ANTAM no anto so tanda, agta ontan?— Diad Kapitulo 46 et abasa ta so nipaakar ed tanda ya inter na Dios ya agto lan balot deralen lamet so mundo panamegley na delap. Ontan met, kinmerew iray apostol na sakey a tanda pian naamtaan da no kasin akapawil la si Jesus tan no kasin asingger lay anggaan na mundo, odino sistema na saray bengatla.—Mateo 24:3.

Lapud si Jesus et agnanengneng no wala la’d tawen, sakey a tanda so kaukolan a nanengneng na totoo a mangipatnag a sikatoy manuuley la. Kanian imbaga nen Jesus ed saray babangatan to iray nepeg dan imanoen diad dalin. Sano nagawa la iraya et kabaliksan ton sikato lay pinmawil tan manuuley ed tawen bilang Ari.

Pian ibangat ed saray babangatan to so kaimportantian na pansiansian akabantay, inkuan nen Jesus ed sikara: “Nengneng yo so kiew a higos, tan  saray amin a kiew. Bang sano manulnos ira, nanengneng yo et amta yo ed inkasikayo a say tiagew asingger la.” Antam ya ibaga no asingger lay tiagew. Tan nibagam no asingger lay Armagedon sano nanengneng mon nagagawa iray sinalita nen Jesus.—Lucas 21:29, 30.

Diad sayan pahina tan ed ontumbok, imanoen ta iray litrato na saray imbaga nen Jesus a kabiangan na tanda ya asingger la so Panarian na Dios. Sano nagawa irayan amin a bengatla, say Panarian na Dios a si  Kristo so Manuley et maneral ed amin a gobierno, a singa abasa ta diad Kapitulo 46.

Kanian imanoen pan maong iray litrato ed duaran pahina antis na saya, tan pantongtongan ta iratan. Diad Mateo 24:6-14 tan Lucas 21:9-11, nabasam ditan so nanenengneng mo ed sarayan litrato. Imanoen met so melag a numero ed kada litrato. Pareho met a numero so naromog diad gapo na parapo a manedeskribe ed litrato. Nengnengen ta pa no kasin dakel la’d kabiangan na tanda ya inter nen Jesus so nasusumpal la natan.

(1) Inkuan nen Jesus: ‘Makadngel kayo naani na saray bakal tan saray balita nipaakar ed bakal; . . . ontalindeg naani nasyon sumpa ed nasyon, tan panarian sumpa ed panarian.’ Wala ta laray abalitaan mon bakal o guerra?— Say inmunan guerra ed interon mundo so agawa manlapud 1914 anggad 1918, insan agawa met so Guerra Mundial II, manlapud 1939 anggad 1945. Anggapo ni agawa nensaman iran guerra ed interon mundo! Natan et walaray guerra ed amin a parte na mundo. Inagew-agew lawarin narerengel odino nababasa tayo iray guerra diad TV, diad radio, tan diad dyaryo.

(2) Inkuan met nen Jesus: “Wala ra naani eraeras . . . ed nambabangil a pasen.” Singa antam la, aliwan amin et walaan na magenap a nakan. Kada agew et nilibon totoo so ompapatey lapud andian ira na magenap a tagano.

(3) Inkuan ni nen Jesus: ‘Dia ed nambabangil a pasen et walaray salot.’ Antam no anto so salot?— Sakit itan a mamapatey ed dakel a totoo. Sakey a graben salot so atawag a trangkaso Español ya amatey ed ngalngali 20 milyon a totoo ed loob labat na sakey taon odino onsulok ni. Diad panaon tayo et mas dakel a totoo nen say satan so nayarin ompatey lapud AIDS. Tan walaray kanser, sakit ed puso, tan arum niran sakit a mamapatey ed nilibon totoo kada taon.

 (4) Angiter si Jesus na sananey a kabiangan na tanda a kuanto: “Wala ra naani . . . yegyeg ed nambabangil a pasen.” Antam no anto so yegyeg?— Say yegyeg so manyakayak ed dalin. Nakusbo so kaabungan, tan maslak et ompatey iray totoo. Nanlapula’d taon 1914, walaray dakel a yegyeg ed kada taon. Wala ta laray abalitaan mon yegyeg?—

(5) Inkuan nen Jesus a say sananey a kabiangan na tanda et say ‘idakel na kaugsan.’ Satan so rason no akin a dakerakel so panagtakew tan karawalan. Saray totoo ed nanduruman pasen so natatakot ompan nalooban ira. Anggapo nin balot nensaman so ontan a karakel na krimen tan karawalan ed amin a parte na mundo a singa natan.

(6) Angiter si Jesus na importantin maong a kabiangan na tanda sanen inkuan to: “Saya ya ebanghelyo na panarian nipulong naani ed sankamundoan ya onkanan [pantasi] ed saray amin a nasyones; et saman la onsabi so anggaan.” (Mateo 24:14) No manisia ka ed “saya ya ebanghelyo,” sirin et nepeg mon itongtong met itan ed arum. Diad ontan et makapibiang ka ed pakasumpal na sayan kabiangan na tanda.

Nayarin ikuan na arum a totoo a saray bengatlan impasakbay nen Jesus so naynay lan nagagawa. Balet agnin balot agawa nensaman iratan ya amin tan bansag ed dakerakel a parte na mundo. Kanian kasin natalosan mo no antoy kabaliksan na tanda?— Kabaliksan to a sano nanenengneng tayon amin irayan bengatla a nagagawa, sayan mauges a mundo so magano lan salatan na balon mundo na Dios.

Sanen inter nen Jesus iyan tanda, sinalita to met so nipaakar ed nikaduman tiempo ed taon. Inkuan to: “Mantultuloy kayon manpikasi a say ibatik yo et aliwan diad panaon na ambetel.” (Mateo 24:20, NW) Anto kasi labay ton ibaga ed satan?—

 Onia’ay, no paliisan na sakey a too iray kapeligroan legan na panaon na ambetel a delikado so manbiahe, antoy nayarin nagawa ey?— No bilang ta apaliisan to, sikatoy nairapan. Agta makapaermen no say sakey so ompatey ed bagyo lapu labat ta okupado ed arum iran bengatla imbes a sinakbayan to komon so manbiahe?—

Kasin natalosan mo so punto nen Jesus diad impangibaga to ya agla aalagaren so mapeligron panaon pian ombatik?— Ibabaga to ed sikatayo a lapud amta tayon asingger la so Armagedon, agtayo labay so naatrasado ya onkiwas pian paneknekan ya inaro tayo so Dios diad panlingkor ed sikato. No naatrasado tayo, nayarin atrasado itayo la a manlingkor ed si Jehova. Diad ontan et magmaliw itayon singa saramay diad panaon na baleg a Delap ya akadngel ed si Noe balet ta aglinmoob ed biong.

Ontumbok, pantongtongan ta no antoy nagawa kayari na baleg a bakal na Armagedon. Amtaen ta no antoy ipaparaan na Dios parad sikatayon amin a mangaaro ed sikato tan manlingkor ed sikato natan.