AMINSAN ya agew et walay toon linman minengnengan ed si Jesus. Amta ton si Jesus et maomaong, kanian inkuan to ed sikato: ‘Managbangat, ibagam pa’d agik ya ikdan toak na saray walad sikato.’ Inisip na saman a too a nepeg a sikatoy ikdan na agi to na saray kayarian.

No sika si Jesus, antoy ibagam ey?— Alikas nen Jesus a walay problema na saman a too. Balet say problema to et aliwan lapud nakaukolan toray walad si agi to. Say problema na too et agto amta no anto so talagan importante ed bilay.

Nonoten ta pa iya. Antoy sankaimportantian parad sikatayo? Kasin say pakawalaan na balibali iran gakgalaw, balo iran kawes, odino arum niran bengatla?— Andi, wala ni mas importante. Tan saya so labay nen Jesus ya ibangat a leksion. Kanian angistorya na nipaakar ed sakey a too a nilingwanan toy Dios. Labay mon dengelen itan?—

Sayan too et mayamyaman. Walay daralusan tan walaray kamarin to. Mabunabuna iray tanem to. Agla onduga ed saray kamarin to iray amin ya anien to. Kanian, antoy gawaen to ey? Inkuan to ed inkasikato: ‘Bagbagen ko iray kamarin ko tan mangipaalagey ak na mas angkabaleg. Insan ko tiponen iray amin a naanik tan amin a kagawaan ko ed sarayan balon kamarin.’

Say amta na mayaman a too et maong iman a gawaen to. Say amta to  et sikatoy makabat a maong diad pantipon toy amayamay a bengatla. Inkuan to ed inkasikato: ‘Dakel iray atipon ko. Amayamay so atipon ko parad dakel a taon. Kanian natan et makapanrelaks ak la. Mangan ak, oninum ak, tan manliket ak.’ Balet walay makapuy ed kanonotan na saman a mayaman a too. Antam no anto?— Nononoten to labat so inkasikato tan say dilin panliketan to. Alingwanan toy nipaakar ed Dios.

Kanian nansalita so Dios ed sayan mayaman a too. Inkuan to: ‘Sika a makulangkulang a too. Ompatey ka natan a labi. Siopa natan so makankien ed saray tinipon mo?’ Kasin nausar ni na mayaman a too iraman a bengatla no sikatoy inatey la?— Andi, alaen iratan na sananey. Inkuan nen Jesus: “Ontan so mantipon na kayamanan nipaakar ed sikato, et aliwa a mayaman dia ed Dios.”—Lucas 12:13-21.

Agmo labay ya aligen iyan a mayaman a too, agta ontan?— Say manunan gagala to ed bilay et say pakatipon na saray kayamanan. Lingo  itan. Say labay ton naynay et dakel ni. Balet sikatoy aliwan ‘mayaman ed Dios.’

Dakel a totoo so kapara na sayan mayaman a too. Say naynay a labay da et nawalaan ni na dakel. Balet mansumpal iya ed baleg iran problema. Singa bilang, walaray gakgalaw mo, agta ontan?— Antoray arum a gakgalaw mo a? Ibagam pa’d siak.— Panon to no walay kaarom a walay bola to odino monyeka odino arum nin gakgalaw ya anggapo ed sika? Duga kasi no manpasaliw ka met ed si nanay tan tatay mo?—

Nayarin walaray panaon a singa importante so gakgalaw. Balet agmanbayag, anto so nagawa ed satan ey?— Ondaan. Nayarin naderal itan, insan agmo la labay. Walay mas importante nen saray gakgalaw. Antam no anto itan?—

Say bilay mo. Importantin maong so bilay mo lapud no anggapo itan, anggapon balot so nagawaan mo. Balet say bilay mo so mandedependi ed panggawa na makapaliket ed Dios, agta ontan?— Kanian agtayo aligen iyan makulangkulang a mayaman a too ya alingwanan toy Dios.

 Aliwan saray ugugaw labat so makapanggawa na makapuy iran bengatla a singa samay mayaman a too. Dakel a baleg lan totoo so manggagawa met na ontan. Arum ed sikara so agkontento ed wala la’d sikara. Wala la lanti kanen da parad sanagew, isulong da, tan ayaman da, balet agni ra kontento. Labay da ni dakel a kawes. Tan labay day mas angkabaleg iran abung. Magastos irayan bengatla. Kanian mamasya iran mantrabaho pian dakel so naanap dan kuarta. Tan no dakel lay kuarta ra, dakel so nasaliw dan labay da.

Arum a baleg lan totoo so naynay a manaanap na kuarta kanian anggapo lay panaon da ed pamilya ra. Tan anggapo met lay panaon da ed Dios. Kasin say kuarta ra so mamasiansia ed sikaran mabilay?— Andi. Kasin nausar day kuarta ra no inatey la ra?— Andi. Lapud anggapo lan balot so nagawaan na saray inatey.—Eclesiastes 9:5, 10.

Labay to kasin ibaga et makapuy so nawalaan na kuarta?— Andi. Makasaliw tayoy nakan tan kawes no walay kuarta tayo. Ibabaga na Biblia a proteksion itan. (Eclesiastes 7:12) Balet no inaro tayo so kuarta, nawalaan itayo na saray problema. Naalig tayo imay makulangkulang a mayaman a too a nantipon na saray kayamanan parad inkasikaton dili balet aliwan mayaman ed Dios.

Antoy kabaliksan na pagmaliw a mayaman ed Dios?— Kabaliksan ton iyuna so Dios ed bilay tayo. Ibabaga na arum a totoo a manisia ira ed Dios. Isipen dan say nakaukolan labat et say panisia ed sikato. Balet kasin mayaman ira ed Dios?— Andi, kapara da imay mayaman a too ya alingwanan toy Dios.

Agbalot alingwanan nen Jesus so Ama to a walad tawen. Agto nananap na dakel a kuarta. Tan anggapoy dakel a kayarian to. Amta nen Jesus no anto so talagan importante ed bilay. Antam no anto itan?— Say pagmaliw a mayaman ed Dios.

Ibagam pa’d siak, panon itayon magmaliw a mayaman ed Dios?— Magmaliw itayon mayaman ed Dios no gawaen tayoy makapaliket ed sikato.  Inkuan nen Jesus: ‘Naynay kon gawaen iray bengatla a makapaliket ed sikato.’ (Juan 8:29) Manliket so Dios no gawaen tayo iray labay to. Ibagam pa natan ed siak, antoray nagawaan mon mamaliket ed Dios?— On, makapanbasa ka na Biblia, miaral, manpikasi ed Dios, tan ontulong ed arum a makaaral nipaakar ed sikato. Saratan so talagan sankaimportantian ed bilay.

Lapud si Jesus et mayaman ed Dios, sikatoy inasikaso nen Jehova. Inikdan toy Jesus na bilay ya andi-anggaan. No aligen tayo si Jesus, aroen tan asikasoen itayo met nen Jehova. Kanian komon ta aligen tayo si Jesus tan agtayon balot aligen iman a mayaman a too ya alingwanan toy Dios.