1, 2. (a) Anto ran seryoson tepet so kaukolan ya ebatan na mananguley ya ulop na Kristianon kongregasyon nen unonan siglo? (b) Antoy akatulong pian makapandesisyon ira na duga?

 EKSAYTED la ray apostol tan saray elder ed desisyon ya gawaen da. Wala rad sakey ya kuarto ed Jerusalem, tan nalilikna dan importantin maong itan ya desisyon. Wala ray linmesan seryoson tepet lapud isyu ed panagsegat. Kaukolan ni kasin unoren na saray Kristiano so Mosaikon Ganggan? Kasin mandumaan so pakanengneng nen Jehova ed saray Judion Kristiano tan ed saray Gentil ya Kristiano?

² Dakel lay ebidensyan apantongtongan na saray lalakin mangidadaulo. Apantongtongan da la ray propesiya ed Salita na Dios pati saray anengneng dan patunay ya aawaten la nen Jehova iray Gentil ya Kristiano. Nibaga da lan amin so amta ra nipaakar ed sayan isyu. Kanian magenap la sirin iray ebidensya pian makapandesisyon ira. Tan malinew lad sikara no antoy labay nen Jehova ya gawaen da. Pero unoren kasi na sarayan lalaki so panangigiya na espiritu to?

3. Antoy naaralan tayo ed saray agawa diad Gawa kapitulo 15?

³ Dapat mabiskeg so pananisia na sarayan lalaki tan makpel dan awaten so panangigiya na espiritu. Ompan mas lalo iran busolen na saray lider na Judion relihyon ed sayan desisyon da. Tan ompan ag-itan awaten na arum ya membro na kongregasyon ya mangipipilit ya kaukolan nin unoren so Mosaikon Ganggan. Pero anto kasi gawaen na mananguley ya ulop? Nengnengen tayo. Tan legan tayon aaralen itan, naamtaan tayo met so balibalin paraan da nensaman ya aaligen na Mananguley ya Ulop na Saray Tasi nen Jehova natan. Atan met so aligen tayo no bilang ta walay desisyon odino problema ya arapen tayo bilang Kristiano.

4, 5. Anton propesiya ed Salita na Dios so impanonot nen Santiago?

⁴ Nansalita so disipulon si Santiago ya agi ed ina nen Jesus. a Si Santiago so chairman ed satan ya miting. Diad saray imbaga to, asumaryo  so desisyon ya mapatnag ya apankasakeyan la na grupo. Oniay imbaga nen Santiago ed saray wadman: “Malinlinew ya insalaysay nen Simeon no panon ya aawaten la natan na Dios iray aliwan Judio pian manpili ed sikara na totoon parad ngaran to. Tan mitunosan ed saya iray salita na saray Propeta.”—Gawa 15:14, 15.

⁵ Lapud samay imbaga nen Simeon, odino Simon Pedro, tan ed saray ebidensya ya imbaga di Bernabe tan Pablo, anonotan nen Santiago iray teksto ya makatulong ed saray wadman ya agagi pian natalosan da so labay nen Jehova. (Juan 14:26) Kayarin imbaga nen Santiago ya “mitunosan ed saya iray salita na saray Propeta,” imbaga to may walad Amos 9:11, 12. Satan ya libro et walad Hebreon Kasulatan, ya say tawag nensaman et “saray Propeta.” (Mat. 22:40; Gawa 15:16-18) No imanoen yo, medyo midumaan iray salitan inusar nen Santiago ed saray salitan nabasa tayo ed libron Amos natan, ta nayarin say angibasian to et diad Septuagint, say Griegon patalos na Hebreon Kasulatan.

6. Panon ya akatulong so Salita na Dios pian naamtaan day linawa na Dios?

⁶ Panamegley nen propeta Amos, impasakbay nen Jehova ya onsabi so panaon ya ipaalagey to so “alolong [odino tolda] nen David,” say poli na saray arari ya panlapuan na Mesianikon Panarian. (Eze. 21:26, 27) Kasin ipawil nen Jehova may dati ya say aawaten to labat et say nasyon na saray Judio? Andi. Ibabaga na propesiya ya “saray totoo na amin a nasyon” et maniiba bilang saray “totoon tinawag ed ngaran [na Dios].” Tandaan yo may impaliwawa nen Pedro nipaakar ed Dios: “Parehoy impangipasen tod sikatayo (saray Judion Kristiano) tan ed sikara (saray aliwan Judion mananisia), tan nilinisan toy kapusoan da lapud pananisia ra.” (Gawa 15:9) Labay ton ibaga, linawa na Dios ya parehon natawir na saray Judio tan saray Gentil so Panarian. (Roma 8:17; Efe. 2:17-19) Anggapoy nabasan propesiya ed Biblia ya mangibabagan kaukolan nin manpasegat iray Gentil ya mananisia odino kaukolan da ni magmaliw ya proselita pian natawir da so Panarian.

7, 8. (a) Antoy imbaga nen Santiago? (b) Antoy labay ya ibaga nen Santiago ed satan?

⁷ Malinew iray ebidensya ya walad saray propesiya tan mapuersa so imbaga di Pedro, Bernabe, tan Pablo, kanian oniay kuan nen Santiago: “Kanian say desisyon ko et agla pamproblemaen iramay aliwan Judio ya ontutumbok ed Dios, noagta sulatan tayo ra ya arawian da ray bengatlan adutakan na saray idolo, say seksual a imoralidad, saray abikkel ya ayayep, tan say dala. Ta manlapu la nensaman et naynay a walay mangipupulong nipaakar ed si Moises diad kada syudad, lapud babasaen a maksil iray insulat to diad saray sinagoga kada sabaton.”​—Gawa 15:19-21.

⁸ Diad samay imbaga nen Santiago ya “kanian say desisyon ko,” kasin ipapalikna to so autoridad to bilang chairman na miting kanian dapat sikatoy mandesisyon no antoy gawaen da? Andin balot! Samay Griegon balikas ya impatalos ya “say desisyon ko” et nayari met ya mankabaliksan na “no parad siak” odino “niay opinyon ko.” Ag-idedesisyonan nen Santiago so interon  grupo, noagta ibabaga to labat so posiblin gawaen da base ed saray arengel ton ebidensya tan no antoy ibabaga na Salita na Dios nipaakar ed sayan isyu.

9. Anto ray maong ya resulta na suhestion nen Santiago?

⁹ Maabig kasi may suhestion nen Santiago? On ta inawat itan na saray apostol tan saray elder. Anto ray maong ya resulta? Say sakey et agla ‘manproblema’ odino ‘napairap’ iray Gentil ya Kristiano ta agda la kaukolan ya unoren so Mosaikon Ganggan. (Gawa 15:19) Sakey ni, diad sayan desisyon et arespeto so konsiensia na saray Judion Kristiano ya abaybayag lan ondedengel ed “si Moises” ya “babasaen a maksil iray insulat to diad saray sinagoga kada sabaton.” b (Gawa 15:21) Lapud sayan suhestion nen Santiago, seguradon onapit ed sakey tan sakey iray Judion Kristiano tan saray Gentil ya Kristiano. Tan say sankaimportantian ed amin, seguradon napaliket day Jehova ta imbase da ed linawa to so ginawa dan desisyon. Talagan balibali itan ya paraan na impansolusyon ed sakey ya problema ya aneral lawari ed pankakasakey na amin ya kongregasyon na totoo na Dios. Tan atan so dapat ya aligen na saray Kristianon kongregasyon natan!

10. Panon ya aaligen na Mananguley ya Ulop natan so mananguley ya ulop nen unonan siglo?

¹⁰ Singa abitla ed kapitulo 13, aaligen na Mananguley ya Ulop na Saray Tasi nen Jehova natan so mananguley ya ulop nen unonan siglo. Diad amin ya dedesisyonan da, manpapaigiya met ira ed si Jehova, say Soberano ed interon uniberso, tan ed si Jesu-Kristo, say Ulo na kongregasyon. c (1 Cor. 11:3) Panon dan gagawaen itan? Oniay impaliwawa nen Albert D. Schroeder, ya nagmaliw ya membro na Mananguley ya Ulop manlapud 1974 ya anggad sampot na impanbilay to diad dalin nen Marso 2006: “Manmimiting so Mananguley ya Ulop kada no Mierkoles, igagapo da itan ed pikakasi pian kerewen so panangigiya na espiritu nen Jehova. Seseguroen da ya amin ya pantotongtongan da tan amin ya desisyon da et base ed Salita na Dios, say  Biblia.” Ontan met, diad graduation na koma-101 ya klase na Watchtower Bible School of Gilead, walay importantin intepet ed sikara nen Milton G. Henschel, sakey ya abayag ya membro na Mananguley ya Ulop ya anampot so bilay to diad dalin nen Marso 2003. Oniay intepet to: “Wala ni kasi arum ya organisasyon ed dalin ya say Mananguley ya Ulop to et onkokonsulta ed Salita na Dios, say Biblia, antis ya manggawa na saray importantin desisyon?” Amta tayo lay ebat.

11. Panon ya impasabi na mananguley ya ulop so desisyon da ed saray kongregasyon?

¹¹ Walay pankakasakey na mananguley ya ulop ed Jerusalem nen nandesisyon ira nipaakar ed isyu ed panagsegat. Pero pian mankakasakey met ya unoren na amin ya agagi ed kongregasyon itan ya desisyon da, kaukolan dan ipasabi itan ed malinew, positibo, tan makapaseseg ya paraan. Panon dan gawaen itan? Oniay nabasa tayo: “Nandesisyon iray apostol tan saray mamatatken pati say interon kongregasyon a mangibaki ra na pinilin lalaki ed limog da ya onlad Antioquia, a kaiba nen Pablo tan Bernabe; imbaki ray Judas a tinawag a Barsabas tan si Silas, a lalakin mangidadaulo ed saray agagi.” Angiparaan met iray sulat tan impawit da itan ed sarayan lalaki pian ibasa da ed amin ya kongregasyon ed Antioquia, Sirya, tan Cilicia.​—Gawa 15:22-26.

12, 13. Antoy maabig ya resulta (a) lapud imbaki day Judas tan Silas? (b) lapud angipawit iray sulat?

¹² Si Judas tan Silas et “lalakin mangidadaulo ed saray agagi,” kanian kualipikado iran mangirepresenta ed mananguley ya ulop. Ipalinew na sarayan apatiran lalaki ya say mensahen awit da et aliwa labat ya basta ebat ed samay isyu ed panagsegat, noagta balo iyan instruksion manlapud mananguley ya ulop. Makatulong irayan “pinilin lalaki” pian magmaliw ya maapit so relasyon na saray Judion Kristiano ya walad Jerusalem tan saray Gentil ya Kristiano ya walad saray kongregasyon. Talagan balibali tan maar-aron uksoyan itan! Seguradon akatulong itan pian niwalay kareenan tan pankakasakey ed totoo na Dios.

¹³ Angiter na malinew ya direksion so sulat no antoy dapat ya gawaen na saray Gentil ya Kristiano nipaakar ed panagsegat, tan no antoy dapat dan gawaen pian naawat day pabor tan bendisyon nen Jehova. Niay importantin parte na sulat: “Tinulongan kami na masanton espiritu pian makapandesisyon kami ya agla aruman so sasakbaten yo, nilikud ed sarayan nakaukolan: ya itultuloy yon arawian iray bengatlan imbagat ed saray idolo, say dala, saray abikkel ya ayayep, tan say seksual ya imoralidad. No maalwar yon paliisan irayan bengatla, onaligwas kayo. Mansiansian maabig komon so kipapasen yo!”​—Gawa 15:28, 29.

14. Panon ya mankakasakey iray totoo nen Jehova natan anta naapag-apag iray totoo ed mundo?

¹⁴ Natan, nankakasakey ed pananisia tan gawa iray Tasi nen Jehova, ya say  bilang da et masulok lan 8,000,000 diad masulok ya 100,000 ya kongregasyon ed interon mundo. Panon tayon nagagawaan itan anta magulogulo tan naapag-apag iray totoo ed mundo natan? Walay pankakasakey tayo ta malinew tan mapuersa so instruksion ya iiter nen Jesu-Kristo, say Ulo na kongregasyon, diad panamegley na “matoor tan makabat ya aripen,” say Mananguley ya Ulop. (Mat. 24:45-47) Wala met so pankakasakey tayo ta akaparaan ya onunor ed instruksion na Mananguley ya Ulop iray agagi ed interon mundo.

15, 16. Antoy reaksion na saray agagi ed instruksion ya nanlapu ed mananguley ya ulop, tan akin?

¹⁵ No ituloy tayon basaen so Gawa, naamtaan tayo ya nen kasabid Antioquia na apatiran lalaki ya nanlapud Jerusalem, “tinipon day dakel a disipulo tan inter dad sikara so sulat.” Antoy reaksion na saray agagi ed instruksion ya nanlapud mananguley ya ulop? “Kayari ran binasa [so sulat], aliketan ira ed panamaseseg.” (Gawa 15:30, 31) Insan “pinaseseg [di Judas tan Silas] iray agagi ed panamegley na dakel a paliwawa tan pinabiskeg da ra.” Lapud satan ya ginawa ra, nibagan “propeta” ira ya singa met si Bernabe, Pablo, tan arum ni ran tinawag ya propeta, ta ontutukoy so salitan propeta ed saray totoon mangipapaamta ed linawa na Dios.​—Gawa 13:1; 15:32; Exo. 7:1, 2.

¹⁶ Sankanengneng ya benendisyonan nen Jehova so desisyon na mananguley ya ulop pian nasolusyonan so isyu. Akin et maabig so resulta? On ta malinew tan nipanpanaon so instruksion na mananguley ya ulop, ya nibase ed Salita na Dios tan ed panangigiya na masanton espiritu. Tan sakey ni, maar-aro so paraan na impangipasabi da ed saray desisyon da diad saray kongregasyon.

17. Antoy pamparehoan na saray manangasikaso na sirkito natan ed si Pablo, Bernabe, Judas, tan Silas?

¹⁷ Atan so aaligen na Mananguley ya Ulop na Saray Tasi nen Jehova no mangiiter iray nipanpanaon ya instruksion ed saray agagi ed interon mundo. No manggagawa ray desisyon, malinew tan direkta dan ipapasabi iratan ed saray kongregasyon. Say sakey ya paraan et say ibibisita na manangasikaso na sirkito. Manbiabiahe irayan masakripisyon agagi paonlad saray kongregasyon pian mangiter na malinew ya instruksion tan maaron panamaseseg. Singa si Pablo tan Bernabe, dakel so uusaren dan panaon ed ministeryo, ‘manbabangat ira tan ipupulong day maong a balita nipaakar ed salita nen Jehova a kaiba so dakel ya agagi.’ (Gawa 15:35) Tan singa si Judas tan Silas, papasesegen tan papabiskegen da “iray agagi ed panamegley na dakel a paliwawa.”

18. Antoy kaukolan ya gawaen na totoo na Dios pian tuloytuloy dan naawat so bendisyon nen Jehova?

¹⁸ Diad saray kongregasyon natan ey? Akin et wala nin siansiay kareenan tan pankakasakey na saray kongregasyon ed interon dalin anta naapag-apag iray totood mundo? No nanonotan yo, wala may insulat na disipulon si Santiago ya, “Balet say karunongan a manlalapud tagey, unona ed amin et malinis,  insan mareen, makatunongan, akaparaan ya ontulok . . . Niarum ni, say bunga na inkatunong et intanem diad mareen iran kipapasen parad saramay mikakareenan.” (Sant. 3:17, 18) Agtayo amta no kasin sankanonot nen Santiago imay agawan miting ed Jerusalem nen insulat to irayan salita. Pero base ed naaralan tayo ed Gawa kapitulo 15, naawat ti labat so bendisyon nen Jehova no mankakasakey tayo tan unoren tayo iray instruksion na saray mangidadaulo.

19, 20. (a) Panon ya mas sankanengneng so pankakasakey tan kareenan diad kongregasyon ed Antioquia kayari dan inawat so desisyon na mananguley ya ulop? (b) Anto lay sarag ya gawaen di Pablo tan Bernabe?

¹⁹ Mas sankanengneng lay kareenan tan pankakasakey diad kongregasyon ed Antioquia. Imbes ya kontraen na saray agagin tagad Antioquia iray agagin nanlapud Jerusalem, misalsalamat irad imbisita nen Judas tan Silas. Oniay nabasa tayo: “Kayari na aganon impanayam diman, pinasipot ira na saray agagi tan pinirawat dan makapawil iran mareen ed saramay angibaki ed sikara (saray agagi ed Jerusalem).” d (Gawa 15:33) Seguradon malikeliket met iray agagin tagad Jerusalem nen angistorya lay Judas tan Silas ed impanbiahe ra. Lapud agnaparaan ya kaabigan nen Jehova, maliket dan agawaan so asainmin da.

²⁰ Atilak si Pablo tan Bernabe ed Antioquia, tan natan et makapanpokus la ra ed pangidaulo da ed panagpulong a kimey ya singa met gagawaen na saray manangasikaso na sirkito no ombibisita ra ed saray kongregasyon. (Gawa 13:2, 3) Talagan bendisyon ira parad saray totoo nen Jehova! Pero panon ya mas inusar ni nen Jehova irayan duaran maseseg ya ebanghelisador? Nengnengen tayo ed onsublay ya kapitulo.