Nen asasakbay ni ed sayan labi imbangat nen Jesus iray apostol to na leksion ed pagmaliw a mapaabeba diad impanguras tod saray sali da. Natan, nayarin asumpal lay pangdem ed Paskua, binitla toy propesiya nen David: “Say maapit a kaarok, samay panmamatalkan ko, a kaibak a mamangan, et sinmumpad siak.” Insan to impaliwawa: “Sakey ed sikayo so mantraidor ed siak.”​—Salmo 41:9; Juan 13:18, 21.

Nannenengnengan iray apostol, tan intepet da: “Katawan, siak man?” Ontan met so imbaga nen Judas Iscariote. Impatepet nen Pedro ed si Juan, ya walad abay nen Jesus, no siopa iman. Kanian sinmaral si Juan ed si Jesus tan intepet to: “Katawan, siopa man?”​—Mateo 26:22; Juan 13:25.

Inmebat si Jesus: “Samay pangiteran koy tinapay ya idelnet ko.” Indelnet toy tinapay ed putahi ed lamisaan, inter to itan ed si Judas ya kuan to: “Say Anak na too et ontaynan la, unong a nisulat nipaakar ed sikato, balet pakaskasi la itan a too a diad panamegley to et natraidor so Anak na too! Magmaong nin agla niyanak itan a too.” (Juan 13:26; Mateo 26:24) Insan linmoob si Satanas ed si Judas. Sayan too, ya talagan mauges et inmunor ed panlabayan na Diablo tan nagmaliw ya “anak na kadederal.”​—Juan 6:64, 70; 12:4; 17:12.

Inkuan nen Jesus ed si Judas: “Sumpal mo lan tampol no antoy gawaen mo.” Inisip na arum ya apostol ya say ibabaga tod si Judas, a mangaasikasod kahon ya pananginay kuarta et: “‘Mangaliw ka na saray bengatlan nakaukolan tayo parad piesta,’ odino nepeg ya ikdan to iray mairap-bilay.” (Juan 13:27-30) Balet ta inmalis si Judas pian traidoren si Jesus.

Diad saya lanlamang ya labi na pangdem ed Paskua, inggapo nen Jesus so balon klase na pangdem. Angalay tinapay, akisalamat diad pikakasi, pinisag to, insan to inter ed saray apostol  pian kanen da. Inkuan to: “Saya et mankabaliksay laman ko a nepeg ya iter parad sikayo. Itultuloy yon gawaen iya bilang pannodnonot ed siak.” (Lucas 22:19) Impasa so tinapay, tan angan iray apostol.

Natan et angalay Jesus na kopa na alak, akisalamat diad pikakasi, tan impasa tod sikara. Kada sakey et inminum ed kopa, tan oniay imbaga nen Jesus: “Sayan kopa et mankabaliksay balon sipanan a pinaletan na dalak, a nepeg ya iyibung nisengeg ed sikayo.”​—Lucas 22:20.

Kanian inggapo nen Jesus so pakanodnonotan odino memoryal na impatey to ya kaukolan ya gawaen na saray patumbok to kada taon diad Nisan 14. Ipanonot na saya so ginawa nen Jesus tan na Ama to pian nibulos ed sentensia ya kasalanan tan patey iray walaay pananisia. Mas baleg so agawaan na satan nen samay agawaay Paskua parad saray Judio, ta idadanet na satan so tuan kibulos na saray totoon manisia.

Inkuan nen Jesus ya say dala to et “nepeg ya iyibung nisengeg ed dakel a totoo pian naperdona iray kasalanan.” Kaibad saray naperdona iray matoor ya apostol tan arum nin matoor ya disipulo. Sikara so nakaiba to diad Panarian nen Ama to.​—Mateo 26:28, 29.