1-3. Anton pasingawey so anengneng nen Pedro, tan akin et kaukolan tayon natalosan so labay ya ibaga na satan?

 AGAWA iya ed taon 36 C.E. Nasisinagan na agew si Pedro legan ya manpipikasi diad toktok na sakey ya abung ya asingger ed dayat, diad daongan a syudad na Joppe. Pigaran agew lan miaayam si Pedro ed satan ya abung. Sankanengneng ya anggapoy panangidumaduma to ta pinmayag ya miayam ditan. Say akanggawad satan ya abung et si Simon, ya say trabaho to et managkurti na katat. Aliwan amin ya Judio et ompayag ya miayam ed toon ontan so trabaho to. a Pero anggano balibali la itan ya ugali nen Pedro, wala nin siansiay naaralan to ed agpanangidumaduma nen Jehova.

² Legan ya manpipikasi si Pedro, akanengneng na pasingawey. Seguradon nabigla so anggan siopan Judio ed saray anengneng tod satan ya pasingawey. Walay singa ules a linen ya onleleksab manlapud tawen, tan walay karga ton ayayep ya marutak base ed Ganggan. Insan walay boses ya manlapud tawen ya angibagad si Pedro ya mamakger tan mangan, pero inmebat si Pedro: “Agak nin balot angan na antokaman a marutak.” Aliwa labat ya aminsan noagta amitlon imbagad sikato na boses ya: “Agmo la tatawagen a marutak iray nilinisan la na Dios.” (Gawa 10:14-16) Awetwet si Pedro ed satan ya pasingawey pero atalosan to lanlamang.

³ Antoy labay ya ibaga na pasingawey ya anengneng nen Pedro? Importantin natalosan tayo itan ta ditan tayo naaralan no antoy pakanengneng nen Jehova ed saray totoo. Bilang tuan Kristiano, agtayo napasyan ipulong so Panarian na Dios no agtayo aligen so pakanengneng na Dios ed saray totoo. Pian natalosan tayoy pasingawey ya anengneng nen Pedro, kaukolan tayon naamtaan iray agawa antis tan kayari to ’tan.

4, 5. Siopa si Cornelio, tan antoy agawa legan ya manpipikasi?

⁴ Ag-amta nen Pedro ya antis na satan ya agew, akaawat met na pasingawey manlapud Dios so sakey a lakin manngaray Cornelio ya tagad Cesarea, ya manga 50 kilometro so kaarawi to diad bandad norte. Si Cornelio et sakey a senturion na Romanon armada, balet “matakot ed Dios.” b Maong met ya ulo na pamilya ta “say interon sankaabungan to et matakot ed Dios.” Aliwan Judion proselita si Cornelio noagta sakey ya ag-asegat ya Gentil, balet makasi ed saray Judion mairap so bilay da tan iikdan to ray regalo odino kuarta. Aliwan kunkunwari so ugali na sayan laki tan “naynay a mikakasi ed Dios.”​—Gawa 10:2.

⁵ Nen manga alas-3 na ngarem, manpipikasi si Cornelio tan anengneng tod pasingawey so sakey ya anghel ya angibagad sikaton: “Saray pikakasim tan saray regalom lapud panangasi et sinmabi ed Dios bilang sakey a pakanodnonotan.” (Gawa 10:4) Imbaga na anghel ed si Cornelio ya mangibaki na saray lalaki pian ipatawag si apostol Pedro. Bilang ag-asegat ya Gentil, si Cornelio so sankaunaan ya aliwan Judio ya nagmaliw ya Kristiano. Asingger to lan naawat so mensahe ya mangiligtas ed sikato.

6, 7. (a) Mangibaga na eksperiensya ya mangipapanengneng ya eebatan na Dios so pikakasi na saramay talagan manaanap na katuaan nipaakar ed sikato. (b) Antoy nibaga tayo ed ontan iran eksperiensya?

⁶ Eebatan met kasi na Dios natan so pikakasi na saramay talagan manaanap na katuaan nipaakar ed sikato? Imanoen iyan alimbawa: Inawat na sakey ya biin tagad Albania so sakey ya isyu na Say Panag-bantayan ya walay artikulo ton nipaakar ed pamabaleg na ananak. c Imbaga tod samay Tasin binmisita ed sikato: “Ompan agkayo makapanisia ya manpipikasi ak ed Dios ya tulongan to ak komon ed pamapabaleg kod ananak ko, insan to kayo imbaki dia! Asabi  yoy pusok, aya may talagan aanapen ko!” Ginmapon nampaiyaral na Biblia imay bii tan saray ananak to, insan sinmabi panaon ya nampaiyaral met so asawa to.

⁷ Kasin nibanbana labat itan? Andin balot! Aminpiga tayo lan akarengel na ontan ya eksperiensya diad interon mundo​—diad tua, dakdakel la kanian imposiblin nibanbana labat. Anto sirin so nibaga tayod satan ey? Unona, eebatan nen Jehova so pikakasi na saramay talagan manaanap ed sikato. (1 Ara. 8:41-43; Sal. 65:2) Komadua, igigiya na saray anghel so panagpulong tayo.​—Apo. 14:6, 7.

8, 9. Antoy impaamta na espiritu ed si Pedro, tan antoy ginawa nen Pedro?

⁸ Wala nid toktok na abung si Pedro tan “nawewetwet ni” no anto kasi labay ya ibaga na pasingawey ya anengneng to, insan biglan sinmabi iray mensaheron imbaki nen Cornelio. (Gawa 10:17) Mila kasi Pedro ed sarayan lalaki tan onloob ed abung na sakey ya Gentil anta amitlo to lan imbaga ya agto labay so mangan na anggan anton naakan ya ipapasen ya marutak base ed Ganggan? Tinulongan na masanton espiritu si Pedro pian naamtaan to no antoy labay na Dios ya gawaen to. Imbagad sikato na espiritu: “Walay taloran lalaki a manaanap ed sika. Alagey ka, lasur ka tan mila kad sikara, ya agkan balot manduaruwa, ta imbakik ira.” (Gawa 10:19, 20) Seguradon akatulong may pasingawey nipaakar ed singa ules a linen pian mabulos ya manpaigiya si Pedro ed masanton espiritu.

⁹ Nen naamtaan nen Pedro ya anghel manayay angiganggan ed si Cornelio ya ibaki irayan lalaki, “pinaloob tan sinangkaili to ra.” (Gawa 10:23a) Ginapoan la nen Pedro ya umanen so panagnonot to pian naunor toy linawa na Dios.

10. Panon ya igigiya nen Jehova iray totoo to, tan anto ray maabig ya itepet tayod sarili tayo?

¹⁰ Anggad natan et tutulongan ni nen Jehova iray totoo to pian kalkalna dan natalosan so linawa to. (Pro. 4:18) Uusaren toy masanton espiritu to pian igiya so “matoor tan makabat ya aripen.” (Mat. 24:45) No maminsan, wala ray naaawat tayon pananguman ed pakatalos tayo ed Salita na Dios odino pananguman ed saray paraan ya gagawaen tayo bilang organisasyon. Maabig no itepet tayod sarili tayo: ‘Akaparaan ak kasin umanen so panagnonot ko? Akaparaan ak kasin manpaigiya ed espiritu na Dios?’

11, 12. Antoy ginawa nen Pedro kasabi tod Cesarea, tan antoy naaralan to?

¹¹ Diad tinmumbok ya agew, linmad Cesarea si Pedro tan walay siameran kaiba to​—samay taloran mensahero ya imbaki nen Cornelio tan “anemiran [Judion] agagi” ya nanlapud Joppe. (Gawa 11:12) Amta la nen Cornelio ya onsabi Pedro kanian “tinipon to ray kakanayon to tan maapit a kakaaro to”​—tan seguro, amin da et Gentil. (Gawa 10:24) Kasabi nen Pedro, agawaan toy sakey a bengatlan dati et agton balot nagawaan: Linmoob si Pedro ed abung na ag-asegat ya Gentil! Oniay imbaga tod sikara: “Amta yon aliwan manepeg ed sakey a Judio so miulop  odino onasingger ed sakey a toon sananey so rasa to, balet impanengneng ed siak na Dios ya agko nepeg a tawagen a marutak so siopaman a too.” (Gawa 10:28) Diad saya et atalosan la nen Pedro ya aliwa labat ya nipaakar ed saray naakan ya sarag ton kanen imay pasingawey ya anengneng to. Noagta ‘agto nepeg ya tawagen a marutak so siopaman a too,’ anggan saray Gentil.

¹² Akaparaan lan ondengel ed si Pedro so amin ya walad abung nen Cornelio. Imbaga nen Cornelio: “Wadia kamin amin natan pian dengelen so amin a papaibaga nen Jehova.” (Gawa 10:33) Anto kasi nalikna yo no narengel yo itan ed sakey ya interesado? Oniay mapuersa ya imbaga nen Pedro: “Natatalosan ko la natan ya anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.” (Gawa 10:34, 35) Naaralan nen Pedro ya ag-akadepende ed lahi, bansan nanlapuan, odino itsura na totoo so pakanengneng na Dios ed sikara. Kanian impulong ed sikara nen Pedro so ministeryo nen Jesus, say impatey to, tan say inkioli to.

13, 14. (a) Antoy importantin agawa nen nagmaliw ya Kristiano si Cornelio tan saray arum nin Gentil nen 36 C.E.? (b) Akin et agtayo dapat huhusgaan iray totoo base ed itsura da?

¹³ Insan walay agawa ya agnin balot agawa nensaman: ‘Legan ya mansasalitay Pedro,’ nikalbo so masanton espiritu ed “saray aliwan Judio.” (Gawa 10:44, 45) Aya labat so nabasad Biblia ya nikalbo so masanton espiritu antis na bautismo. Alikas nen Pedro ya inawat la ra na Dios ya manlingkor ed Sikato, kanian “ingganggan to [iyan grupo na saray Gentil ya] manpabautismo.” (Gawa 10:48) Nen nagmaliw ya Kristiano irayan Gentil nen 36 C.E., anampot la may panaon ya espisyal so turing na Dios ed saray Judio. (Dan. 9:24-27) Diad saya et inusar la nen Pedro so komatlo tan sampot lan “tombok na Panarian.” (Mat. 16:19) Lapud sayan tombok, nayari lan magmaliw ya alanaan a Kristiano iray ag-asegat ya Gentil.

¹⁴ Legan tayon ipupulong so Panarian natan, amta tayo ya “say Dios et anggapoy lalabien to.” (Roma 2:11) Linawa to ya “niliktar so amin a klase na totoo.” (1 Tim. 2:4) Kanian agtayo dapat huhusgaan iray totoo base ed itsura da. Say kimey tayo et mamasyan ipulong so Panarian na Dios, tan kaibad satan so pampulong ed amin ya totoo, anggan antoy lahi da, bansan nanlapuan, itsura, odino relihyon da.

15, 16. Akin et mansyodot ed si Pedro so arum ya Judion Kristiano, tan panon ton impaliwawa so ginawa to?

¹⁵ Seguradon eksayted lay Pedro ya mangibalita ed saray agawa kanian linmad Jerusalem. Balet akauna lay balita ya “inawat met la na saray [ag-asegat ya] aliwan Judio so salita na Dios.” Kanian kasabi nen Pedro, “binalaw na saray manusuporta ed panagsegat.” Mansyodot irad sikato ta ‘linmoob ed abung na totoon ag-asegat tan akirungo ed sikara.’ (Gawa 11:1-3) Ayos labat ed saray Judion Kristiano no magmaliw ya papatumbok na Kristo iray Gentil. Balet say  isyu et pipiliten da ray Gentil ya ontumbok ed Mosaikon Ganggan, kaiba lay pampasegat, pian awaten kuno nen Jehova so panagdayew da. Malinew ya wala ray Judion disipulo ya naiirapan nin onikban ed Ganggan.

¹⁶ Panon ya ipaliwawa nen Pedro no akin ya binautismoan to iraman ya aliwan Judio? Diad Gawa 11:4-16, imbaga toy apatiran rason no akin ya kombinsido ya linawa iman na Dios: (1) amay anengneng ton pasingawey ya nanlapud Dios (Bersikulo 4-10); (2) amay imbagad sikato na espiritu (Bersikulo 11, 12); (3) amay imbisita na anghel ed si Cornelio (Bersikulo 13, 14); tan (4) amay nen nikalbo so masanton espiritu ed saray Gentil. (Bersikulo 15, 16) Sinampotan nen Pedro so imbaga to diad sakey ya mapuersan tepet: “Kanian no inter na Dios ed sikara (saray Gentil ya nagmaliw ya Kristiano) so ontan met a regalo (say masanton espiritu) a singa inter tod sikatayo (saray Judio) ya anisia ed Katawan a Jesu-Kristo, siopa ak a sebelan koy Dios?”​—Gawa 11:17.

17, 18. (a) Panon ya asubok iray Judion Kristiano ed samay imbaga nen Pedro? (b) Akin et nayarin aliwan mainomay ya pansiansiaen so pankakasakey na kongregasyon, tan anto ray maabig ya itepet tayod sarili tayo?

¹⁷ Asubok iray Judion Kristiano ed saraman ya imbaga nen Pedro. Nasarag da kasin ekalen so panangidumaduma ra tan awaten da bilang kapara dan Kristiano iray Gentil ya kapkapampabautismo ra? Oniay nabasa tayo: “Sanen nadngel da [saray apostol tan arum nin Judion Kristiano] iraya, agla ra kinmontra, tan inggloria ray Dios, ya inkuan da: ‘No ontan sirin et inabuloyan met la na Dios a makapambabawi iray aliwan Judio pian nagamoran da so bilay.’” (Gawa 11:18) Inuman day panagnonot da kanian ag-aderal so pankakasakey na kongregasyon.

¹⁸ Diad panaon tayo, nayarin aliwan mainomay ya pansiansiaen so pankakasakey na saray lingkor nen Jehova ta “nanlapu ra ed amin a nasyon tan tribu tan rasa tan lenguahe.” (Apo. 7:9) Kanian diad dakel ya kongregasyon, nanduruma iray lahi, kultura, tan situasyon na saray wadtan. Maabig no tepetan tayoy sarili tayo: ‘Kasin matmainomay kon husgaan iray totoo no duma ira? Diad panagtratok ed saray agagi, kasin determinado ak ya agmanpaimpluensya ed ugali  na sayan mundo​—ya atagey so pakanengneng da ed bansa, lenguahe, kultura, tan lahi ra?’ Isip yo pa may agawad si Pedro (Cefas) kayari pigaran taon. Nampaimpluensya si Pedro ed panangidumaduma na arum tan “inarawian to” ray Gentil ya Kristiano kanian binano nen Pablo. (Gal. 2:11-14) Talagan kaukolan tayon lanang so manalwar pian ag-itayo naimpluensyaan na panangidumaduma.

19. Siopa ray inggapon pulongan na saray Judion Kristiano diad Antioquia, tan antoy resulta?

¹⁹ Igapo la kasi na saray papatumbok nen Jesus ya pulongan iray ag-asegat ya Gentil? Imanoen tayoy agawa diad Antioquia na Sirya. d Dakel so Judio ed sayan syudad balet anggapoy problema ed ulopan na saray Judio tan saray Gentil, kanian balibalin pulongan iray Gentil diad Antioquia. Ditan inggapon impulong na saray Judion disipulo so maong a balita ed “saray totoon mansasalitay Griego.” (Gawa 11:20) Aliwa labat ya saray Judion mansasalitay Griego so pinulongan da, noagta pati saray ag-asegat ya Gentil. Benendisyonan nen Jehova itan ya kimey da kanian “dakdakel so nagmaliw a mananisia.”​—Gawa 11:21.

20, 21. Panon ya nampaabeba si Bernabe, tan panon tayo met ya manpaabeba ed ministeryo tayo?

²⁰ Pian naasikaso iyan balon teritorya, imbaki na kongregasyon na Jerusalem si Bernabe diad Antioquia. Dakel so interesado diman kanian agto nasarag no bukbukor to. Siopa kasi sankaabigan ya makatulong ed sikato? Anggapo lay arum noagta si Saulo, lalo la ta sikatoy magmaliw ya apostol na saray nasyon. (Gawa 9:15; Roma 1:5) Kasin natatakot si Bernabe ya ompan nasapawan nen Saulo? Andi, kabaliktaran ingen ta nampaabeba si Bernabe. Sikato lan mismoy linmad Tarso pian anapen si Saulo, tan inawit tod Antioquia pian ontulong ed sikato. Sakey taon ya saniba dan pinabiskeg iray disipulo ed samay kongregasyon diman.​—Gawa 11:22-26a.

²¹ Panon tayo met ya manpaabeba ed ministeryo tayo? Kaukolan tayon awaten ya wala ray limitasyon tayo. Tandaan tayo ya nandurumay abilidad na kada sakey ed sikatayo. Singa bilang, wala ray marunong ya manpulong ya impormal odino mankabkaabungan pero naiirapan iran man-RV odino mangigapoy panangiyaral na Biblia. No labay yoy magmaliw ya mas epektibo ed ministeryo, kerew kayoy tulong. No gawaen yo itan, magmaliw ya mas mabunga tan mas maliket so ministeryo yo.​—1 Cor. 9:26.

22, 23. Panon ya impanengneng na saray agagi ed Antioquia ya inaro da ray agagi da, tan panon met itan ya ipapanengneng na saray totoo na Dios natan?

²² Diad Antioquia first time ya ‘atawag ya Kristiano iray disipulo lapud panangiwanwan na Dios.’ (Gawa 11:26b) Dugaruga itan ya ngaran ya inter na Dios ed saray papatumbok na Kristo. Nen nagmaliw ya Kristiano iray aliwan Judio,  kasin naaralan na saray Judio tan sarayan Gentil ya aroen so sakey tan sakey? Imanoen tayo pa may nen walay agawan eras nen 46 C.E. e Nensaman, grabe so epekto na eras ed saray mairap-bilay ta anggapoy akareserban kuarta odino naakan da. Legan na saman ya eras, kakkaukolay tulong na saray Judion Kristiano ya manaayam ed Judea ta dakdakel ed sikara so mairap-bilay. Nen naamtaan itan na saray agagin tagad Antioquia, kaiba la ray Gentil ya Kristiano, ‘angipawit iray tulong ed saray agagin manaayam diad Judea.’ (Gawa 11:29) Talagan inar-aro da ray agagi da!

²³ Ontan met iray totoo na Dios natan. No naamtaan tayon mankaukolan iray agagi tayo ed arum ya bansa, odino diad mismon lugar tayo, manggagawa tayoy paraan pian natulongan tayo ira. Manuturon tampol iray Branch Committee na saray Disaster Relief Committee ya mangasikaso ed saray agagin naapektoan na natural iran kalamidad, singa say bagyo, yegyeg, tan tsunami. No tutulongan tayo ray agagi tayon mankaukolan, ipapanengneng tayon inar-aro tayo ra.​—Juan 13:34, 35; 1 Juan 3:17.

24. Panon tayon nipanengneng ya natatalosan tayo so labay ya ibaga na pasingawey ya anengneng nen Pedro?

²⁴ Bilang tuan Kristiano, importantin natalosan tayon maong so labay ya ibaga na pasingawey ya anengneng nen Pedro nen unonan siglo diad toktok na sakey ya abung ed Joppe. Agmanangidumaduma so Dios ya dadayewen tayo, tan labay ton mamasya tayon ipulong so Panarian to ed saray totoo, anggan antoy lahi o bansan nanlapuan da, tan anggan anto ni pakanengneng na arum ya totoo ed sikara. Pulongan tayo sirin so amin ya malabay ya ondengel ed maong a balita pian nawalaan iray pankanawnawan nakabat si Jehova.​—Roma 10:11-13.