Singa ed instruksion nen Jesus, akasabi lay Pedro tan Juan diad Jerusalem pian manparaan parad Paskua. Ontumbok lay Jesus tan say samploran apostol to diman. Ngarem la, tan onseselek lay agew nen oneepas si Jesus tan saray disipulo to ed Palandey na Saray Olibo. Sampot la iyan agew ya nanengneng toy syudad anggad kioli to.

Ag-abayag, akasabi si Jesus tan saray disipulo to ed syudad tan linma rad abung ya panselebraan day pangdem ed Paskua. Sinmegep irad sakey a baleg ya kuarto ed tagey. Diman et anengneng dan akaparaan lan amin parad pangdem da. Tatalaranan nen Jesus iyan okasyon, ta inkuan to: “Nampirpirawatan kon nakaiba ta kayon mangan ed sayan Paskua antis na panirap ko.”​—Lucas 22:15.

Pigaran taon antis na satan, inggapo so tradisyon ya pangipasa ed pigaran kopa na alak ed saray mibiang ed Paskua. Natan, kayarin inawat nen Jesus so sakey ed saray kopa, sikatoy akisalamat tan inkuan to: “Ala yo iya tan ipasa yod balang sakey ed sikayo, ta ibagak ed sikayo, manlapud natan et agak oninum lamet ed sayan alak anggad isabi na Panarian na Dios.” (Lucas 22:17, 18) Mapatpatnag ya asingger lay ipatey to.

Legan na Paskua, walay nikadkaduman agawa. Inmalagey si Jesus, inyan tod pireg so ilalatop ton kawes, tan angalay tuwalya. Insan angibales na danum ed palanggana. Maslak et seseguroen na akan-abung ya naurasan so sali na saray bisita to, a nayarin aripen so manggawad saya. (Lucas 7:44) Balet diad sayan okasyon, anggapo may akan-abung kanian si Jesus lay nanggawad saya. Nayari met komon ya saray apostol so manggawad saya, balet anggapod sikaray namboluntaryo. Kasin lapud wala ni kompetisyon ed sikara? Antokaman so rason, abaingan ira ta si Jesus so anguras ed sali da.

Nen si Pedro lay urasan nen Jesus, inkuan to: “Agmo nepeg ya urasan iray salik.” Inmebat si Jesus: “No agta ka urasan, agka nayarin magmaliw a kaibak.” Inkuan nen Pedro: “Katawan, aliwan saray salik labat sirin, noagta pati saray limak tan say ulok.” Kanian seguradon abigla ed inyebat nen Jesus: “Siopaman a nanames la et malinis lay interon laman to, kanian saray sali to labat so kaukolan ya urasan. Tan malinis kayo la, balet ta aliwan amin ed sikayo.”​—Juan 13:8-10.

Inurasan nen Jesus iray sali na 12, pati si Judas Iscariote. Nen nisulong to lay ilalatop to tan dinmungo lamet ed lamisaan, intepet to: “Natatalosan yo no antoy ginawak ed sikayo? Tatawagen yo ak a ‘Managbangat’ tan ‘Katawan,’ tan duga kayo, ta ontan ak. Kanian no siak, a Katawan  tan Managbangat, et inurasan ko iray sali yo, nepeg yo met ya urasan iray sali na balang sakey. Ta angitilak ak na aligen yo, a no antoy ginawak ed sikayo et ontan met so nepeg yon gawaen. Ibagak ed sikayoy tua, say aripen et aliwan mas baleg nen say katawan to, tan samay imbaki et aliwan mas baleg nen samay angibaki ed sikato. Lapud amta yo la iraya, maliket kayo no gawaen yo.”​—Juan 13:12-17.

Talagan balibalin leksion itan na mapaabeban panaglingkor! Agnepeg a pilaleken na saray patumbok nen Jesus so magmaliw ya manunaan, tan isipen ya importante ra tan nepeg ya panserbian. Imbes, aligen day alimbawa nen Jesus, aliwan diad tradisyon na panag-uras na sali, noagta diad mapaabeba tan maliket ya panserbi ya anggapoy lalabien.