nen Jesus ta sikatoy aanapen da labat pian napakan to ra lamet. Ingganggan to ra ya ‘mankimey, aliwan parad naderal a kakanen, noagta parad agnaderal a kakanen a mangiter na bilay ya andi-anggaan.’ Kanian intepet da: “Antoy gawaen mi pian nasumpal mi iray kimey na Dios?”​—Juan 6:25-28.

Nayarin say iisipen da et saray kimey ya walad Ganggan, balet say tutukoyen nen Jesus et say sankaimportantian ya kimey: “Saya so kimey na Dios, ya ipatnag yoy pananisia ed samay imbaki to.” Balet anggapoy ontan ya pananisia na saray totoo anggano amayamay lay ginawa to. Panggagawaen da ni ingey tanda pian manisia rad sikato. “Anton kimey so gawaen mo?” so intepet da. “Saray inmuunan atateng mi et angan na mana diad kalawakan, a singa nisulat: ‘Inikdan to ray tinapay manlapud tawen pian kanen da.’”​—Juan 6:29-31; Salmo 78:24.

Bilang ebat ed kekerewen dan tanda, impaarap nen Jesus so imano na totoo ed tuan Lapuan na saray milagro: “Ibagak ed sikayoy tua, ag-inter nen Moises ed sikayo so tinapay manlapud tawen, balet say Amak so mangiter ed sikayo na tuan tinapay manlapud tawen. Ta say tinapay na Dios et samay linmeksab manlapud tawen tan mangiter na bilay ed mundo.” Lapud agda atalosay labay ton ibaga, akikasi ra: “Katawan, ikdan mo kamin naynay na satan a tinapay.” (Juan 6:32-34) Anton “tinapay” balet so tutukoyen nen Jesus?

Impaliwawa to: “Siak so tinapay na bilay. Siopaman ya onasingger ed siak et agla naerasan, tan siopaman a mangipatnag na pananisia ed siak et aglan balot napaet. Balet singa imbagak lad sikayo, nanenengneng yo ak la balet agkayo ni manisia. . . . Ta linmeksab ak manlapud tawen pian gawaen koy linawa na samay angibaki ed siak, aliwan say linawak. Saya so linawa na samay angibaki ed siak, a nepeg ya anggapoy nabalang ko ed saramay inter tod siak noagta paolien ko ran amin diad kaunoran ya agew. Ta saya so linawa nen Amak, a balang sakey a mamidbir ed Anak tan mangipatnag na pananisia ed sikato et nawalaan na bilay ya andi-anggaan.”​—Juan 6:35-40.

Akapasnok iray Judio ed satan ya imbaga to, tan nannguronguro ira. Akin ya ibabaga ton sikatoy “tinapay a linmeksab manlapud tawen”? (Juan 6:41) Parad sikara, sikatoy anak labat na sanasawan taga Nazaret. Intepet na totoo: “Agta saya imay Jesus ya anak nen Jose, a kabat tayo so ama tan ina to?”​—Juan 6:42.

Inmebat si Jesus: “Agkayo la manngunguronguro. Anggapoy makaasingger ed siak likud no sikatoy iyasingger na Ama ya angibaki ed siak, tan sikatoy paolien ko diad kaunoran ya agew. Oniay nabasa ed sulat na saray Propeta: ‘Amin da et bangatan nen Jehova.’ Onasingger ed siak so kada sakey a dinmengel ed Ama tan akaaral. Anggapoy too ya akanengneng ed Ama, nilikud ed samay nanlapud Dios; saya imay akanengneng ed Ama. Ibagak ed sikayoy tua, siopaman a manisia et walaan na bilay ya andi-anggaan.”​—Juan 6:43-47; Isaias 54:13.

Nen katongtong nen Jesus si Nicodemo, impaliwawa nen Jesus so nipaakar ed andi-anggaan a bilay tan inkonekta to itan ed panisiad Anak na too. Inkuan to: “Kada sakey a mangipapanengneng na pananisia ed [bogbogtong ya Anak na Dios] et agnaderal noagta nawalaan na bilay ya  andi-anggaan.” (Juan 3:15, 16) Balet mas dakel so katongtong to natan, tan ibabaga tod sikara ya walay betang to ed pakawalaan day bilay ya andi-anggaan, ya agniiter na mana odino tinapay ed Galilea. Kanian panon ya nagamoran so bilay ya andi-anggaan? Inulit nen Jesus so imbaga to: “Siak so tinapay na bilay.”​—Juan 6:48.

Say tongtongan nipaakar ed tinapay manlapud tawen et agni asumpal ya anggad nambangat si Jesus ed sakey a sinagoga diad Capernaum.