1-6. Mangibaga na sakey ya eksperiensya na saray Tasi ya manpupulong diad nanduruman situasyon.

 SI Rebecca, sakey ya kabataan ya Tasi nen Jehova ed Ghana, et ginawa ton personal ya teritorya so eskuelaan da. Lanang ya walay akakarga ed bag to ya literaturan nibase ed Biblia. Kada no break-time da, samboten ton pulongan iray kapara ton estudyante. Wala ray pigaran classmate nen Rebecca ya agapoan ton iyaralan na Biblia.

² Diad isla na Madagascar, ya asingger ed bandad east na Africa, walay duaran payunir ya lanang ya manaakar na manga 25 kilometro anggano ampetapetang pian makasabi rad sakey ya arawrawin baryo. Wala dimay pigaran interesado ya iyaaralan da na Biblia.

³ Pian nasabi na saray Tasi ed Paraguay iray totoon manaayam ed gilig na saray ilog na Paraguay tan Paraná, nanggawa ray baloto ya kaiba iray volunteer ya nanlapud 15 ya nanduruman bansa. Nayarin onlugan so anggad 12 ya totoo ed sayan balbaleg ya baloto. Diad tulong na sayan baloto, nipupulong na saray makukulin agagi tayo so maong a balita ed saray pasen ya mair-irap ya nasabi.

⁴ Diad Alaska, sasamboten na saray Tasi so nikadkaduman pankanawnawa ya manpulong legan na summer ta dakdakel so turista ya onsasabi. Nandurumay lahi na sarayan bisita ya akalugan ed saray barko. Kanian diad daongan et wala ray manpa-public witnessing tan idi-display da ray literatura ed nanduruman lenguahe. Diad satan met lanlamang ya lugar, mausa-usar met so eroplano pian nasabi iray ararawin baryo, kanian makakasabi so maong a balita ed saray totoon Aleut, Athabascan, Tsimshian, tan Tlingit.

⁵ Espisyal so teritorya nen Larry ya tagad Texas, U.S.A., ta ginawa ton teritorya so nursing home ya panaayaman to. Anggano aka-wheelchair lay Larry lapud impaka-aksidente to, lanang ya manaanap na pankanawnawan manpulong. Ibabaga tod arum so mensahe na Panarian, pati say nibase ed Biblia ya ilalo to ya makaakar lamet no manuley lay Panarian.​—Isa. 35:5, 6.

 ⁶ Taloy agew ya manbiabiahe panamegley na ferryboat so sakey ya grupo na saray Tasi ya tagad Mandalay pian makaatendi irad asemblea diad bandad norte na Myanmar. Labalabay dan ipulong so maong a balita kanian mangaawit iray literatura ya base ed Biblia tan iyoopresi da iratan ed saray kapara dan pasahero. Kada no ontunda so ferryboat ed sakey ya baley odino baryo, oneepas ya tampol irayan maligligsan agagi tan oopresian da na literatura iray totoo. Legan dan gagawaen itan, wala ray balon pasahero ya onlulugan, kanian kapawil na agagi ed ferryboat, wala lamet so balon pulongan da.

7. Panon ya ipupulong na saray mandadayew ed si Jehova so Panarian na Dios, tan antoy gagala da?

⁷ Singa saray agagin abitla ed sarayan alimbawa, ‘sigpot ya mantatasi nipaakar ed Panarian na Dios’ iray maseseg ya mandadayew ed si Jehova diad interon mundo. (Gawa 28:23) Manpupulong ira ed kaabungan, aasinggeran da ray totoo ed gilig na dalan, susulatan da ra, tan tatawagan da ra ed telepono. Pursigido ira ya mananap na pankanawnawan ipulong so Panarian na Dios, balanglan no akalugan ira ed bus, manaakar ira ed park, odino legan na break-time ed trabaho ra. Nayarin nanduruma so paraan da, pero pareho labat so gagala da​—pian nipulong so maong a balita inerman so kawalaan na totoo.​—Mat. 10:11.

8, 9. (a) Akin et singa milagro ya nipupulong so Panarian na Dios diad interon mundo? (b) Antoy nitepet tayo, tan akin et kaukolan tayon naamtaan so ebat?

⁸ Sikayo ey, kasin kaiba kayo ed dakdakel ya aktibon mangipupulong ed Panarian diad masulok lan 235 ya dalin? No on, makakatulong kayo ed kimey ya pangipulong ed Panarian diad interon mundo! Singa milagro so nagagawaan na saray totoo nen Jehova diad interon mundo. Anggano wala ray mairap ya subok​—singa say pangisesebel na saray gobierno ed kimey tayo tan say direktan panamasegsegang—​siansia nin impasyan ipupulong na saray Tasi nen Jehova so Panarian na Dios ed saray totoo ed amin ya nasyon.

⁹ Pero say tepet, Akin et anggapoy makapanpatunda ed pangipupulong tayo ed Panarian anggano wala ray makasbel, tan anggano manggagawa ni ingen na paraan si Satanas pian napatunda itan? Pian naebatan itan, pawilen tayo ray agawa nen unonan siglo C.E. Tutal, itutuloy labat na saray Tasi nen Jehova natan so kimey ya ginmapo ed saman.

10. Anton kimey so pinasya nen Jesus, tan antoy amta to nipaakar ed satan?

¹⁰ Si Jesu-Kristo so angigapo ed Kristianon kongregasyon, tan pinasya ton impulong so maong a balita na Panarian na Dios; atan so sankaimportantian ed bilay to. Aminsan et oniay imbaga to: “Kaukolan ko met ya iyabawag ed arum a syudad so maong a balita na Panarian na Dios, ta saya so angibakian ed siak.” (Luc. 4:43) Amta nen Jesus ya agto nasumpal iyan kimey ya igagapo to no bukor to labat. Nen asingger lay ipatey to, imbaga to ya say mensahe na Panarian et ipulong diad “amin a nasyon.” (Mar. 13:10) Balet panon itan ya ipulong, tan siopay manggawa ed satan?

11. Anton importantin kimey so inter nen Jesus ed saray disipulo to, tan antoy ontulong ed sikara pian nagawaan da itan?

 ¹¹ Kayari na impatey tan inkioli nen Jesus, nampanengneng ed saray disipulo to tan inter tod sikara iyan importantin kimey: “Onla kayo sirin tan ibangat yo iray totoo ed amin a nasyon pian magmaliw iran disipulok, a bautismoan yo ra ed ngaran na Ama tan ed ngaran na Anak tan ed ngaran na masanton espiritu, ya ibangat yo ran mangunor ed amin ya ingganggan kod sikayo. Tan wala ak ed sikayo ed amin ya agew anggad kaunoran a parte na sistema na mundo.” (Mat. 28:19, 20) Ipapanengneng na saray salitan “wala ak ed sikayo” ya suportaan nen Jesus iray disipulo to ed kimey ya panagpulong tan panagbangat. Kailangan da itan ya suporta ta impasakbay nen Jesus ya ‘busolen ira na amin a nasyon.’ (Mat. 24:9) Tan amta na saray disipulo ya wala ni arum ya ontulong ed sikara, ta antis ya onsegep ed tawen si Jesus, imbaga tod sikara ya pabiskegen ira na masanton espiritu pian makapanpulong ira anggad “sankaarawian a pasen na dalin.”​—Gawa 1:8.

12. Anto ray nayarin nitepet tayo, tan akin et importantin naamtaan tayo iray ebat?

¹² Balet ompan nitepet tayo: Talaga kasin amasya ed sayan kimey iray apostol nen Jesus tan arum nin disipulo to nen unonan siglo? Kasin impasyan impulong na sarayan dagdaiset ya Kristianon lalaki tan bibii so Panarian na Dios, anggano maruksa iran pinasegsegang? Talaga kasin tinulongan ira nen Jehova tan na masanton espiritu to ed sayan kimey a panagbangat? Naebatan irayan tepet tan arum ni ed libro na Biblia ya Gawa. Importante ya naamtaan tayo iray ebat. Akin ey? Ta im-promise nen Jesus ya sayan inter ton kimey et mantultuloy “anggad kaunoran a parte na sistema na mundo.” Kanian gawaen iyan kimey na amin ya tuan Kristiano, kaiba la ray manbibilay ed sayan panaon na anggaan. Interesado tayo sirin ed saray agawa nensaman ya akasulat ed libro na Gawa.

13, 14. (a) Siopay angisulat ed libro na Gawa, tan iner so angalaan to na impormasyon? (b) Antoy karga na libro na Gawa?

¹³ Siopay angisulat ed libro na Gawa? Agnabasa ed mismon libro no siopay angisulat ed satan, balet mapatpatnag ed saray unonan salita ditan ya say angisulat ed Gawa et sikato lanlamang may angisulat ed Ebanghelyo nen Lucas. (Luc. 1:1-4; Gawa 1:1, 2) Kanian manlapu la nensaman, papanisiaan ya say angisulat ed Gawa et si Lucas, sakey ya “inad-aron doktor” tan maal-alwar ya historian. (Col. 4:14) Nabasa ed libro iray agawa ed loob na 28 ya taon, manlapu lad insegep nen Jesus diad tawen nen 33 C.E. ya anggad sampot na impakapriso nen apostol Pablo ed Roma nen manga 61 C.E. Diad dakel ya salaysay nen Lucas et ipipila toy sarili to, labay ton ibaga et wadman ya mismo ed saraman ya agawa. (Gawa 16:8-10; 20:5; 27:1) Maal-alwar met ya nan-research si Lucas kanian seguradon inamta to ni ed si Pablo, Bernabe, Felipe, tan ed arum ni no anton talagay agawa.

¹⁴ Antoy karga na libro na Gawa? Diad Ebanghelyo nen Lucas ya akauna ton insulat, nabasa iray imbaga tan ginawa nen Jesus. Balet diad libro na Gawa, impaamta nen Lucas iray imbaga tan ginawa na saray papatumbok nen Jesus.  Kanian say libro na Gawa et nipaakar ed saray totoo ya nanggawa na nikadkaduma iran kimey, anggano dakel ed sikara et impasen na arum ya ‘abebay-aral tan ordinaryon totoo’ labat. (Gawa 4:13) Diad antikey, naamtaan tayo ed sayan impuyan ya libro no panon ya ginmapo so Kristianon kongregasyon tan no panon itan ya binmaleg. Nanengneng tayo met ed Gawa so impanpulong na saray Kristiano nen unonan siglo​—saray paraan da tan no antoy nalilikna da ed satan ya kimey. (Gawa 4:31; 5:42) Idadanet diad libro na Gawa so lanang ya itutulong na masanton espiritu pian nipulong so maong a balita diad nanduruman pasen. (Gawa 8:29, 39, 40; 13:1-3; 16:6; 18:24, 25) Idadanet met na Gawa so tema na Biblia​—no panon ya napasanto so ngaran na Dios panamegley na Panarian to ya uleyan na Kristo. Nanengneng met ditan no panon ya impulong na saray disipulo so mensahe na Panarian anggano dakdakel so kinmontra ed sikara.​—Gawa 8:12; 19:8; 28:30, 31.

15. Panon tayon nagunggonaan no aralen tayo so libro na Gawa?

¹⁵ Eksayting tan talagan ombiskeg so pananisia tayo no aralen tayoy libro na Biblia ya Gawa! No isipen tayoy inkakpel tan inkaseseg na saray papatumbok na Kristo nensaman, talagan naapresya tayo ray sagpot da. Seguradon labay tayon aligen so pananisia na saray agagi tayo nen unonan siglo. Lapud satan, mas akaparaan tayon gawaen so kimey tayo ya ‘onla tan ibangat iray totoo.’ Ginawa iyan publikasyon ya babasaen yo natan pian natulongan kayon aralen ya maong so libro na Gawa.

16. Antoy taloran gagala na sayan publikasyon?

¹⁶ Anton talagay gagala na sayan publikasyon? Walay talora: (1) pian pabiskegen so tiwala tayo ya uusaren nen Jehova so masanton espiritu to pian suportaan so pangipulong ed Panarian tan say kimey ya panagbangat, (2) pian mas lalo tayon onseseg ed ministeryo no aralen tayoy alimbawa na saray papatumbok na Kristo nen unonan siglo, tan (3) pian onaralem so respeto tayo ed organisasyon nen Jehova tan ed saray mangidadaulo ed panagpulong a kimey tan ed saray mangaasikaso ed saray kongregasyon.

17, 18. Panon ya inorganisa iray impormasyon ed sayan publikasyon, tan anto ni ray makatulong ya feature to?

¹⁷ Panon ya inorganisa iray impormasyon ed sayan publikasyon? Napansin yo ya naapag iya ed waloran seksion, pantongtongan ed kada seksion so sakey ya parte na libro na Gawa. Say gagala na saray kapitulo balet et aliwan pian ipaliwawa so kada bersikulo na Gawa, noagta pian papawayen iray leksion ya naaralan ed saray salaysay ed satan ya libro na Biblia. Tan natulongan itayon nanengneng no panon tayon iyaplika iratan. Diad gapo na kada kapitulo, nabasa so pinagkatema na satan ya kapitulo tan ipapanengneng na teksto ed leksab to no anton parte na libro na Gawa so pantongtongan.

¹⁸ Wala ni ray arum ya feature na sayan publikasyon ya makatulong ed personal ya panag-aral yo na Biblia. Makatulong iray balibalin artwork pian  naimadyin yo iray agawa ed libro na Gawa legan yon dadalepdepen so salaysay na Biblia. Nanengneng ed dakel ya kapitulo iray kahon ya mangiiter na kaaruman iran impormasyon. Wala met iray kahon ya pakabasaan tayoy impormasyon nipaakar ed sakey ya karakter na Biblia ya say pananisia to et balibalin aligen. Say arum balet ya kahon et wala ray karga ton kaaruman ya detalye nipaakar ed saray lugar, agawa, kustombre, odino arum nin karakter ya abitla ed Gawa.

19. Panon tayon sagpaminsan ya nausisa so sarili tayo?

¹⁹ Makatulong iyan publikasyon pian nausisa yon maong so sarili yo. Anggan panon kabayag kayo lan manlilingkor bilang manangipalapag na Panarian, maabig no sagpaminsan et usisaen yo no antoy iyuuna yo ed bilay yo tan no antoy nalilikna yo ed Kristianon ministeryo. (2 Cor. 13:5) Tepetay sarili yo: ‘Kasin anggad natan et manuna ni ed bilay ko so ministeryok? (1 Cor. 7:29-31) Kasin maligligsa tan masetseseg kon ipupulong so maong a balita? (1 Tes. 1:5, 6) Kasin mamapasya ak ed kimey ya panagpulong tan panagbangat?’​—Col. 3:23.

20, 21. Akin et apuraan la so kimey tayo natan, tan antoy dapat ya determinasyon tayo?

²⁰ Lanang tayon tandaan ya naikdan itayo na importantin kimey​—say pampulong tan pambangat. Diad kada agew ya onlalabas, mas kaukolan ya maganat tayo lan sumpalen itan ya kimey. Manasingger lan manasingger so anggaan na sayan sistema na mundo. Kanian mas kakkaukolan natan ya pulongan iray totoo pian makaliktar ira. Agtayo amta no pigara ni walaan na dugan kipapasen na puso so ondengel ed mensahe tayo. (Gawa 13:48) Pero responsabilidad tayo ya tulongan ira legan ya wala ni panaon.​—1 Tim. 4:16.

²¹ Importante sirin ya aligen tayoy alimbawa na saramay maseseg ya angipulong na Panarian nen unonan siglo. Legan yon aaralen iyan publikasyon, isip yo no panon kayon magmaliw ya mas maseseg tan mas makpel ya manpulong. Tan komon ta napabiskeg so determinasyon yo ya ‘sigpot a mantasi [odino manpulong] nipaakar ed Panarian na Dios.’​—Gawa 28:23.