Anggaman grabe impanmaltrato tan impanludlurey ed si Jesus, saray sagpot nen Pilato pian ibulos to et anggapoy epekto ed saray manunan saserdote tan saray kakaiba ra. Say labay da labat et ipapatey si Jesus. Intultuloy dan inyeyag: “Ipasak ed poste! Ipasak ed poste!” Inkuan nen Pilato: “Ala yo la tan patey yo, ta anggapoy naromog kon kasalanan to.”​—Juan 19:6.

Ag-akombinse na saray Judio si Pilato ya si Jesus et nepeg ya ompatey lapud akusasyon dan onsusumlang ed gobierno na Roma, balet panon to no nisengeg ed relihyon? Pinmawil irad samay iyaakusa dan panagmudmora ed Dios sanen binista na Sanhedrin si Jesus. Inkuan da: “Walay ganggan mi, tan unong ed ganggan et sikatoy nepeg ya ompatey, lapud ibabaga ton sikatoy anak na Dios.” (Juan 19:7) Balo iya ed si Pilato.

Pinmawil si Pilato ed palasyo tan sasalien toy manggaway paraan pian ibulos iyan too ya dinmalan ed graben irap tan akugip na asawa to. (Mateo 27:19) Panon to balet yay balon iyaakusa na saray Judio​—ya ibabaga ton sikatoy “anak na Dios”? Amta la nen Pilato a si Jesus et taga Galilea. (Lucas 23:5-7) Ingen ta tinepetan toy Jesus: “Iner so nanlapuan mo?” (Juan 19:9) Kasin iisipen nen Pilato no nambilay lay Jesus nensaman, tan ompan nanlapud Dios?

Direktan nadngel nen Pilato ed si Jesus a sikatoy sakey ya ari balet say Panarian to et agkabiangan na sayan mundo. Agla kaukolan ya ipaliwawa ni nen Jesus so nipaakar ed saya, kanian agla inmesel. Ag-iya naawat nen Pilato, tan mamapasnok ya inkuan tod si Jesus: “Agmo labay so mitongtong ed siak? Agmo ta amtan walay autoridad kon mangibulos ed sika tan walay autoridad kon mamatey ed sika?”​—Juan 19:10.

Onia labat so inkuan nen Jesus: “Anggapon balot so autoridad mod siak no ag-itan inter ed sika manlapud tagey. Kanian mas baleg so kasalanan na samay toon angiyawat ed siak diad sika.” (Juan 19:11) Nayarin aliwan saksakey a too so tutukoyen nen Jesus. Say labay ton ibaga, mas ambelat so eebatan di Caifas, saray kakomplot to, tan si Judas Iscariote nen si Pilato.

Pandinayewan nen Pilato so awawey tan panagsalita nen Jesus, tan lalon tinmakot ompan sikatoy talagan nanlapud Dios, kanian sasalien lamet nen Pilato ya ibulos. Balet, wala lamet so imbaga na saray Judio a sakey nin tatakotan nen Pilato. Imbaga da: “No ibulos mo iyan too, aliwa kan kaaro na Cesar. Balang too a gagawaen ton ari so sarili to et sumpad Cesar.”​—Juan 19:12.

Impaway lamet nen Pilato si Jesus, tan legan ya akayurong ed panangukoman, inkuan tod saray totoo: “Nengneng yo! Say ari yo!” Balet agtinmunda iray Judio. Inyeyag da: “Patey mo! Patey mo! Ipasak mod poste!” Inkuan nen Pilato: “Pateyen koy ari yo?” Abayag lan agnagugustoan na saray Judio so uley na Roma, balet imbaga na saray manunan saserdote: “Anggapoy arum ya ari mi noag say Cesar.”​—Juan 19:14, 15.

Ataktakot si Pilato, kanian inter toy kekerewen na saray Judio, ya inyawat toy Jesus pian pateyen. Nilakseb na saray sundalo so ambalbalangan balabal nen Jesus tan insulong dad sikato so ilalatop a kawes to. Sanen iyaakar da lay Jesus pian pateyen, kaukolan ton sakbaten so panamairapan a poste to.

Diad saman et asingger lay ugto na Biernes, Nisan 14. Anggapo ni ugip nen Jesus manlapu nen kabkabuasan na Huebes tan nantutumbokan so naeksperiensya ton gonigon tan irap. Legan a nanairapan si Jesus ed panasakbat tod poste, sikatoy naupotay biskeg. Kanian pinasoot na saray sundalo so sakey a toon ondadalan, si Simon a taga Cirene diad Aprika, pian sakbatey poste ya anggad pasen a pamateyan dad si Jesus. Dakel a totoo so ontutumbok, tan saray  arum et tatapoktapoken day pagew da lapud ermen tan aakisan day nagagawa.

Oniay imbaga nen Jesus ed saray maneermen a bibii: “Ananak a bibii na Jerusalem, agyo ak la aakisan. Say akisan yo et say sarili yo tan saray anak yo; ta onsabi agew sano ibaga na totoo, ‘Maliket iray bibiin agmakaanak, saramay agnananak tan saramay agnampasuso!’ Insan ibaga ra naani ed saray palandey, ‘Saniban yo kami!’ tan ed saray pukdol, ‘Iyamot yo kami!’ No gawaen da irayan bengatla sano ambasay kiew, anto lay nagawa sano amagaan itan?”​—Lucas 23:28-31.

Say tutukoyen nen Jesus et say nasyon na saray Judio. Singa itan ompapatey a kiew ya medyo ambasa ni, ta wadman ni Jesus tan saray pigaran Judio a manisia ed sikato. Sano alaen iraya na Dios, say nakera labat et sakey a nasyon ya amagaan ed espiritual, a singa inatey a kiew. Diad satan et narengel so maksil a panakis sano usaren na Dios iray Romanon sundalo pian deralen itan a nasyon!