Si Jesus et ag-apabaingan na saray onkokontrad sikato tan agda apatitan pian niyawat dad saray Romano. (Lucas 20:20) Natan, legan ya wala nid templo nen Nisan 11, impawil tod sikaray patit da tan impaamta to so tuan pakabidbiran to. Intepet to: “Antoy nikuan yo nipaakar ed Kristo? Siopay akan-anak ed sikato?” (Mateo 22:42) Kabkabat na totoo ya say Kristo o Mesias et manlapud poli nen David. Kanian aman so inyebat da.​—Mateo 9:27; 12:23; Juan 7:42.

Intepet nen Jesus: “Akin balet a si David, a pinuyanan, et tinawag ton Katawan so Kristo, ya inkuan to, ‘Inkuan nen Jehova ed Katawan ko: “Yurong kad nikawanan ko anggad iyan kod salian mo iray kakabusol mo”’? Sirin, no sikatoy tinawag nen David a Katawan, panon a nibagan sikatoy anak to?”​—Mateo 22:43-45.

Ag-akasel iray Fariseo, ta say iilaloan da et too ya ilalak nen David so mangibulos ed sikara ed pananguley na Roma. Balet inusar nen Jesus may imbaga nen David ed Salmo 110:1, 2, pian ipaamta ya say Mesias et mas ni nen say toon manuley. Sikato so Katawan nen David, tan kayurong tod nikawanan na Dios et onggapon manuley. Ag-akasel iray onkokontrad si Jesus ed saman ya ebat to.

Mandengdengel iray disipulo tan arum ni. Sikara la natay kakatongtongen nen Jesus, ya papasakbayan to ra nipaakar ed saray eskriba tan Fariseo. Sarayan lalaki et “yinmurong ed yurongan nen Moises” pian ibangat so Ganggan na Dios. Binilin nen Jesus iray ondedengel: “Amin ya ibabaga rad sikayo, gawa yo tan unor yo, balet agyo aaligey kagagawa ra, ta agda gagawaen iray ibabaga ra.”​—Mateo 23:2, 3.

Insan angibagay Jesus na alimbawa na pankunkunwari da, inkuan to: “Mas baleg a pananginan na kasulatan so isusulong dad moling tan taklay da a pinagkaanting-anting.” Say arum a Judio et mangisusulong ed moling o taklay da na angkelag ya pananginay antikey iran bersikulo na Ganggan. Say gawa balet na saray Fariseo et pinabaleg da pian ompaway ya singa maseseg irad Ganggan. Ontan met, “paparukeyen da iray palaguygoy na saray kawes da.” Nepeg ya walay palaguygoy na kawes na saray Israelita, balet mas pinarukey itan na saray Fariseo. (Numeros 15:38-40) Amin iratan et gagawaen da “pian nanengneng na totoo.”​—Mateo 23:5.

Anggan saray disipulo nen Jesus et naimpluensiaan met na pilalek ya magmaliw ya mas atagey, kanian sinimbawa to ra: “Agkayo patatawag na Rabbi, lapud saksakey so Managbangat yo, tan amin yo et sanaagi. Niarum ni, agyo tatawagen ya ama yo so siopaman a too diad dalin, ta saksakey so Ama yo, samay walad tawen. Tan agkayo patatawag na lider, ta saksakey so Lider yo, say Kristo.” Anto sirin so nepeg ya pangipasen na saray disipulo ed sarili da, tan antoy ikiwas da? Imbagad sikara nen Jesus: “Say manunaan ed sikayo et nepeg a magmaliw a lingkor yo. Siopaman a mangiyaatagey ed sarili to et niyabeba, tan siopaman a mangiyaabeba ed sarili to et niyatagey.”​—Mateo 23:8-12.

Insan inyabawag nen Jesus iray nantutumbokan ya rason no akin ya pakaskasi iray eskriba tan Fariseo ya mankunkunwari: “Pakaskasi kayo la, sikayo ran eskriba tan Fariseo a mansimpisimpitan! ta sasaraan yo so Panarian na tawen pian agmakaloob iray totoo, ta sikayon mismo et agyo labay so onloob, tan aamperen yo iramay onloob la ditan.”​—Mateo 23:13.

Ag-aaprobaan nen Jesus so pangibabaliwala na saray Fariseo ed panmoria nen Jehova, a mapatnag ed saray gagawaen dan totontonen. Singa bilang, ibabaga ran: “No say pansambaan na sakey et diad templo, sikatoy aliwan obligado; balet no say pansambaan to et diad balitok na templo, sikatoy obligado.” Ipapanengneng dan bulag irad moral, ta mas importantid sikara iray balitok o gold ed templo nen say kaimportantian na templo, ya ditan ira mandadayew tan onaasingger  ed si Jehova. Tan “ibabaliwala [da] so mas ambelat iran pamaakaran na Ganggan, salanti, say inkahustisya tan panangasi tan katooran.”​—Mateo 23:16, 23; Lucas 11:42.

Tinawag nen Jesus irayan Fariseo ya “bubulag a manangigiya, a manasapit na ageyet balet ta mangaakmon na kamelyo!” (Mateo 23:24) Sasapiten day ageyet ed alak da ta marutak itan. Balet diad pangibabaliwala dad saray mas ambelat a pamaakaran na Ganggan et singa ra mangaakmoy kamelyo, ya marutak met ya ayep, atan labat ta mas baleg.​—Levitico 11:4, 21-24.