1, 2. Anton milagro so ginawa nen Pedro tan Juan diad asingger ed puerta na templo?

 NGAREM la tan nasisinagan ni na agew iray onsasabin totoo. Ondadagsa ed templo iray debotadon Judio tan saray disipulo na Kristo. Asingger lan onggapoy “oras na pikakasi.” a (Gawa 2:46; 3:1) Wadtan met ira di Pedro tan Juan ya paarap lad puerta na templo a tatawagey Marakep. Anggano maingal iray mantotongtong tan sankarengel so panaakar na totoo, sankarengel met so mipapayabol ya lakin mantaon na masulok lan 40, tan lupoy manlapu lad inkiyanak to.​—Gawa 3:2; 4:22.

² Legan ya manasingger si Pedro tan Juan, bibitlaen na lakin lupoy so apasakey lan ibabaga to no mipapayabol. Tinmunda iray apostol, kanian ninmengneng so laki ed sikara, say amta to et ikdan day kuarta. Imbagad sikato nen Pedro, “Anggapoy pilak tan balitok ko, balet iter kod sika no antoy walad siak. Diad ngaran nen Jesu-Kristo a Nazareno, akar ka!” Imadyin yo pa ray totoon mankelaw ya maong nen binembenan nen Pedro so lima na lupoy tan first-time ya inmalagey! (Gawa 3:6, 7) Isip yo pay alikna to may laki legan ton nenengnengen iray inmabig lan sali to tan nen sinali toy onkupbang? Kampega lan manluklukso tan indaydayew toy Dios!

3. Anton mabmablin regalo so nayarin naawat na saray totoo tan samay lakin datin lupoy?

³ Eksayted iray totoo tan kibatiktik iran dinmago ed si Pedro tan Juan diad portiko nen Solomon. Dia inmalagey tan nambangat si Jesus nensaman, tan dia met impaliwawa nen Pedro ed saray totoo no panon ya agawa iyan milagro. (Juan 10:23) Mas mabli ni nen say pilak odino balitok so regalon inter to ed saray totoon wadman tan ed samay lakin datin lupoy. Sayan regalo et aliwa labat ya basta pankanawnawan onabig. Noagta pankanawnawa met iyan magbabawi, napunas iray kasalanan da, tan magmaliw iran papatumbok nen Jesu-Kristo, say tinuro nen Jehova ya “Manunan Manangitonton ed bilay.”​—Gawa 3:15.

4. (a) Kayarin milagro ya pinaabig nen Pedro tan Juan imay lupoy, antoy sinalin gawaen na saray walaan na autoridad? (b) Anton duaran tepet so ebatan tayo?

 ⁴ Makapalikliket iman ya agew! Inmabig so sakey ya lupoy tan makaakar la. Tan nilibo nin totoo so naikdan na pankanawnawan onabig ed espiritual pian makapambilay ira ya manepeg ed Dios. (Col. 1:9, 10) Pero aliwan satan labat so agawa ed saman ya agew, ta wala ray totoon walaan na autoridad ya sinali dan pigilan iray matoor ya papatumbok na Kristo ya unoren so ganggan nen Jesus ya ipulong so mensahe na Panarian. (Gawa 1:8) Iisipen da ya ‘abebay aral tan ordinaryon totoo labat’ si Pedro tan Juan, balet antoy naaralan tayo ed paraan da tan ugalin impanengneng da legan dan pupulongan iray totoo? b (Gawa 4:13) Tan panon tayon naalig so pakpel da tan na arum ni ran disipulo nen apasegsegang ira?

5. Antoy naaralan tayo ed paraan na impitongtong nen Pedro ed saray totoo?

⁵ Inmarap si Pedro tan Juan ed totoo, anggano amta ra ya nayarin saray arum ya wadman et kaiba ed saramay inmeyag ya pateyen si Jesus. (Mar. 15:8-15; Gawa 3:13-15) Talagan makpel si Pedro ta imbaga to ni ya inmabig imay lupoy diad ngaran nen Jesus. Makmakpel ya imbaga nen Pedro no antoy tua. Malinlinew ton imbaga ya walay eebatan na sarayan totoo ed impatey na Kristo. Balet ag-ansakit so linawa nen Pedro ed sarayan totoo ta amta ton ‘agda amtay ginawa ra.’ (Gawa 3:17) Tinawag to ni ra ingen ya agagi tan say nampokusan to la et say pangipulong ed mensahe na Panarian. No magbabawi irayan totoo tan ipanengneng day pananisia ed Kristo, onsabi ed sikara iray “makapainawan panaon” ya manlapud si Jehova. (Gawa 3:19) Kaukolan tayo met so manpakpel tan malinew tayon ipaamta ya asingger lay pangukom na Dios. Pero dapat agtayo papasakitan odino huhusgaan iray totoo. Imbes, dapat isipen tayon potensyal ya magmaliw ya agagi tayo iray pupulongan tayo, tan singa si Pedro, say pampokusan tayo et say mensahe na Panarian.

6. Panon ya impanengneng nen Pedro tan Juan ya mapaabeba ira?

⁶ Mapaabeba irayan apostol. Agda inalay dayew ed milagron ginawa ra. Imbaga nen Pedro ed saray totoo: “Akin et nenengnengen yo kami a singano sikatoy apaakar mi ed panamegley na dilin pakayari mi odino maridios a debosyon mi?” (Gawa 3:12) Amta nen Pedro tan saray arum nin apostol ya antokaman ya nagawaan da diad ministeryo da et lapud pakayari na Dios, aliwan diad sarili da. Kanian mapaabeba ra tan labay dan say idayew na totoo et si Jehova tan si Jesus.

7, 8. (a) Anton regalo so niiter tayo ed saray totoo? (b) Panon ya nasusumpal ed panaon tayo imay promise ya ‘pangipawil ed amin a bengatla’?

⁷ Dapat mapaabeba tayo met no ipupulong tayoy Panarian. Tua, agla iikdan na espiritu na Dios iray Kristiano natan na pakayarin manpaabig panamegley na milagro. Pero sarag tayon tulongan iray totoo ya nawalaan na pananisia ed Dios tan ed Kristo tan pian makaawat ira na regalo ya singa inter nen  Pedro​—say pankanawnawan naperdona iray kasalanan da tan nainawaan ira diad tulong nen Jehova. Kada taon, nilibon totoo so mangaawat ed satan tan magmamaliw ya bautismadon disipulo na Kristo.

⁸ Manbibilay tayo la ed samay imbaga nen Pedro ya panaon na ‘pangipawil ed amin a bengatla.’ Ginmapo iyan pangipawil nen 1914 nen niletneg so Panarian na Dios ed tawen, a singa ‘imbaga na Dios diad panamegley na saray masanton propeta to nensaman.’ (Gawa 3:21; Sal. 110:1-3; Dan. 4:16, 17) Kayari to tan, indaulo na Kristo so pangipawil ed dugan panagdayew diad dalin. Lapud satan, minilyon so nagmaliw ya kabiangan na espiritual ya paraiso tan manpapasakop ed Panarian na Dios. Nilakseb da lay daan tan marutak ya personalidad da tan ‘insulong day balon personalidad a pinalsa unong ed linawa na Dios.’ (Efe. 4:22-24) Inmabig so lupoy ya mipapayabol lapud espiritu na Dios, aliwan lapud pakayari na too. Atan met ya espiritu so ontutulong pian nagawaan iyan makapadinayew ya kimey natan. Singa si Pedro, dapat makpel tan epektibo tayo met ya usaren so Salita na Dios pian ibangat so arum. Tan no walay natulongan tayon magmaliw ya disipulo na Kristo, lapu itan ed pakayari na Dios, aliwan diad sarili tayo.

9-11. (a) Antoy reaksion na saray Judion lider ed mensahe nen Pedro tan Juan? (b) Antoy determinadon gawaen na saray apostol?

⁹ Mainga-ingal iray totoo lapud saray imbaga nen Pedro tan lapud manluklukso tan oneeyag so datin lupoy. Kanian dinago ira na saray manunan saserdote tan say kapitan ed templo, ya aturo ya mangasikaso ed seguridad diad templo. Nayarin Saduceo irayan lalaki, sakey iyan sekta na saray mayayaman tan maimpluensya ed politika ya seseguroen dan maong so relasyon na saray Judio ed saray Romano. Aliwan singa saray Fariseo ya maunor ed ganggan, saray Saduceo et impulisay day ganggan tan ag-ira manisia ed kioli. c Agaylay pasnok da nen naamtaan dan makpel ya ibabangat nen Pedro tan Juan diad templo ya inmoli si Jesus!

¹⁰ Diad pasnok da, impriso day Pedro tan Juan tan diad tinmumbok ya agew et inyarap da rad atagey ya korte na saray Judio. Parad sarayan mapaatagey ya manuley, anggapoy karapatan nen Pedro tan Juan ya manbangat diad templo ta ‘abebay aral da tan ordinaryon totoo labat ira.’ Ag-ira nanaral ed saray kabkabat ya eskuelaan nipaakar ed relihyon. Balet pankelawan ira na korte ta makmakpel iran mansalita tan walay kombiksion da. Akin et makapakombinse so panagsalita nen Pedro tan Juan? Say sakey ya rason et lapud “kakaiba ira nen Jesus nensaman.” (Gawa 4:13) Imbangat ira na Katawan da, tan walaay autoridad so panagbangat to, aliwan singa saray eskriba.​—Mat. 7:28, 29.

¹¹ Ingganggan na korte iray apostol ya itunda da lay manpulong. Makapanyarin maong itan ya korte ta pigay simba ni labat so apalabas, atan ya mismon korte so angukom ed si Jesus, sikara may angibagan: “Sikatoy manepeg ya  ompatey.” (Mat. 26:59-66) Balet agnatatakot si Pedro tan Juan. Akaalagey ira ed arapan na sarayan mayaman, de-aral, tan maimpluensyan totoo, tan oniay makmakpel balet marespeton imbaga ra: “Sikayo so mangukom no kasin duga ed pakanengneng na Dios so idengel ed sikayo imbes a diad Dios. Balet parad sikami, agkami nayarin ontundan mansalita nipaakar ed saray anengneng tan nadngel mi.”​—Gawa 4:19, 20.

12. Antoy makatulong pian makapanpakpel tayo?

¹² Kasin makapanpakpel kayo met? Antoy nalilikna yo no walay pankanawnawa yon pulongan iray mayaman, de-aral, odino maimpluensyan totoo ed lugar yo? Panon to no babalawen kayo na saray kapamilya yo, kaeskuela, odino saray katrabaho yo lapud saray papanisiaan yo? Kasin natatakot kayo? No on, sarag yon labanan itan ya nalilikna yo. Nen wadiad dalin si Jesus, imbangat to ray apostol to no panon ya makpel balet marespeto dan idepensa iray papanisiaan da. (Mat. 10:11-18) Kayari na inkioli nen Jesus, im-promise tod saray disipulo to ya tuloytuloy dan nakaiba diad “amin ya agew anggad kaunoran a parte na sistema na mundo.” (Mat. 28:20) Diad panangigiya nen Jesus, ibabangat itayo na “matoor tan makabat ya aripen” no panon tayon idepensa iray papanisiaan tayo. (Mat. 24:45-47; 1 Ped. 3:15) Naaawat tayo so instruksion na matoor tan makabat ya aripen diad saray aral ed kongregasyon, singa diad Ministeryo tan Bilay na Kristiano, tan diad saray nibased Biblia ya publikasyon ya singa saray artikulo ya “Ebat ed Saray Tepet ed Biblia” ya walad jw.org ya website. Kasin onaatendi kayo ed sarayan aral tan uusaren yo irayan publikasyon? No on, seguradon naaruman so pakpel tan kombiksion yo. Tan singa saray apostol, seguradon anggapoy makapanpatunda ed sikayo diad pangipulong yod arum nipaakar ed saray balibalin katuaan ed Biblia ya naaralan yo.

13, 14. Antoy gawaen tayo no wala ray onkontra ed sikatayo, tan akin?

¹³ Nen imbulos la ra na korte, akinengnengan ya tampol si Pedro tan Juan ed saray kapanisiaan da. “Nankakasakey iran nampikasi ed Dios” pian makpel iran makapanpulong lamet. (Gawa 4:24) Amta nen Pedro ya pian nagawaan tayo so linawa na Dios, agtayo dapat mantitiwala ed sarili tayon biskeg. Pigay simba  ni labat so apalabas, oniay matalek ya imbaga nen Pedro ed si Jesus: “Anggano taynan da kan amin, agta kan balot taynan!” Balet singa impasakbay la nen Jesus, ataktakot ya tampol si Pedro tan imburi toy kaaro tan managbangat to. Balet akaaral si Pedro ed lingo to.​—Mat. 26:33, 34, 69-75.

¹⁴ No diad sarili yo labat so pantiwalaan yo, agyo nagawaan so ganggan ya ipulong so nipaakar ed Kristo. No salien na saray onkokontra ya pakapuyen so pananisia yo odino patundaen da kayon manpulong, alig yoy alimbawa nen Pedro tan Juan. Ipikasi yod si Jehova ya pabiskegen to kayo. Manpatulong kayod saray agagi. Ibaga yod saray elder odino diad saray matatken ed espiritual iray dadalanen yon problema. No amta yo ya wala ray mangipipikasi ed sikayo, segurado ya mansiansia so biskeg yo.​—Efe. 6:18; Sant. 5:16.

15. Akin et agdapat ya nadismaya iramay akatunda ed panagpulong da?

¹⁵ No diad apalabas et akatunda kayo ed panagpulong yo lapud panataktakot na arum, agkayo nadidismaya. Tandaan ya akatundan agano so amin ya apostol ed panagpulong da nen inatey si Jesus, balet intuloy da lanlamang itan. (Mat. 26:56; 28:10, 16-20) Imbes ya nadismaya kayo la lapud saray lingo yo ed apalabas, usar yo iray naaralan yo ed saray agawad sikayo pian pabiskegen so arum.

16, 17. Antoy naaralan tayo ed pikakasi na saray papatumbok na Kristo diad Jerusalem?

¹⁶ Antoy dapat tayon ipikasi no papasegsegangen itayo na saray walad autoridad? Imanoen ya agkinerew na saray disipulo ed si Jehova ya ipaliis to ra ed saray panamasegsegang? Seguradon sankanonot da imay imbaga nen Jesus: “No pinasegsegang da ak, pasegsegangen da kayo met.” (Juan 15:20) Imbes, say kinerew na sarayan matoor ya disipulo ed si Jehova et ‘imanoen to so pamapagyaw’ na saray onkokontra. (Gawa 4:29) Amta na saray disipulo no antoy mas importante, say linawa na Dios. Natatalosan da ya no napasegsegang ira, nasusumpal so propesiya. Amta da ya singa samay imbangat nen Jesus ya ipikasi ra, ‘nagawa so linawa na Dios ed dalin’ antokaman so ibaga na saray manuley.​—Mat. 6:9, 10.

¹⁷ Pian nagawaan na saray disipulo so linawa na Dios, oniay impikasi da ed si Jehova: “Ikdan mo komon na pakpel iray ariripen mo pian nitultuloy min niyabawag so salitam.” Antoy maples ya ebat nen Jehova? “Yinmegyeg so pasen a nantitiponan  da, tan napno ran amin na masanton espiritu tan makmakpel dan inyabawag so salita na Dios.” (Gawa 4:29-31) Anggapon balot so makaamper ed pakasumpal na linawa na Dios. (Isa. 55:11) Anggano singa imposiblin nagawa so linawa na Dios tan singa mabisbiskeg iray kalaban, no manpikasi tayod Dios tan onkerew tayo na tulong, pabiskegen to tayo pian makapantultuloy tayon makpel ya manpulong.

18. Antoy ginawa na saray kabiangan na kongregasyon ed Jerusalem pian natulongan day sakey tan sakey?

¹⁸ Ag-abayag, masulok ya 5,000 so nagmaliw ya kabiangan na balon kongregasyon diad Jerusalem. d Anggano nanduruma so nanlapuan na saray disipulo, ‘nankakasakey ira ed puso tan kamarerwa.’ Nankakasakey ira ed panagnonot tan panmoria. (Gawa 4:32; 1 Cor. 1:10) Aglabat basta nampikasi iray disipulo ed si Jehova ya bendisyon toy sagpot da, wala ni ginawa da. Tinulongan day sakey tan sakey diad espiritual, tan no kaukolan et anggan diad materyal. (1 Juan 3:16-18) Singa bilang, inlako na disipulon si Jose ya tinawag met na saray apostol ya Bernabe so dalin to. Mabulos ton inter so amin ya nanlakoan to pian natulongan ton makapansiansia ni ed Jerusalem iramay nanlapud ararawin pasen tan mas dakel ni naaralan da nipaakar ed balon pananisia ra.

19. Akin ya pinatey nen Jehova si Ananias tan Safira?

¹⁹ Inlako met na sanasawan si Ananias tan Safira so pigaran kaykayarian da tan angiter met ira na kontribusyon da. Kunwari et inter dan amin so nanlakoan da pero diad tua “masekreton imbiig [da] so arum a nanlakoan.” (Gawa 5:2) Pinatey nen Jehova iyan sanasawa, aliwan lapud kulang so inter da, noagta lapud mauges so motibo ra tan niloko da ray apostol. ‘Say Dios so tinilaan da, aliwan saray totoo.’ (Gawa 5:4) Singa saramay mansimpisimpitan ya binano nen Jesus nensaman, mas labay nen Ananias tan Safira ya idayew ira na totoo imbes ya naala day pabor na Dios.​—Mat. 6:1-3.

20. Anto ray naaralan tayo nipaakar pangiter ed si Jehova?

²⁰ Maiter iray matoor ya disipulo ed Jerusalem nen unonan siglo, tan ontan met iray minilyon ya Tasi natan, mabulos iran mangiiter na donasyon pian nasuportaan so sankamundoan ya kimey ya panagpulong. Agpipiliten so anggan siopa ya mangiter na kuarta odino usaren toy panaon to pian nasuportaan itan ya kimey. Aglabay nen Jehova ya ambelat so liknaan tayo odino napapasootan tayo labat ya manlingkor ed sikato. (2 Cor. 9:7) Ag-interesado si Jehova ed kabaleg na iiter tayo, noagta diad motibo na pangiiter tayo. (Mar. 12:41-44) Agtayo labay ya aligen si Ananias tan Safira, kanian agtayo labay so mandayew ed Dios pian labat walay naawat tayon gunggona odino pian idayew itayo na totoo. Imbes, labay tayon aligen si Pedro, Juan, tan Bernabe ya mandayew itayod si Jehova lapud talagan inar-aro tayo tan lapud inaro tayo ray kapara tayon totoo.​—Mat. 22:37-40.