Legan ya asingger nid Jerusalem si Jesus, wala ray Judion dinmagod sikato. Saray arum et labay day makaaral, say arum balet et labay da labat ya suboken. Nantepet so sakey ya eksperto ed Ganggan: “Managbangat, antoy nepeg kon gawaen pian natawir koy andi-anggaan a bilay?”​—Lucas 10:25.

Alikna nen Jesus ya aglabat mangaala na impormasyon iyan too. Ompan labay ton onebat si Jesus diad paraan ya nasakitan iray Judion ondedengel. Alikas nen Jesus ya wala lay sarilin opinyon to. Kanian marundunong ya tinepetan nen Jesus pian naamtaan no antoy iisipen na sayan laki.

“Antoy nisulat ed Ganggan? Antoy atalosan mod abasam?” so intepet nen Jesus. Sayan laki et inaral toy Ganggan na Dios kanian inala tod satan so ebat to. Imbaga to may walad Deuteronomio 6:5 tan Levitico 19:18: “‘Arom si Jehova a Dios mo ed interon pusom tan interon kamarerwam tan interon biskeg mo tan interon nonot mo,’ tan ‘say kaparam a too a singa ed sikan dili.’” (Lucas 10:26, 27) Atan kasi ebat?

Inkuan nen Jesus ed laki: “Dugay ebat mo. Itultuloy mon gawaen iya pian nagamoran moy bilay.” Balet ditan la kasi anampot so tongtongan? Agkontento so laki ed basta direktan ebat. Labay ton ‘paneknekan a sikatoy matunong’ pian nipanengneng ya dugay panmoria tan panagtrato tod arum. Kanian intepet to: “Siopa tay kaparak a too a nepeg kon aroen?” (Lucas 10:28, 29) Singa simpli labat itan a tepet pero baleg so nalalanor. Akin ey?

Ipapasen na saray Judio ya saramay manguunor labat ed saray tradisyon da so ‘kapara ran too,’ tan singa susuportaan itan na Levitico 19:18. Diad tua, ompan iisipen ni ingen na saray Judio ya “aliwan manepeg” so piulop ed saray aliwan Judio. (Gawa 10:28) Kanian parad sayan laki, tan nayarin pati arum ed saray mismon disipulo nen Jesus, et matunong ira no maong irad kapara dan Judio. Balet lapud agda ipapasen ya ‘kaparan too’ iray aliwan Judio, nayarin ayos labat no makapuy so pantrato dad sikara.

Panon ya nipetek nen Jesus iyan kanonotan, ya agto nasakitan so laki tan arum nin Judio? Angistorya: “Walay sakey a lakin onlalasur manlapud Jerusalem a paarap ed Jerico tan sinabat na saray matakew, a nilakseban da, pinepekpek da, tan batik la ra, a sikatoy intilak dan patey-pateyan. Natan et nibana a walay saserdoten onlalasur ed saman a dalan, balet sanen sikatoy anengneng to et pinaliisan to. Tan wala met so sakey a Levita ya onlalasur ed satan a lugar tan sikatoy anengneng to, balet pinaliisan to. Ingen walay sakey a Samaritano ya ondadalan ditan, tan kanengneng tod samay laki et akasian to.”​—Lucas 10:30-33.

Seguradon amta na samay lakin katongtong nen Jesus ya manaayam diad Jerico so dakel ya saserdote tan saray Levitan ontutulong ed templo. Pian makasempet ira, kaukolan day onlasur na manga 23 kilometro. Delikado so dalan ta nayarin wala ray manatambang ya matakew. No walay nanengneng na saserdote tan Levita ya kapara dan Judio ya arisgo, agta nepeg labat ya tulongan da? Balet diad istorya nen Jesus, imbaga ton agda tinulongan. Say tinmulong et sakey a Samaritano, ya nanlapud totoon kabkabusol na saray Judio.​—Juan 8:48.

Panon ya tinulongan na Samaritano so patey-pateyan ya Judio? Intuloy nen Jesus: “Inasinggeran to tan kinalboan toy larak tan alak iray sugat to tan binerberan to. Insan inlugan tod ayep to tan inyakar tod sakey a panagpundoan tan inasikaso to. Diad tinmumbok ya agew, sikatoy angipaway na duaran denario tan inter tod akankayarian na panagpundoan, ya inkuan to: ‘Asikasom iyan too, tan kapawil ko et bayaran koy arum nin nagastos mo.’”​—Lucas 10:34, 35.

Kayari iyan inistorya na Sankamaongan a Managbangat, si Jesus, tinepetan to may laki  pian manisip: “Parad sika, siopad sarayan talo so angaro ed samay kapara ton too a sinabat na saray matakew?” Seguro manaalangan may laki ya ibagan “amay Samaritano,” kanian say inyebat to: “Samay angipanengneng na panangasi ed sikato.” Insan impalinew nen Jesus so naaralan ed sayan istorya, pinaseseg to may laki: “La ka tan ontan met so gawam.”​—Lucas 10:36, 37.

Talagan epektibo so panagbangat to! No basta labat imbaga nen Jesus ed laki ya anggan saray aliwan Judio et nepeg ton ipasen ya kapara ton too, awaten kasi itan na laki tan arum nin Judion mandengdengel? Ompan andi. Balet lapud simplin istorya to, ya inusar to ray detalyin amta na saray ondedengel, apalinew so ebat ed tepet ya, “Siopa tay kaparak a too a nepeg kon aroen?” Kanian no ipapasen tayon kaparan too so amin, nepeg tayon ipanengneng so panangaro tan panangasi ya igaganggan na Biblia.