1, 2. Akin et akatulong laingen so ginawa na saray onsusumpa ed maong a balita nen unonan siglo?

 MANTUTUMBOKAN lay graben panamasegsegang tan ginapoan met la nen Saulo ya “buyaken” so kongregasyon​—diad orihinal ya lenguahe say labay ya ibaga na satan et maruksan panagmaltrato. (Gawa 8:3) Tinmakas iray disipulo tan ompan iisipen na arum ed sikara ya agawa la may plano nen Saulo ya patundaen iray Kristiano ed panagpulong da. Balet walay ag-iilaloan ya agawa nen nitaytayak iray Kristiano. Anto itan?

² Saramay Kristiano ya nitaytayak et “inyaabawag da so maong a balita” diad saray lugar ya nakar da. (Gawa 8:4) Imadyin yo man, imbes ya napatunda na panamasegsegang so maong a balita, akatulong ni ingen itan pian onkayat so mensahe! Diad tua lapud nitaytayak iray disipulo, ag-alikas na saray onsusumpa ya lapud ginawa ra et mas dakel nin totoo so napulongan ed ararawin lugar. Nanengneng tayod onsublay ya ontan met so agawa diad modernon panaon.

3. (a) Siopa si Felipe? (b) Akin et agni apulongan so maslak ya totoo ed Samaria, balet antoy impasakbay nen Jesus ya nagawad satan ya teritorya?

³ Say sakey ed “saramay nitaytayak” et si Felipe. a (Gawa 8:4; nengnengen so kahon ya “ Si Felipe ya ‘Ebanghelisador’”) Linmay Felipe ed Samaria, sakey ya syudad ya agni apulongan so maslak ya totoo ta wala may imbaga nen Jesus ed saray apostol to nensaman: “Agkayo onloloob ed dinanman a syudad na saray Samaritano; balet say laen yo labat et saray abalang a karnero ed sankaabungan na Israel.” (Mat. 10:5, 6) Balet amta nen Jesus ya onsabi panaon et napulongan lanlamang iray tagad Samaria, ta oniay imbaga to antis ya onsegep ed  tawen: “Mantasi kayo nipaakar ed siak diad Jerusalem, diad interon Judea tan Samaria, tan diad sankaarawian a pasen na dalin.”​—Gawa 1:8.

4. Antoy reaksion na saray Samaritano ed impanpulong nen Felipe, tan akin et ontan so nayarin alikna da?

⁴ Anengneng nen Felipe ya say Samaria et ‘amputi la parad panag-ani.’ (Juan 4:35) Makaparepresko so mensahen awit nen Felipe parad saramay manaayam diman. Akin ey? Ta agmitotongtong iray Judio ed saray Samaritano, tan kabkabusol ni ingen ira na dakel ya Judio. Balet anengneng na saray Samaritano ya say mensahe na maong a balita et parad amin ya totoo, kanian baleg so pidumaan na satan ed panangidumaduma ya gagawaen na saray Fariseo. Agnampaimpluensya si Felipe ed satan ya kagagawa, amta tayo itan ta maseseg ton pinulongan iray Samaritano. Nayarin atan so sakey ya rason no akin ya “nankakasakey” ya dinmengel iray Samaritano ed si Felipe.​—Gawa 8:6.

5-7. Mangiter na saray alimbawa no panon ya nipulong so maong a balita nen apilitan ya onalis iray Kristiano ed arum ya lugar.

⁵ Singa met nen unonan siglo, agsarag ya patundaen na panamasegsegang iray totoo na Dios ed panagpulong da natan. Kada no puepuersaen iray Kristiano ya onalis ed arum ya lugar odino napripriso ira, makakatulong ni ingen itan pian nipasabi so mensahe na Panarian ed saray totoo diad balon lugar.  Singa bilang, legan na World War II, akapampulong iray Tasi nen Jehova diad saray panamairapan ya kampo na Nazi. Wala dimay Judio ya akabat to ray Tasi tan oniay inistorya to: “Akombinse ak ya nanlapud Biblia so amin ya papanisiaan na saray Tasi nen Jehova lapud pakpel ya impanengneng da legan iran akapriso kanian nagmaliw ak met ya Tasi.”

⁶ Wala ray agawa ya apulongan iray onsusumpa tan dinmengel ira. Singa bilang nen inyalis ed panamairapan ya kampo na Gusen ed Austria so sakey ya Tasi ya si Franz Desch, nigapo toy panangiyaral na Biblia ed sakey ya SS officer. Imadyin yo pay liket da nen akapannengneng lamet iran dua diad sakey ya kombension na saray Tasi nen Jehova kayari pigay taon tan pareho la ran manangipulong na maong a balita!

⁷ Singa ontan met so agawa nen apilitan so arum ya Kristiano ya onalis ed arum ya bansa lapud panamasegsegang. Singa bilang nen 1970’s, dakel so apulongan ya totoo ed Mozambique nen apilitan ya onalis ditan iray Tasi ya nanlapud Malawi. Sinmabi panaon et wala met so isusumpa ed Mozambique, pero tuloytuloy nin siansia so panagpulong diman. “Tua ya aminpigan naaresto so arum ed sikami lapud pampupulong mi,” so kuan nen Francisco Coana. “Anggaman ontan, no nanenengneng min dakel so ondedengel ed mensahe na Panarian, segurado kami ya tutulongan kami na Dios, ya singa ginawa to ed saray Kristiano nen unonan siglo.”

8. Antoy epekto na saray pananguman ed politika tan ekonomya ed panagpulong a kimey?

⁸ Siempre, aliwa labat ya panamasegsegang so rason no akin ya kinmayat so Inkakristiano ed arum ya lugar. Diad apalabas iran dekada, wala ray pananguman ed politika tan ekonomya tan lapud satan et nipulong so mensahe na Panarian ed saray totoo diad dakel ya lenguahe tan lahi. Wala met iray manaayam ed lugar ya mabetbet so guerra tan agaylay irap na bilay da kanian inmalis ira ed lugar ya mas marakep so panagbilay tan ditan met la ra ginmapon nanaral na Biblia. Dinmakel iray refugee kanian kaukolan iran pulongan ed lenguahe ra. Kasin manggagawa kayoy paraan pian pulongan iray totoo ed teritorya yo ya ‘nanlapu ed amin a nasyon tan tribu tan rasa tan lenguahe?’​—Apo. 7:9.

9. Siopa si Simon, tan antoy pambiliban to ed si Felipe?

⁹ Dakel ya tanda so ginawa nen Felipe ed Samaria. Singa bilang, pinaabig to ray walay kapansanan tan pinapaway to ray demonyo ed saray aselepan. (Gawa 8:6-8) Walay sakey a lakin manbilib ya maong ed saray milagron gagawaen nen Felipe. Say ngaran to et Simon, sakey ya managmahiko tan rerespetoen a maong na saray totoo tan ibabaga ran: “Sayan too so Pakayari na Dios.” Balet natan, anengneng nen Simon so tuan pakayari na Dios diad saray milagron ginawa nen Felipe. Lapud satan et nagmaliw ya mananisia si Simon. (Gawa 8:9-13) Balet anton talagay motibo to ed impagmaliw ton Kristiano?

10. (a) Antoy ginawa nen Pedro tan Juan ed Samaria? (b) Antoy ginawa nen Simon nen anengneng ton makakaawat na masanton espiritu iray balon disipulo no itapew nen Pedro tan Juan so lima ra ed sikara?

 ¹⁰ Nen naamtaan na saray apostol ya dakdakel so magmamaliw ya Kristiano ed Samaria, imbaki day Pedro tan Juan diman. (Nengnengen so kahon ya “ Inusar nen Pedro so ‘Tombok na Panarian.’”) Kasabi da diman, intapew na duaran apostol iray lima ra ed saray balon disipulo kanian akaawat ira na masanton espiritu. b Manbilib si Simon nen anengneng to itan. “Iter yo met ed siak iyan autoridad, pian siopaman a pangitapewan koy limak et makaawat na masanton espiritu,” so imbaga tod saray apostol. Susuholan to ni ingen ira na kuarta ta say amta to et sarag ton saliwen iyan sagradon pribilehyo!​—Gawa 8:14-19.

11. Antoy inyebat nen Pedro ed si Simon, tan antoy ginawa nen Simon?

¹¹ Diretsaan so inyebat nen Pedro ed si Simon. “Naderal komon so pilak mo a pati sika, lapud iisipen mo a nakayarian moy regalo na Dios diad panamegley na kuarta. Anggapon balot so betang mod saya, ta aliwan maptek so pusom ed pakanengneng na Dios,” so kuan na apostol. Kayari na satan, pinaseseg nen Pedro si Simon ya magbabawi tan ipikasi to ya perdonaen komon na Dios. Imbaga to, “Mikasi kad si Jehova, a no nayari et perdonaen to komon so mauges ya intension na pusom [“mauges ya pilalek mo,” Maung a Balita].” Sankanengneng met ya aliwan mauges a too si Simon; labay ton gawaen so duga,  balet diad saman et inunor toy mauges ya pilalek to. Kanian akikasi ed saray apostol: “Ipikasi yo ak sirin ed si Jehova pian anggapo komon ed sarayan imbaga yo so nagawad siak.”​—Gawa 8:20-24.

12. Anto so “simonya,” tan panon itan ya nagmaliw ya patit ed Kakristianoan?

¹² Napapasakbayan iray Kristiano natan ed sayan impanbilin nen Pedro ed si Simon. Diad tua, amay salitan English ya “simony” (simonya) et abuo lapud sayan agawa. Say labay ya ibaga na “simonya” et pangaliw o pangilako na saray posisyon lalo la no mikonektaan itan ed relihyon. Dakdakel so ontan ya agawa ed history na apostatan Kakristianoan. Diad tua, oniay imbaga na komasiam ya edisyon na The Encyclopædia Britannica (1878): “Seguradon nadiskobre na siopaman ya manaral ed history na eleksion ed panagpili na Papa ya lanang itan ya alaokan na simonya, tan anggapoy baing tan arap-arapan ni ingen itan ya gagawaen na dakel.”

13. Panon ya makapanalwar iray Kristiano ed simonya?

¹³ Nepeg ya manalwar iray Kristiano ed simonya. Singa bilang, agda sasalien ya ikdan na dakdakel ya regalo odino alablabas ya idayew iramay iisipen dan makapangiter ed sikara na kaaruman ya pribilehyo ed kongregasyon. Nepeg met ya manalwar iramay ipapasen ya walaan na autoridad ya mangiter na pabor, ya agda komon ipapanengneng so paboritismo ed saray mayayaman. Pareho itan ya simonya. Diad tua, nepeg ya “mapaabeba” so amin ya lingkor na Dios, tan alagaren dan say espiritu nen Jehova so mangiter na pribilehyo. (Luc. 9:48) Agnepeg ya anapen na saray totoo na Dios so “dilin kigloriaan” da.​—Pro. 25:27.

14, 15. (a) Siopa may “Etiopen eunoko,” tan panon ya nalmo nen Felipe? (b) Antoy reaksion na Etiope ed mensahe nen Felipe, tan akin et aliwan biglaan ya desisyon so impanpabautismo to? (Nengnengen so paimanod leksab.)

¹⁴ Natan ingganggan nen Jehova si Felipe ya onlad dalan a manlapud Jerusalem a paarap ed Gaza. Antokaman so tepet nen Felipe no akin ya kaukolan toy onlad man et naebatan ya amin nen anengneng to lay sakey ya Etiopen eunoko ya ‘manbabasan maksil na libro nen propeta Isaias.’ (Nengnengen  so kahon ya “ Siopa May ‘Etiopen Eunoko?’”) Pinakiwas na masanton espiritu nen Jehova si Felipe ya asinggeran so karwahe na laki. Binansagan nen Felipe so karwahe tan tinepetan to may Etiope: “Natatalosan moy babasaen mo?” Inmebat so Etiope: “Panon kon natalosan no anggapoy mangipaliwawa ed siak?”​—Gawa 8:26-31.

¹⁵ Pinalugan na Etiope si Felipe ed karwahe to. Seguradon balibali so impantongtong da! Dakdakel so agmakaamta no siopay tutukoyen ya “kordero,” odino “lingkor,” ed samay propesiya nen Isaias. (Isa. 53:1-12) Balet legan iran manbiabiahe, impaliwawa nen Felipe ed sayan Etiopen eunoko ya asumpal iyan propesiya ed si Jesu-Kristo. Singa saramay abautismoan nen Pentecostes 33 C.E., amta lan tampol na sayan Etiope ya sakey a Judion proselita no antoy kaukolan ton gawaen. Imbaga tod si Felipe: “Wala diay danum; antoy makasbel ed pakabautismoan ko?” Kanian binautismoan a tampol nen Felipe so Etiope! c (Nengnengen so kahon ya “ Bautismo Diad ‘Kawalaan na Danum.’”) Kayari na satan, inggiya na masanton espiritu nen Jehova si Felipe ed balon asainmin to diad Asdod, tan diman to intuloy ya impulong so maong a balita.​—Gawa 8:32-40.

16, 17. Panon ya igigiya na saray anghel so kimey a panagpulong natan?

¹⁶ Pribilehyo met natan na saray Kristiano ya ipulong so maong a balita ya singa ginawa nen Felipe. Kaslakan et ibabaga ray mensahe na Panarian ed saray totoon nakakatongtong da ya impormal, singa bilang no manbiabiahe ira. Dakel so eksperiensya ya mapatnag ya agnibanbana ya makapitongtong ira ed saray totoon matua so puso ra. Iilaloan tayo la itan ta malinew ya ibabaga na Biblia ya igigiya na saray anghel so kimey a panagpulong pian nipasabi so mensahe “diad kada nasyon tan tribu tan lenguahe tan rasa.” (Apo. 14:6) Tan impasakbay la nen Jesus ya igiya na saray anghel so kimey  a panagpulong. Diad samay ilustrasyon nen Jesus nipaakar ed trigo tan sisanyas, imbaga to ya diad panaon na panag-ani​—say kaunoran a parte na sistema na mundo—​“saray manag-ani et saray anghel.” Inyarum to ni ya “ekalen dad Panarian to so amin a bengatlan pakagapolan tan saray totoon manggagawa na kaugsan.” (Mat. 13:37-41) Diad satan et tiponen met na saray anghel iray magmaliw ya manuley ed tawen​—insan da met tiponen so “baleg ya ulop” na ‘arum ya karnero’—​ta labay iran iyasingger nen Jehova ed organisasyon to.​—Apo. 7:9; Juan 6:44, 65; 10:16.

¹⁷ Segurado tayo ya nagagawa itan ta no maminsan et wala ray nakakatongtong tayo ed ministeryo ya ibabaga ran ipipikasi dan tulongan ira na Dios. Singa bilang, walay duaran Tasi ya manpupulong kaiba day sakey ya melag nin ugaw. Nen asingger lay panangugto, ontunda la lawarin manpulong irayan duaran Tasi, balet impilit na samay ugaw ya laen da ni may onsublay ya abung. Diad tua, linma lan bukor tan tinmoktok ed samay abung! Nen walay biin nanlukas na puerta, dinmago may duaran Tasi pian katongtongen da. Abigla ira nen imbaga na samay bii ya ipipikasi to ya wala komoy onlad sikato ya ontulong pian natalosan to so Biblia. Kanian inggapo dan inyaralan na Biblia!

18. Akin et agtayon balot ibabaliwala so panagpulong tayo?

¹⁸ Bilang kabiangan na Kristianon kongregasyon, pribilehyo yo so makapikimeyan ed saray anghel legan ya mas ondarakel so totoon napupulongan ed panaon tayo. Agyon balot ibabaliwala itan ya pribilehyo. Legan yon iiter so sankaabigan yo, seguradon naliketan kayon maong diad tuloytuloy yon pangipulong ed “maong a balita nipaakar ed si Jesus.”​—Gawa 8:35.