Lapud inar-aro nen Jesus iray apostol to, ipaparaan to la ra parad magano lan iyalis to. Tinmangay ed tawen tan nampikasi ed Ama to: “Igloriam so anak mo, pian nigloria ka na anak mo, lapud inter mod sikato so pakauley ed amin a laman, pian amin ya inter mod sikato et ikdan toy bilay ya andi-anggaan.”​—Juan 17:1, 2.

Malinew ya binidbir nen Jesus a sankaimportantian a nigloria so Dios. Balet talagan makaligliwa so ilalon binitla nen Jesus​—bilay ya andi-anggaan! Lapud naawat to la so “pakauley ed amin a laman,” sarag to lan iyopresi ed amin a totoo no antoy nagunggona ed dondon to. Balet ta aliwan amin et nabendisyonan. Akin? Lapud saray gunggona ed dondon nen Jesus et ipagamor to labat ed saramay onkiwas unong ed sayan imbaga to: “Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”​—Juan 17:3.

Say sakey et nepeg ton kabaten a maong so Ama tan say Anak, a sikatoy nawalaan na maapit a relasyon ed sikara. Nepeg ton moriaen iray bengatla a singa ed panmoria ra. Ontan met, nepeg a panseetan ton ipatnag iray agnaparaan a kualidad da sano midedeneng ed arum. Tan nepeg ton bidbiren a say pakaawat na totoo na bilay ya andi-anggaan et onkokomadua labat ed pangigloria ed Dios. Imbaga lamet nen Jesus so nipaakar ed satan:

“Inggloria ta ka diad dalin, a sinumpal koy kimey ya impagawam ed siak. Kanian natan, Ama, igloriam ak diad abay mo a singa ed samay gloria a walad siak sanen wala ak ed abay mo antis ya apalsa so mundo.” (Juan 17:4, 5) On, kinerew nen Jesus a sikatoy nigloria lamet ed tawen diad panamegley na kioli to.

Balet, agnilingwanan nen Jesus no antoy agawaan to ed ministeryo to. Impikasi to: “Impaamtak so ngaran mo ed saray totoon inter mod siak a nanlapud mundo. Kayarian mo ra, tan inter mo rad siak, tan sinumpal day salitam.” (Juan 17:6) Aglabat binitla nen Jesus so ngaran na Dios a Jehova diad ministeryo to. Tinulongan to met iray apostol to a nakabat da no so siopa si Jehova​—saray kualidad to tan say pidedeneng tod totoo.

Akabat na saray apostol si Jehova tan naamtaan day betang na Anak to tan saray imbangat nen Jesus. Oniay mapaabeban inkuan nen Jesus: “Imbagak ed sikara iray salitam ed siak, tan inawat da iratan tan naamtaan da a linma ak dia a mangirepresenta ed sika, tan anisia ran imbaki mo ak.”​—Juan 17:8.

Insan binidbir nen Jesus so pandumaan na saray patumbok to tan say maslak a totoo ed mundo: “Onkerew ak, aliwan parad mundo, noagta parad saramay inter mod siak, lapud kayarian mo ra . . . Masanton Ama, bantayan mo ra nisengeg ed ngaran mo, ya inter mod siak, pian magmaliw iran saksakey a singa sikata et saksakey. . . . Tan sinalimbengan ko ra, tan anggapoy abalang ed sikara nilikud ed samay anak na kadederal,” salanti, si Judas Iscariote, a linma la pian sumpalen so misyon ton iyawat si Jesus.​—Juan 17:9-12.

Intuloy nen Jesus so pikakasi to: “Binusol ira na mundo. . . . Kerewen kod sika ya agmo ra eekalen ed mundo, noagta bantayan mo ra lapud samay mauges. Ag-ira kabiangay mundo, a singa siak ya agkabiangay mundo.” (Juan 17:14-16) Saray apostol tan arum nin disipulo et walad mundo, saray totoo ya uuleyan nen Satanas, balet nepeg a mansiansia ran biig ed mundo tan ed kaugsan na satan. Panon?

Nepeg a mansiansia ran masanto, a nibiig pian manlingkor ed Dios, diad pangiyaplika ra ed saray katuaan a walad Hebreon Kasulatan tan saray katuaan ya imbangat a mismo nen Jesus. Impikasi to: “Pasantom ira diad panamegley na  katuaan; say salitam et katuaan.” (Juan 17:17) Onsabi panaon, arum ed saray apostol et mansulat na impuyan iran libro a magmaliw met a kabiangan na “katuaan” ya ontulong pian napasanto so sakey a too.

Balet onsabi met so panaon a wala ni ray mangawat ed “katuaan.” Kanian say pikakasi nen Jesus et “aliwan parad sikara labat [saray 11 ya apostol], noagta parad saramay manisia met ed [sikato] ed panamegley na salita ra.” Antoy kinerew to parad sikaran amin? “Pian amin da et magmaliw a saksakey, a singa sika, Ama, ya akikasakey ed siak tan akikasakey ak ed sika, pian mikasakey met ira ed sikata.” (Juan 17:20, 21) Si Jesus tan say Ama to et aliwan literal a saksakey a persona. Saksakey ira lapud parehoy kanonotan da ed amin a bengatla. Impikasi nen Jesus ya nawalaan met komon na ontan a pankakasakey iray patumbok to.

Antis na saya, imbaga la nen Jesus ed si Pedro tan ed arum a sikatoy onalis pian mangiparaan na sakey a pasen parad sikara, salanti, sakey a pasen ed tawen. (Juan 14:2, 3) Natan et binitla lamet itan nen Jesus ed pikakasi to: “Ama, labay kon nakaiba ed kawalaan ko iray inter mod siak, pian nanengneng da so gloriak ya inter mod siak, lapud inarom ak antis nin niletneg so mundo.” (Juan 17:24) Kanian nensaman ni​—antis a manilalak si Adan tan Eva​—inaro la na Dios so bogbogtong ya Anak to, si Jesu-Kristo.

Sinampotan nen Jesus so pikakasi to diad impangidanet to lamet ed ngaran na Ama to tan say panangaro na Dios ed saray apostol tan ed arum a mangawat na “katuaan,” a kuan to: “Impakabat kod sikara so ngaran mo tan ipakabat ko itan, pian nipatnag da met so aro ya impatnag mod siak tan mikasakey ak ed sikara.”​—Juan 17:26.