Manlapud Jerico, amaarap lay Jesus ed Betania. Diad sayan biahe, walay dalanen dan mairap a pasen a manga 20 kilometro a patatdang. Say Jerico et manga 250 metro a mas abeba nen say dayat, tan say Betania et manga 610 metro a mas atagey nen say dayat. Manaayam si Lazaro tan say duaran agagi ton bibii diad melag a baryo na Betania, a ngalngali 3 kilometro manlapud Jerusalem tan ed bandad bukig a gilig na Palandey na Saray Olibo.

Dakel lay sinmabin Judio diad Jerusalem parad Paskua. Sinmabi ran asakbay “pian linisan day inkasikara unong ed ganggan” no bilang walay adiwit dan bangkay odino akagawa ray antokaman a nanggawad sikaran agmalinis. (Juan 11:55; Numeros 9:6-10) Nantitipon ed templo iray arum a sinmabin asakbay. Iisipen dan ompan onlay Jesus ed saman a Paskua.​—Juan 11:56.

Walay baleg ya isyu nipaakar ed si Jesus. Sikatoy labay ya erelen tan pateyen na arum a lider na relihyon. Diad tua, ingganggan dan no walay makaamta ed kawalaan nen Jesus, ibaga to itan ed sikara “pian naerel da.” (Juan 11:57) Sinali la na sarayan lider a pateyen si Jesus kayari ton pinaoli si Lazaro. (Juan 11:49-53) Kanian wala ray manduaruwa no kasin manpanengneng nid publiko si Jesus.

Sinmabi si Jesus ed Betania diad Biernes, “anemiran agew antis na Paskua.” (Juan 12:1) Say onsublay ya agew (Sabaton, Nisan 8) et onggapo ed kaselek na agew. Kanian asumpal toy biahe to antis na Sabaton. Agto nayarin manbiahe manlapud Jerico no Sabaton​—manlapud kaselek na agew ed Biernes ya anggad kaselek na agew ed Sabado​—ta sebel itan ed ganggan na saray Judio. Nayarin linmay Jesus ed abung nen Lazaro, a singa ginawa to nen imbeneg.

Si Simon, a taga Betania met, et inimbitaan ton mangdem ed abung to si Jesus tan saray kakaiba to, pati si Lazaro, no Sabado. Si Simon et atawag ya “akating,” lapud sikatoy datin akating balet tinambal nen Jesus. Lapud sipor lan makulikuli si Marta, sinerbian to ray bisita. Si Maria et maniimanon maong ed si Jesus, a saya so nansengegan na sakey ya isyu.

Nilukasan nen Maria so sakey ya alabastro, odino melag ya pananginan a nankargay manga “sakey libra ya ambalingit a larak a puron nardo.” (Juan 12:3) Mabmabli iyan larak, say bili to (300 denario) et miparad manga sakey taon a sueldo! Inkalbo nen Maria so larak diad ulo tan sali nen Jesus, insan to pinunasan na buek to. Sankaangob ed loob na abung so ambalingit a larak.

Sinmanok iray disipulo tan intepet da: “Akin et pinerdi toy ambalingit a larak?” (Marcos 14:4) Nanreklamoy Judas, ya inkuan to: “Akin et agla inlako iyan ambalingit a larak ed 300 a denario tan inter ed saray mairap-bilay?” (Juan 12:5) Aliwan tua a pampapagaan nen Judas iray  mairap-bilay. Tatakewen toy kuarta ed kahon ya impiya ed sikato na saray disipulo.

Indepensa nen Jesus si Maria, ya inkuan to: “Akin et pibabalian yo iyan bii? Sikatoy nanggaway maabig ed siak. Ta naynay yon nakakaiba ray mairap-bilay, balet agyo ak nakaiban naynay. Sanen inkalbo tod laman ko iyan ambalingit a larak, ginawa to itan pian iparaan to ak ed ponpon ko. Ibagak ed sikayoy tua, inerman ed mundo so kipulongan na maong a balita, nipaamta met so ginawa na sayan bii bilang pakanodnonotan ed sikato.”​—Mateo 26:10-13.

Natan et masulok lan sakey agew a walad Betania si Jesus, tan kinmayat lay balita a sikatoy wadman. Dakel a Judio so linmad abung nen Simon aliwan pian nanengneng labat si Jesus, noagta pian nanengneng met si Lazaro “a pinaoli [nen Jesus] manlapud inaatey.” (Juan 12:9) Ingganggan natan na saray manunan saserdote a pateyen si Jesus tan si Lazaro. Iisipen na sarayan relihyoson lider a dakdakel so manisia ed si Jesus lapud mabilay lamet si Lazaro. Agaylay inkauges na sarayan relihyoson lider!