Legan ya wala nid Jerusalem si Jesus parad Piesta na Saray Tabernakulo (odino Saray Alolong), imbangat to no anto ray importante tan tua. Kapkapangibaga ed sikato na arum ya Judion wadman: “Ilalak kami nen Abraham tan agkamin balot nagmaliw ya aripen.” Inmebat si Jesus: “Amtak ya ilalak kayo nen Abraham. Balet labay yo ak a pateyen, lapud agyo aawaten so bangat ko. Sasalitaen ko iray bengatlan anengneng ko sanen kaibak so Amak, balet gagawaen yo iray bengatlan nadngel yod ama yo.”​—Juan 8:33, 37, 38.

Simpli labat so punto nen Jesus: Duma so Ama to ed ama ra. Lapud agda amtay labay ton ibaga, inulit da: “Si Abraham so ama mi.” (Juan 8:39; Isaias 41:8) Tua met ya nanlapu rad lahi nen Abraham. Kanian parad sikara et Dios da met so Dios nen Abraham, ya kaaro na Dios.

Makapabigla balet so ebat nen Jesus: “No ananak kayo nen Abraham, aligen yoy alimbawa nen Abraham.” Ta say tuan anak et aligen toy ama to. Intuloy ni nen Jesus: “Balet natan et labay yo ak a pateyen, siak ya angibagad sikayo na katuaan a nadngel kod Dios. Ag-iya ginawa nen Abraham.” Insan awetwet irad sayay sinmublay ya imbaga nen Jesus: “Gagawaen yo iray gagawaen nen ama yo.”​—Juan 8:39-41.

Agnin siansia atalosan na saray Judio no siopay tutukoyen nen Jesus. Ibabaga da nin legal iran ananak: “Agkami niyanak lapud imoralidad; saksakey so Ama mi, say Dios.” Balet, talaga kasin say Dios so Ama ra? “No say Dios so Ama yo,” kuan nen Jesus, “aroen yo ak, ta nanlapu ak ed Dios tan wadia ak. Agak dia linma unong ed panlabayan ko, noagta imbaki to ak.” Insan nantepet si Jesus: “Akin et agyo natatalosan so ibabagak?” Tan inebatan to lanlamang: “Lapud agyo labay a dengelen so salitak.”​—Juan 8:41-43.

Sinalin impaliwawa nen Jesus no antoy pansumpalan na agda panisia ed sikato. Balet agda natalosan, kanian diretsaan to lan imbaga: “Nanlapu kayod ama yon Diablo, tan labay yon gawaen iray pilalek na ama yo.” Antoy personalidad na ama ra? Malinew so imbaga nen Jesus: “Sikatoy managpatey sanen ginmapo, tan agnansiansia ed katuaan.” Insan inyarum nen Jesus: “Samay nanlapud Dios et ondedengel ed saray salita na Dios. Saya so rason no akin ya agkayo ondedengel, ta agkayo nanlapud Dios.”​—Juan 8:44, 47.

Amasnok iray Judio ed satan ya imbaga to, tan inmebat ira: “Agta dugay ibabaga mi a, ‘Sakey kan Samaritano tan aselepan kay demonyo’?” Tinawag day Jesus ya “Samaritano” pian ipaliknay pansyodot dad sikato. Balet, ag-inimano nen Jesus so paniinsulto ra, inkuan to: “Agak aselepay demonyo, noagta igagalang koy Amak, balet agyo ak igagalang.” Seryoso itan ya imbaga to ta oniay makapabiglan sipan to: “Siopaman ya unoren toy salitak, agton balot nanengneng so ipapatey.” Agto labay ya ibagan literal ya agla ompatey iray apostol tan arum nin ontumbok ed sikato. Imbes, agdan balot nanengneng so permanentin kadederal, say “komaduan ipapatey,” ya anggapo lay ilalon nabilay lamet.​—Juan 8:48-51; Apocalipsis 21:8.

Balet, say amta na saray Judio et literal so imbaga nen Jesus, kanian say kuan da: “Natan et amta mi lan aselepan kay demonyo. Inatey lay Abraham, pati saray propeta, balet ibabagam a, ‘No unoren na siopaman so salitak, agton balot natawayan so ipapatey.’ Mas maong ka ni sirin nen say ama min si Abraham ya inatey la? . . . Antoy pangipapasen mod sarilim?”​—Juan 8:52, 53.

Malinew ya ipapaimano nen Jesus ya sikato so Mesias. Balet, imbes ya direkta ton ebatan so tepet da nipaakar ed sikato, say kuan to: “No igloriak so sarilik, anggapoy kakanaan na gloriak. Say Amak so mangiglogloria ed siak, samay ibabaga yon Dios yo. Ingen ta sikatoy agyo kabat, balet sikatoy kabat ko. Tan no ibagak ya agko kabat, magmaliw ak a singa sikayo, a matitila.”​—Juan 8:54, 55.

 Impanonot nen Jesus so alimbawa na matoor ya lakin nanlapuay lahi ra: “Nanliketan a maong na ama yon si Abraham so ilalon makanengneng ed agew ko, tan anengneng to itan tan nanliket.” On, anisiay Abraham ed pormisa na Dios kanian tinalaranan toy isabi na Mesias. “Anggapo ni 50 taon mo, balet anengneng mo lay Abraham?” so kuan da ta ag-ira makapanisia. Inmebat si Jesus: “Ibagak ed sikayoy tua, anggapo ni Abraham et wala ak la.” Say tutukoyen to et nen sikatoy wala nid tawen bilang makapanyarin anghel.​—Juan 8:56-58.

Agaylay pasnok na saray Judio ed imbaga nen Jesus ya sikatoy mabilay la antis ni nen Abraham, kanian anokdok iray bato pian tupaken da. Balet akaalis si Jesus tan agda asakitan.