1-3. (a) Anto ray agawa ya nayarin maneral ed pankakasakey na Kristianon kongregasyon nensaman? (b) Antoy nitulong ed sikatayo no aralen tayo iyan agawa diad libro na Gawa?

 MALIKELIKET si Pablo tan Bernabe kasempet da ed Antioquia na Sirya manlapud unonan impanbiahe ra bilang misionero. Agaylay liket da ta inlukas la nen Jehova ed “saray nasyon so puerta a mangitonton ed pananisia.” (Gawa 14:26, 27) Tan ontan met so situasyon ya asabian da ed Antioquia, ta makulikulin ipupulong na agagi so maong a balita tan “dakdakel” lan Gentil so inmarum ed kongregasyon.​—Gawa 11:20-26.

² Akasabin tampol ed Judea iyan balibalin balita. Balet imbes ya naliketan so amin, abilay laingen so isyu ed panagsegat. Panon so nepeg ya pantrato na saray Judio tan aliwan Judion agagi ed sakey tan sakey, tan kaukolan kasin unoren na saray aliwan Judion Kristiano so Mosaikon Ganggan? Linmoor lan linmoor so isyu ya anggad ngalngali la naapag so Kristianon kongregasyon. Panon kasin naresolbe itan?

³ Legan tayon aaralen itan ya agawa diad libro na Gawa, dakel so importantin naaralan tayo. Makatulong iratan pian napansiansia tayoy pankakasakey tayo no bilang ta walay onlesan problema.

4. Antoy ipipilit na arum ya agagi, tan anton tepet so naisip tayo lapud satan?

⁴ Oniay insulat na disipulon si Lucas: “Wala ray lalakin [linmad Antioquia ya] nanlapud Judea a mangibabangat ed saray agagi: ‘Agkayo nilaban no agkayo nasegat unong ed ganggan nen Moises.’” (Gawa 15:1) Agtayo amta no kasin sarayan “lalakin nanlapud Judea” et dati ran Fariseo ya nagmaliw ya Kristiano. Pero singa ra Fariseo ta istrikton maong so pangiyaaplika da ed Ganggan. Tan ompan ibabaga da ni ingen ya nanlapud saray apostol tan saray elder ed Jerusalem iray ibabaga ra. (Gawa 15:23, 24) Akin et ipipilit ni na arum ya Judion agagi so panagsegat anta 13 taon lay linmabas manlapu nen inggiya na Dios si apostol Pedro ya  awaten lad Kristianon kongregasyon iray ag-asegat ya Gentil? a​—Gawa 10:24-29, 44-48.

5, 6. (a) Akin et iisipen na arum ya Judion Kristiano ya kaukolan ni so pampasegat? (b) Kasin kaiba so sipanan na panagsegat ed Abrahamikon sipanan? Ipaliwawa. (Nengnengen so paimanod leksab.)

⁵ Dakel so nayarin rason. Say sakey et lapud si Jehova ya mismo so angiganggan ed saray lalaki ya manpasegat ira, tan tanda itan na espisyal ya relasyon da ed sikato. Antis nin niwala so Ganggan a sipanan, gagawaen la itan nen Abraham tan na amin ya lalakin kaiba to. Insan sinmabi panaon ya nagmaliw itan ya kabiangan na Ganggan. b (Lev. 12:2, 3) Diad Mosaikon Ganggan, anggan saray dayo et kaukolan da met so manpasegat antis iran naikdan na arum ya pribilehyo, singa say pibiang ya mangan diad Paskua. (Exo. 12:43, 44, 48, 49) Kanian parad saray Judio, talagan marutak so sakey ya lakin ag-asegat tan ag-ira nayarin mandayew ed Dios.​—Isa. 52:1.

⁶ Kaukolan sirin na saray Judion agagi so pananisia tan kapaabebaan pian naiparehas day panagnonot da ed panagnonot nen Jehova. Sinalatan la na balon sipanan so Ganggan a sipanan, kanian no walay iyanak ya Judio, aliwa lan automatiko ya kaibad totoo na Dios. Tan parad saray Judion Kristiano ya manaayam ed saray lugar ya dakel iray Judio, singa diad Judea, kaukolan day manpakpel no magmaliw iran disipulo na Kristo tan no mandayew iran kaiba na saray ag-asegat ya Gentil.​—Jer. 31:31-33; Luc. 22:20.

7. Antoy ag-atalosan na saray “lalakin nanlapud Judea”?

⁷ Siempre, amta tayo ya ag-anguman so estandarte na Dios ta kaiba nid balon sipanan iray manunan prinsipyo na Mosaikon Ganggan. (Mat. 22:36-40) Singa bilang, no nipaakar ed panagsegat oniay insulat nen Pablo, “Say pagmaliw a peteg a Judio et unong ed no antoy walad loob to, tan say asegat et say puso to diad panamegley na espiritu, tan aliwan diad panamegley na nisulat a totontonen.” (Roma 2:29; Deu. 10:16) Ag-itan natalosan na saray “lalakin nanlapud Judea” tan ipipilit da ya igaganggan ni na Dios iray totoo to ya manpasegat. Nauman ni kasi itan ya panagnonot da tan ompayag iran paipetek?

8. Akin et akasabi ed mananguley ya ulop diad Jerusalem so isyu ed panagsegat?

⁸ Oniay intuloy nen Lucas: “Kayari na andukey ya impikatunongan tan impisuppiatan ed sikara (saray “lalakin nanlapud Judea”) nen Pablo tan Bernabe, nandesisyon iray agagi ya ibaki si Pablo, Bernabe, tan say arum ed sikara ya onla ed saray apostol tan mamatatken ed Jerusalem pian pantongtongan iyan  isyu.” c (Gawa 15:2) Andukey so impanebatan da ta balang sakey ed sikara et iisipen ton sikatoy duga, kanian ag-itan aresolbe na kongregasyon ed Antioquia. Pian napansiansia so kareenan tan pankakasakey, balibali ta nandesisyon so kongregasyon ya ipasabi so isyu ed saray “apostol tan matatatken ed Jerusalem,” say mananguley ya ulop. Antoy naaralan tayo ed saray elder ed Antioquia?

9, 10. Anto ray balibalin naaralan tayo ed saray agagi ed Antioquia tan ed si Pablo tan Bernabe?

⁹ Say sakey ya importantin naaralan tayo dia et kaukolan tayoy mantiwala ed organisasyon na Dios. Isip yo pa iya: Amta na saray agagi ed Antioquia ya puros Judio so amin ya membro na mananguley ya ulop. Pero nantiwala ra ya ibase na satan ya ulop so desisyon da ed Salita na Dios pian naresolbe so isyu ed panagsegat. Akin et ontan lay tiwala da? On, ta segurado so kongregasyon ya igiya ira nen Jehova panamegley na masanton espiritu to tan na ulo na Kristianon kongregasyon, si Jesu-Kristo. (Mat. 28:18, 20; Efe. 1:22, 23) No wala ray seryoson isyu natan, komon ta aligen tayo iray agagi ed Antioquia ya mantiwala tayo met ed organisasyon na Dios tan ed saray alanaan ya Kristianon membro na Mananguley ya Ulop.

¹⁰ Naaralan tayo met ya importante so manpaabeba tan mananos. Tinuron mismo na masanton espiritu si Pablo tan Bernabe ya onlan manpulong ed saray totoon aliwan Judio, balet agda inisip ya sarag da lan desisyonan diad Antioquia so isyu ed panagsegat. (Gawa 13:2, 3) Sakey ni, insulat nen Pablo: “Linma ak diman [ed Jerusalem] lapud imparungtal itan ed siak na Katawan”​—labay ton ibaga et igigiya na masanton espiritu si Pablo. (Gal. 2:2) Ontan met iray elder natan, mapaabeba tan maanos ira no wala ray onlesan isyu ya nayarin maneral ed pankakasakey. Imbes ya maneebatan ira tan ipilit dan sikaray duga, onkekerew iray tulong ed si Jehova panamegley na Biblia tan na instruksion tan panangigiya ya iiter na matoor ya aripen.​—Fil. 2:2, 3.

11, 12. Akin et kaukolan tayon alagaren si Jehova?

 ¹¹ No maminsan, ompan kaukolan tayo labat ya alagaren si Jehova pian natalosan tayo so sakey ya bengatla. Tandaan tayo ya nanalagar iray agagi ed panaon nen Pablo na anggad manga 49 C.E. antis ya impalinew nen Jehova ed sikara ya agla kaukolan ya manpasegat iray Gentil. Manga 13 taon ni so linmabas manlapu nen alanaan si Cornelio nen 36 C.E. Akin et onman kabayag? Seguro labay na Dios ya ikdan na dakel ya panaon iray matoor ya Judion Kristiano pian naiparehas day panagnonot da ed panagnonot to. Lalo la ta aliwan bastabasta so pangitunda ed 1,900 taon la ya sipanan na panagsegat ya nanlapu ni ed si Abraham ya inar-aro tan rerespetoen da!​—Juan 16:12.

¹² Talagan baleg so pribilehyo tayo ta ibabangat tan tutulongan itayo na maan-anos tan maomaong ya Ama tayo ed tawen pian naalig tayoy panagnonot to! Amin ya ibabangat to et parad pankaabigan tayo. (Isa. 48:17, 18; 64:8) Kanian komon ta agtayon balot ipipilit iray sarilin ideya tayo, tan agtayo maniisip na aliwa no wala ray pananguman ed organisasyon odino diad pakatalos tayo ed saray akasulat ed Biblia. (Ecl. 7:8) No bilang ta nalilikas yon singa negatibo lay panagnonot yo, maabig no dalepdepen yo ray prinsipyo ya walad Gawa kapitulo 15, tan kerew yoy tulong nen Jehova pian naiyaplika yo iratan. d

13. Panon tayon naalig so inkaanos nen Jehova diad ministeryo tayo?

¹³ Ompan nasubok so anos yo no walay iyaaralan yo na Biblia ya naiirapan ton taynan iray palson papanisiaan to odino mairap ton itunda iray tradisyon ya kontra ed Biblia. No ontan, ompan kaukolan tayoy manalagar pian nanengneng tayo no kasin awaten toy tulong na masanton espiritu na Dios tan manguman. (1 Cor. 3:6, 7) Legan tayon manaalagar, sarag tayon ipikasi so iyaaralan tayo. Diad dugan panaon, ipanengneng lanlamang nen Jehova no antoy sankaabigan ya gawaen tayo pian natulongan tayo iray iyaaralan tayo.​—1 Juan 5:14.

14, 15. Panon ya pinagalangan na kongregasyon ed Antioquia si Pablo, Bernabe, tan saray kakaiba da, tan panon ya abendisyonan iray agagi lapud sarayan lalaki?

¹⁴ Oniay sinmublay ya insulat nen Lucas: “Sanen nipatnubang la ra na kongregasyon, nambiahe irayan lalaki tan sinmamar ira ed Fenicia tan Samaria, tan inistorya day nipaakar ed impakakomberte na saray aliwan Judio, a sengegay panliket a maong na amin ya agagi.” (Gawa 15:3) Nanengneng ed samay impangipatnubang na kongregasyon ed si Pablo, Bernabe, tan saray kakaiba ra ya inar-aro tan papagalangan da ra. Impanengneng na agagi so suporta da tan labay dan bendisyonan na Dios irayan lalaki. Balibali lamet ya aligen iyan alimbawa na saray agagi ed Antioquia. Kasin papagalangan yo iray Kristianon agagi tayo, “nagkalalo la iramay [elder ya] mansasagpot ed panagsalita tan panagbangat” da?​—1 Tim. 5:17.

 ¹⁵ Nen paonla lad Jerusalem si Pablo tan saray kakaiba to, abendisyonan iray agagi ed Fenicia tan Samaria ta inistorya da iray eksperiensya ra nipaakar ed saray aliwan Judio ya magmamaliw ya Kristiano. Nayarin kaibad saray dinmengel ed sikara iray Judion agagi ya binmatik ed saratan ya probinsya nensaman kayari na impamatey ed si Esteban. Ontan met natan, no makakarengel iray agagi na saray eksperiensya nipaakar ed no panon ya bebendisyonan nen Jehova so panagpulong ya kimey, talagan napapaseseg ira, lalo la ra may ondadalan ed subok. Kasin napapaseseg kayo met no wala ray ontan ya narerengel yo diad saray aral, asemblea tan kombension, tan pati no manbabasa kayo ray eksperiensya tan istoryay bilay diad saray literatura tayo balang lan inimprinta odino diad jw.org?

16. Panon tayon nibaga ya binmaleg lay isyu ed panagsegat?

¹⁶ Akasabin siansia ed laen da irayan agagin nanlapud Antioquia kayari ran nambiahe na manga 550 kilometro. Oniay insulat nen Lucas: “Kasabi rad Jerusalem, maabig so impangawat ed sikara na kongregasyon tan saray apostol tan saray mamatatken, tan insalaysay da so dakel a ginawa na Dios ed panamegley da.” (Gawa 15:4) Balet oniay reaksion ya naawat da: “Inmalagey so arum ed saramay mananisia a datin membroy sekta na saray Fariseo tan inkuan da: ‘Kaukolan iran segaten tan bilinen iran mangunor ed Ganggan nen Moises.’” (Gawa 15:5) Talagan binmaleg la so isyu ed panagsegat, tan kaukolan itan ya resolbien.

17. Siopa ray kabiangan na mananguley ya ulop diad Jerusalem, tan akin et kaiba “iray mamatatken”?

¹⁷ “Say karunongan et walad saramay onkekerew na simbawa,” so ibabaga na Proverbio 13:10. Base ed satan ya prinsipyo, nantitipon iray apostol tan saray mamatatken pian pantongtongan so [isyu ed panagsegat].” (Gawa 15:6) “Saray apostol tan saray mamatatken” so nandesisyon parad amin ya Kristianon kongregasyon, ya singa gagawaen met na Mananguley ya Ulop natan. Akin et kaiba na saray apostol “iray mamatatken” odino elder? No nanonotan yo, pinatey si apostol Santiago tan walay panaon ya apriso si apostol Pedro. Nayari kasin ontan met so nagawa ed saray arum ya apostol? No nagawa itan, kaukolan ya wala ni ray arum ya kualipikadon alanaan ya brother ya mangituloy ed pangasikaso na kimey.

18, 19. Antoy mapuersan imbaga nen Pedro, tan antoy dapat ya naisip na saray akarengel ed satan?

 ¹⁸ Oniay intuloy nen Lucas: “Kayari na abayag ya impantongtong, inmalagey si Pedro tan imbaga tod sikara: ‘Agagi, kabkabat yo a manlapu la nen inmuuna iran agew et pinili ak na Dios diad sikayo pian diad panamegley ko et narengelan na saray aliwan Judio so salita na maong a balita tan manisia ra. Tan say Dios, a makaamta na walad puso, so nantasi ed impangiter tod sikara na masanton espiritu, a singa ginawa to met ed sikatayo. Tan parehoy impangipasen tod sikatayo tan ed sikara, tan nilinisan toy kapusoan da lapud pananisia ra.’” (Gawa 15:7-9) Base ed sakey ya reperensya, ipapanengneng na Griegon salita ya nipatalos bilang “abayag ya impantongtong” diad bersikulo 7, ya “nantepet iray elder tan inaral dan maong so isyu.” Malinew ya anggano nandurumaan so opinyon na sarayan brother, mabulos dan imbaga so iisipen tan nalilikna da ed satan ya isyu.

¹⁹ Diad saratan ya mapuersan imbaga nen Pedro, apanonotan so amin ya nen 36 C.E. et wadman ya mismoy Pedro nen alanaan na masanton espiritu iray unonan ag-asegat ya Gentil​—si Cornelio tan say sankaabungan to. Kanian no parehon aawaten nen Jehova iray Judio tan saray aliwan Judio, akin et kontraen itan na totoo? Sakey ni, awaten labat nen Jehova so panagdayew na sakey a too no walay pananisia to ed Kristo, aliwan lapud uunoren toy Mosaikon Ganggan.​—Gal. 2:16.

20. Panon ya “susuboken” na saramay mangipipilit ed panagsegat so Dios?

²⁰ Base ed malinew ya salita na Dios tan ed panguusar toy masanton espiritu to, oniay imbaga nen Pedro: “Akin sirin et susuboken yoy Dios, ya ipapasakbat yod saray disipulo so sakey a pako ya agnayarian a sakbaten na inmuunan atateng tayo odino sikatayo? Balet natan, walaan itayoy pananisia a nilaban itayo ed panamegley na agnaparaan a kaabigan na Katawan a Jesus a singa sikara.” (Gawa 15:10, 11) Diad tua, saramay mangipipilit ed panagsegat et ‘susuboken day Dios,’ odino diad arum a patalos et ‘uupoten day pasensia to.’ Ipipilit da ed saray Gentil so Ganggan ya anggan sikaran Judio et agda met talaga nauunor, kanian asentensiaan ira na ipapatey. (Gal. 3:10) Dapat ingen et misalamat iray Judion ondedengel ed si Pedro lapud agnaparaan ya kaabigan ya impanengneng na Dios ed sikara panamegley nen Jesus.

21. Antoy insalaysay di Bernabe tan Pablo ya akatulong pian makapandesisyon na duga iray apostol tan saray elder?

²¹ Seguradon apaisip iray ondedengel ed si Pedro ta “dinmeen iran amin.” Kayari to, insalaysay di Bernabe tan Pablo iray “dakel a tanda tan pakelaw a ginawa na Dios ed limog na saray nasyon diad panamegley da.” (Gawa 15:12) Natan et sarag lan balansien na saray apostol tan saray elder so amin ya ebidensya tan makapandesisyon la ra base ed panagnonot na Dios nipaakar ed panagsegat.

22-24. (a) Panon ya aaligen na Mananguley ya Ulop natan so mananguley ya ulop nensaman? (b) Panon ya nipanengneng na amin ya elder ya rerespetoen da iray uksoyan na organisasyon?

²² Ontan met natan, kada no manmimiting iray membro na Mananguley ya  Ulop, manpapaigiya ira ed Biblia tan onkekerew iray masanton espiritu diad pikakasi. (Sal. 119:105; Mat. 7:7-11) Pian nibase na Mananguley ya Ulop so desisyon da ed panagnonot na Dios, antis iran manmiting et makakaawat la na agenda so kada membro pian nipikasi to la itan antis dan pantongtongan. (Pro. 15:28) Diad miting da, mabulos tan marespeto ya ibabaga na sarayan alanaan ya brother so walad isip da. Uusaren dan lanang so Biblia no manmimiting ira.

²³ Nepeg itan ya aligen na saray elder ed kongregasyon. No apanmitingan la na saray elder so sakey ya seryoson isyu pero agda itan aresolbe, sarag day onkerew na tulong ed branch office diad lugar da odino diad saray aturon representative, singa saray manangasikaso na sirkito. Tan no kaukolan, nayarin onsulat so branch ed Mananguley ya Ulop.

²⁴ On, bebendisyonan nen Jehova iray onuunor ed uksoyan na organisasyon to ta ipapanengneng dan mapaabeba, matoor, tan maanos ira. Nanengneng tayo diad onsublay ya kapitulo ya no ontan met so gawaen tayo, seguradon ipalikna ed sikatayo nen Jehova so tuan kareenan, onaligwas tayo ed espiritual, tan napansiansia tayoy pankakasakey tayo.