1-4. Anton mairap ya situasyon so aarapen nen Pedro, tan antoy nalikna yo no sikayoy walad situasyon to?

 KALOOB nen Pedro ed prisoan, sankarengel so impangikapot na saray guardia ed balbaleg ya balatyang ya puerta. Inawit day Pedro ed selda to legan ya akagulonggulong ed duaran Romanon guardia. Pigay oras odino agew ni ingen ya nanalagar antis ton naamtaan no antoy gawaen da ed sikato. Anggapo lay arum ya nanengneng to noag say padir na prisoan, saray rehas, say gulonggulong to, tan saray manggua-guardia ed sikato.

² Sinmabin siansiay balita, tan maruksa so sentensia ed si Pedro. Determinado si Arin Herodes Agripa I ya pateyen si Pedro. a Diad tua, labay ton ipaway si Pedro diad arapan na saray totoo kayari na Paskua ta amta ton panliketan na totoo so ipatey to. Seryoso iya ta kakkapampapatey nen Herodes ed sakey nin apostol​—si Santiago.

³ Diad samay labi antis na planon pamatey ed si Pedro, anto kasi iisipen to legan ya walad ambilbilunget ya selda to? Kasin iisipen to may imbaga nen Jesus nensaman ya awiten da ed pasen ya agto labay pian pateyen da? (Juan 21:18, 19) Ompan naisip nen Pedro ya sinmabi la iman ya panaon.

⁴ No sikayoy walad situasyon nen Pedro, anto kasi nalikna yo? Say arum et nadismaya la ra tan isipen dan anggapo lay pag-asa. Pero parad saray tuan papatumbok nen Jesu-Kristo, anggapo tay situasyon ya anggapoy pag-asa. Antoy naaralan tayo ed ginawa nen Pedro tan saray kaiba ton Kristiano nen apasegsegang ira? Nengnengen tayo.

5, 6. (a) Akin tan panon ya pinairap nen Arin Herodes Agripa I so Kristianon kongregasyon? (b) Akin et subok parad kongregasyon so impatey nen Santiago?

⁵ Naamtaan tayo ed kapitulo 9 na sayan publikasyon ya importante ed Kristianon kongregasyon imay impagmaliw ya Kristiano na Gentil ya si  Cornelio tan say pamilya to. Balet seguradon abigla iray Judion agnagmaliw ya Kristiano nen naamtaan dan kaiba lan mandadayew na dakel ya Judion Kristiano iray aliwan Judio.

⁶ Matinik ya politiko si Herodes, sinambot to iyan pankanawnawa pian naala toy pabor na saray Judio, kanian inggapo ton pairapen iray Kristiano. Seguro naamtaan to ya maapit ya kaaro nen apostol Santiago si Jesu-Kristo kanian “pinatey tod espada si Santiago ya agi nen Juan.” (Gawa 12:2) Naermenan ya maong so kongregasyon ed saman! Sakey si Santiago ed saramay taloran akanengneng ed impanguman na itsura nen Jesus tan ed arum ni ran milagro ya ag-amta na arum nin apostol. (Mat. 17:1, 2; Mar. 5:37-42) Tinawag nen Jesus si Santiago tan say agi ton si Juan ya “Ananak na Karol” lapud masetseseg ira. (Mar. 3:17) Kanian naandian so kongregasyon na makpel, matoor ya tasi, tan inar-aron apostol.

7, 8. Antoy ginawa na kongregasyon nen apriso si Pedro?

⁷ Amta nen Agripa ya agustoan na saray Judio so impamatey ed si Santiago kanian binmiskeg so liknaan ton isublay si Pedro. Singa abitla lad gapo na sayan kapitulo, inaresto day Pedro. Pero seguro nanonotan ni nen Agripa ya diad apalabas et milagron nibulos ed prisoan iray apostol ya singa nabasa tayo ed kapitulo 5 na sayan publikasyon. Kanian pian seguradon agmakatakas so apostol, impaigulonggulong nen Herodes si Pedro ed pegley na duaran sundalo, tan walay 16 ya guardian mansusublayan ya manbabantay ed agew tan labi. Ta no makatakas si Pedro, pateyen nen Herodes irayan guardia. Diad satan ya mair-irap ya situasyon, anto kasi nagawaan na saray kaparan Kristiano nen Pedro?

 ⁸ Amta la na kongregasyon no antoy gawaen da. Nabasa tayo ed Gawa 12:5: “Kanian walad prisoan si Pedro; balet sikatoy masimsimoon ya impikasi na kongregasyon.” Talagan masimsimoon tan manlapud puso so pikakasi da parad inar-aro dan agi. Ag-ira adismaya ed impatey nen Santiago; tan agda met inisip ya anggapoy nagawaan na pikakasi da. Importantin maong ed si Jehova iray pikakasi. No linawa to, seguradon dengelen to iratan. (Heb. 13:18, 19; Sant. 5:16) Importantin amta itan na saray Kristiano natan.

9. Panon tayon naalig iray Kristiano nensaman ya angipikasi ed si Pedro?

⁹ Wala tay kabat yo ya ondadalan ed mairap ya situasyon? Ompan napapasegsegang ira, in-ban na gobierno so panagdayew ed lugar da, odino apektado ira na kalamidad. Sarag yo ran ipikasi ya masimsimoon. Ompan wala ra met so kabat yon ondadalan ed mairap ya situasyon pero agmasyadon nahahalata. Nayarin walay problema da ed pamilya, nadidismaya ra, odino wala ni ray arum ya subok ed pananisia ra. No mandalepdep kayo ni antis kayon manpikasi, ompan dakel so nanonotan yon ngaran ya sarag yon bitlaen no manpikasi kayo ed si Jehova, say “Dumerengel na pikakasi.” (Sal. 65:2) Diad tua, ompan kaukolan yo met iray agagi ya mangipikasi ed sikayo no bilang ta sikayo met so ondalan ed mairap iran situasyon.

10, 11. Ideskribe no panon ya imbulos na anghel nen Jehova si Pedro ed prisoan.

¹⁰ Kasin natatakot ya ompatey si Pedro? Agtayo nibaga, balet legan na satan ya sampot ya labi to ed prisoan, sikatoy nanaugip ed pegley na duaran aliston sundalo. Mabiskeg so pananisia nen Pedro, kanian seguradon amta to ya antokaman  so nagawa ed sikato et aglingwanan nen Jehova. (Roma 14:7, 8) Balet seguradon agbalot inilaloan nen Pedro iray makapadinayew ya sinmublay ya agawa. Biglan sinminag so liwawa ed selda to. Walay anghel ya akaalagey diman ya seguradon agnanenengneng na saray guardia, tan binangon ton tampol si Pedro. Insan bigla labat ya nakal iray makapal ya gulonggulong ed lima to!

¹¹ Nantutumbokan so ganggan na anghel ed si Pedro: “Alagey kan tampol! . . . Manparaan ka tan isulong mo ray sandalyas mo. . . . Isulong moy ilalatop mon kawes.” Inunor iratan nen Pedro, insan la imbaga na anghel: “Tumbok kad siak,” tan atan so ginawa nen Pedro. Inmalis ira ed samay selda, nilabsanan da ray guardia, tan marendeen iran akasabi ed balbaleg ya balatyang ya puerta. Panon dan agawaan man? No bilang ta mankelaw ya maong si Pedro, alinewan met lanlamang. Kasabi dad puerta, “linmukas iyan bukor.” Ag-aliklikas nen Pedro ya akapaway la ra ed puerta tan wala la ra ed karsada, insan biglan asismat la may anghel. Bukbukor la nen Pedro, insan diman to labat atalosan ya talagan agawa iraya. Aliwa yan pasingawey. Talagan bulos la!​—Gawa 12:7-11.

12. Akin et naligliwa itayo no isipen tayoy impangiligtas nen Jehova ed si Pedro?

¹² Di ba makapaligliwan isipen ya anggapoy limitasyon na pakayari nen Jehova ya mangiligtas ed saray lingkor to? Inerel si Pedro na sakey ya arin susuportaan na sankabiskegan ya gobierno na mundo ed saman ya panaon, pero basta labat akapaway ed saman ya prisoan! Diad tua, agmanggagaway ontan iran milagro si Jehova parad amin ya lingkor to. Agto itan ginawa parad si Santiago, tan no onsabi la may panaon ya nagawa iramay imbaga nen Jesus nipaakar ed si Pedro, agto met itan gawaen parad si Pedro. Ag-iilaloan na saray Kristiano natan ya milagro iran protektaan nen Jehova. Balet amta tayo ya ag-anguman si Jehova. (Mal. 3:6) Tan asingger to lan usaren so Anak to pian ibulos iray minilyon ya akapriso ed patey. (Juan 5:28, 29) Makatulong iratan ya promise ta pian nawalaan tayoy pakpel ya arapen iray subok ya dadalanen tayo natan.

13-15. (a) Antoy reaksion na saray agagin nantitipon ed abung nen Maria nen sinmabi si Pedro? (b) Siopa lay sinmublay ya nampokusan na libro na Gawa, balet antoy tuloytuloy ya ginawa nen Pedro parad saray agagi?

¹³ Akaalagey si Pedro ed ambilunget ya karsada tan maniisip no iner lay laen to. Insan to anonotan ya asingger diman so abung na sakey ya Kristianon bii ya si Maria. Abalo la si Maria tan mapatnag ya mayaman ta balbaleg so abung to tan nayarin mantitipon diman so kongregasyon. Sikato so ina nen Juan Marcos, ya first time ya abitla so ngaran to ed libro na Gawa tan sinmabi panaon et inturing ya anak nen Pedro. (1 Ped. 5:13) Anggano lablabi la, dakdakel so membro na kongregasyon ya wadman ed abung nen Maria, tan masimsimoon iran manpipikasi. Seguradon ipipikasi ran nibulos la komon si Pedro​—pero abigla ra ed ebat nen Jehova ed pikakasi ra!

 ¹⁴ Tinmoktok si Pedro ed gate na sular diad arap na abung nen Maria. Dinmago ed gate so biin lingkor ya manngaray Roda, Griegon ngaran itan ya say labay ton ibaga et amay rosas ya “Rose.” Agmakapanisia si Roda ed arengel to. Boses iman nen Pedro! Imbes ya lukasan toy gate, intilak toy Pedro ed karsada tan batik ed abung pian kombinsien toy kongregasyon ya wadman si Pedro. Say kuan da et natatapis la. Balet agda nabano, ipasoot to ya tuay ibabaga to. Wala ray medyo nakokombinse la, pero say iisipen da et anghel iman ya mangirerepresenta ed si Pedro. (Gawa 12:12-15) Legan to ’tan, siansia nin ontotoktok si Pedro, ya anggad linma rad gate tan nilukasan da.

¹⁵ Kalukas da, “sikatoy anengneng da tan mankelkelaw ira”! (Gawa 12:16) Eksayted iran maong kanian sininyasan ira nen Pedro ya mandeen ira pian makapan-istorya, insan to imbagad sikara ya ipasabi da iraman ed disipulon si Santiago tan ed saray agagi. Insan la inmalis antis nin naalmo na saray sundalo nen Herodes. Linmad mas ligtas ya pasen si Pedro tan diman to intuloy so matoor ya panaglingkor to. Kayari na satan, aminsan labat lan abitla si Pedro ed libro na Gawa, diad samay impanresolbe na isyu ed panagsegat ya nabasad Gawa kapitulo 15. Insan la natan nampokus so libro na Gawa ed saray ginawa tan impanbiahe nen apostol Pablo. Balet makaseguro tayo ya pinabiskeg nen Pedro so pananisia na saray agagi inerman so kulaan to. Seguradon malikeliket iray agagi ya tinaynan to diad abung nen Maria.

16. Akin et makaseguro tayo ya dakel so balibalin nagawa ed arapen?

¹⁶ No maminsan, mas ni so iiter nen Jehova nen say iilaloan na saray lingkor to, kanian malikeliket ira. Ontan so alikna na saray Kristianon agagi nen Pedro ed saman ya labi. Ontan met so nayarin nalikna tayo natan no bebendisyonan itayo nen Jehova. (Pro. 10:22) Asingger lan tooren nen Jehova so amin ya im-promise to ya nagawa ed interon dalin. Saray balibalin nagawa ed arapen et mas palumbasan to ni so amin ya naimadyin tayo natan. Kanian no mansiansia tayon matoor, makaseguro tayo ya dakel so napanliketan tayo diad arapen.

17, 18. Akin et sobray impangirayew na totoo ed si Herodes?

¹⁷ Mankelaw met si Herodes ta akatakas si Pedro​—balet agaylay pasnok to ed satan. Impaanap ton tampol si Pedro, insan to tinetepetan ya maong iramay guardia. Nen agda naalmoy Pedro, “impadusa to ra,” nayarin impapatey to ra. (Gawa 12:19) Anggapoy panangasi nen Herodes Agripa. Kasin adusa iyan maruksan too?

¹⁸ Abaingan ya maong si Agripa ta agto apapatey si Pedro, pero akalmoy sananey nin pankanawnawa pian nabawi toy kagalangan to. Wala ray kakabusol to ya linma ed sikato pian mikareenan, tan naisip ton pankanawnawa la man pian makapansalita ed arap na dakdakel ya totoo. Insulat nen Lucas ya “nansulong si Herodes na kawes na ari antis ya nansalita.” Insulat met na Judion historian ya si Josephus ya gawad silver so kawes nen Herodes, kanian  no nasilewan, mankirlap so ari. Insan la nansalita iyan malastog ya politiko. Oniay inyeyag na totoo diad panlalarog da ed si Herodes: “Boses na dios, aliwan boses na too!”​—Gawa 12:20-22.

19, 20. (a) Akin et dinusa nen Jehova si Herodes? (b) Akin et makapaligliwa ed sikatayo so istorya na biglan impatey nen Herodes Agripa?

¹⁹ Say Dios labat so dapat ya pangiteran na ontan ya dayew, tan anengneng na Dios so agawa! Akaiwas komon si Herodes ed dusa no binano to iray totoo odino agkomon inmabobon ed imbaga da. Imbes, nagmaliw ya alimbawa si Herodes na samay proverbio ya: “Say panagpasirayew et mansumpal ed kadederal.” (Pro. 16:18) “Tampol a sikatoy kinabil na anghel nen Jehova, . . . tan sikatoy kinan na saray bigis tan inatey,” kanian makapadimla so impatey na sayan mayabang a too. (Gawa 12:23) Imbaga met nen Josephus ya bigla labat ya nansakit si Agripa, tan kuan to ni ya nen ompapatey lay ari, naisip to ya agawa ed sikato man lapud inawat toy panangirayew na totoo. Insulat nen Josephus ya limaran agew ya nansakit si Agripa insan inatey. b

²⁰ No maminsan, singa agnadudusa iray totoon manggagaway mauges. Agtayo la pankelawan itan ta “say interon mundo et walad pakayari na samay mauges.” (1 Juan 5:19) Balet no maminsan, siansia nin naaaburido iray matoor ya lingkor na Dios no nanenengneng dan agnadudusa iray mauges ya totoo. Sakey itan ya rason no akin ya makapaligliwa imay agawad si Herodes. Singa tayo nanenengneng si Jehova ya onkikiwas, tan ipapanonot to ed amin ya lingkor to ya importante ed sikato so hustisya. (Sal. 33:5) Asingsingger to lan ipaakseb so hustisya to.

21. Antoy sankaimportantian ya naaralan tayo ed Gawa kapitulo 12, tan akin et makapaligliwa itan ed sikatayo natan?

²¹ Diad sampot na sayan agawa, wala ni mas makapaseseg ya naaralan tayo: “Nantultuloy a binmulaslas tan linmaknab so salita nen Jehova.” (Gawa 12:24) Nanengneng ed satan ya report ya tuloytuloy so kimey ya panagpulong, tan ipapanonot na satan ed sikatayo ya bebendisyonan met nen Jehova so panagpulong ed panaon tayo. Malinew ya aliwa labat ya nipaakar ed impatey na sakey ya apostol tan intakas na sakey nin apostol ed prisoan so nabasa tayo ed Gawa kapitulo 12. Noagta nipaakar iya ed si Jehova, tan say ginawa to pian pigilan so plano nen Satanas ya deralen so Kristianon kongregasyon tan patundaen so panagpulong. Pinmalpak so pakana nen Satanas, tan ontan met so nagawa ed saray pakana na anggan siopa ya labay ton patundaen so panagpulong. (Isa. 54:17) Balet seguradon nabendisyonan iray kimey na saray onsusuporta ed si Jehova tan ed si Jesu-Kristo. Di ba makapaseseg itan? Talagan baleg so pribilehyo tayo ya ipulong so “salita nen Jehova” natan!