SANO manggawa na maong iran bengatla iray ugugaw, manliket iraman so mangaasikaso ed sikara. No say sakey ya ugaw et walay gagawaen ton maabig, manliket so ama to a mangibaga ed arum: “Anak ko itan.”

Naynay a gagawaen nen Jesus so makapaliket ed si Ama to. Kanian manliket si Ama to ed sikato. Kasin nanonotan mo ni so ginawa na Ama nen Jesus diad aminsan ya agew a kaiba nen Jesus iray taloran papatumbok to?— On, akitongtong so Dios manlapud tawen a kuanto ed sikara: “Sikato’ya so inarok ya Anak, a sikatoy panliketan kon maong.”—Mateo 17:5.

Naynay a maliket si Jesus a manggawa ed saray makapaliket ed Ama to. Antam no akin? Lapud talagan inaro toy Ama to. No napipilitan labat so sakey a too a gawaen iray bengatla, mairap iratan a gawaen. Balet no sikatoy mabulos odino agnapipilitan, magmainomay itan a gawaen. Antam no anto so kabaliksan na pagmaliw a mabulos?— Kabaliksan na satan so panlabay a manggawa ed sakey a bengatla.

Anggan sanen antis a linma diad dalin si Jesus, sikatoy mabulos a nanggawa na antokaman a pagawa ed sikato na Ama to. Saya et lapud inaro toy Ama to, si Jehova a Dios. Walaan si Jesus na marakerakep a pasen ed tawen a kaibay Ama to. Balet walay espisyal a kimey a pagawa na Dios ed si Jesus. Pian nagawaan itan a kimey, kaukolan a taynan nen Jesus so tawen. Kaukolan a sikatoy nianak bilang ugaw diad dalin. Mabulos si Jesus a manggawa ed saya lapud labay nen Jehova a gawaen to itan.

Pian nianak bilang ugaw diad dalin, kaukolan a walay ina nen Jesus. Kabat mo no siopa?— Say ngaran to et Maria. Imbaki nen Jehova so  anghel to a Gabriel manlapud tawen pian mitongtong ed si Maria. Imbaga nen Gabriel ed si Maria a sikatoy nawalaan na anak ya ugaw a laki. Say ugaw so ingaran a Jesus. Tan siopa so ama na ugaw?— Imbaga na anghel a say Ama na ugaw et si Jehova a Dios. Kanian natawag si Jesus bilang Anak na Dios.

Anto kasi so liknaan nen Maria ed saya?— Kasin imbaga ton, “Agko labay so magmaliw ya ina nen Jesus”? Andi, akaparaan si Maria a manggawa ed panlabayan na Dios. Balet panon a say Anak na Dios a walad tawen so nianak bilang ugaw diad dalin? Panon a miduma so inkianak nen Jesus manlapud inkianak na amin ya ugugaw? Kasin antam?—

Onia’ay, pinalsa na Dios so inmunan atateng tayo, si Adan tan Eva, ta pian makapankasakey ira diad makapakelkelaw a paraan. Kayari to, nayarin ombaleg so sakey ya ugaw ed eges na ina to. Ibabaga na totoo a makapakelkelaw iya! Seguradon ontan met so ibagam.

Natan et walay mas makapakelkelaw a ginawa na Dios. Inyalis toy bilay na Anak to manlapud tawen tan inyan to ed eges nen Maria. Satan so agnin balot ginawa na Dios nensaman, tan agto lan balot ginawa itan. Bilang resulta na sayan milagro, ginmapon binmaleg si Jesus ed eges nen Maria a singa ed ibabaleg na arum ya ugugaw ed eges na kainaan da. Insan, akiasaway Maria ed si Jose.

Sanen asabi lay panaon na kianak nen Jesus, si Maria tan Jose so binmisita ed syudad na Betlehem. Balet dakdakel so totoo diman. Anggapo ni ingen so kuarton natuloyan di Maria tan Jose, kanian sikaray  nanayam ed pangisisiroman ed saray ayayep. Diman nan-anak si Maria, tan si Jesus so imparukol diad atotong, a singa nanengneng mo ed retrato. Say atotong et pananginan na kakanen na saray baka tan arum ya ayayep.

Walaray makapaliket ya agawa diad samay labi a nianak si Jesus. Diad asingger ed Betlehem, pinmanengneng so sakey ya anghel ed pigaran managpastol. Imbaga to ed sikara a si Jesus et importantin too. Onia so imbaga na anghel: ‘Nia! Ibagak ed sikayo so maong a balita a mamaliket ed totoo. Natan et walay nianak a mangisalba ed totoo.’—Lucas 2:10, 11.

Imbaga na anghel ed saray managpastol a naromog day Jesus diad Betlehem, ya akarukol ed atotong. Insan, kabekta et akibiang so arum ya anghel ed tawen ed samay inmunan anghel pian mangidayew ed  Dios. ‘Gloria ed Dios,’ so inkansion na saray anghel, ‘tan diad dalin kareenan ed limog na totoo na maong a linawa.’—Lucas 2:12-14.

Sanen inmalis laray anghel, saray managpastol so linma ed Betlehem tan aromog da si Jesus. Diman et imbaga ra ed si Jose tan Maria so amin a bengatlan arengel da. Kasin naisip mo no panon kaliket si Maria a sikatoy mabulos a magmaliw ya ina nen Jesus?

Linmabas so panaon, si Jose tan Maria so angawit ed si Jesus diad syudad na Nazaret. Ditan so binalegan nen Jesus. Sanen sikatoy binmalbaleg la, inggapo toy malaknab a panagbangat to. Saya so kabiangan na kimey a labay nen Jehova a Dios ya ipagawa ed Anak to diad dalin. Mabulos si Jesus a  manggawa ed satan a kimey lapud inaro a maong nen Jesus si Ama to a walad tawen.

Antis a ginmapon mankimey si Jesus bilang Sankamaongan a Managbangat, sikatoy binautismoan nen Juan a Managbautismo diad Ilog na Jordan. Insan walay makapakelkelaw ya agawa! Sanen onsasakbit lay Jesus, nansalita si Jehova manlapud tawen, a kuanto: ‘Saya so Ana’ko, say inar-arok, napaliket ak a maong ed sikato.’ (Mateo 3:17) Agka ta maliket no ibaga ed sika na atateng mo ya inaro da ka?— Segurado itayon aliketan met si Jesus.

Naynay a ginawa nen Jesus no anto so duga. Sikatoy agnankuankuanan. Agto imbaga ed totoo a sikatoy Dios. Imbaga na anghel Gabriel ed si Maria a si Jesus so tawagen ya Anak na Dios. Imbaga a mismo nen Jesus a sikatoy Anak na Dios. Tan agto imbaga ed totoo a dakel so amta to nen say Ama to. Inkuan to: “Say Ama babaleg nen say siak.”—Juan 14:28.

Anggan diad tawen, sanen walay kimey ya ingganggan na Ama nen Jesus a gawaen to, ginawa nen Jesus itan. Agto imbagan gawaen to itan balet ta sananey so gawaen to. Inaro toy Ama to. Kanian dinengel to so imbaga na Ama to. Insan sanen linma diad dalin si Jesus, ginawa to so angibakian na mangatatawen ya Ama to. Agto inusar so panaon to ed panggawa na sananey. Kanian aliketan si Jehova ed Anak to!

Labay tayo met a napaliket si Jehova, agta ontan?— Sirin nepeg tayon ipanengneng a talagan ondengel itayo ed Dios, a singa ginawa nen Jesus. Mansasalita so Dios ed sikatayo panamegley na Biblia. Aliwan duga so pankuankuanan ya ondedengel itayo ed Dios balet ta panisiaan tan gawaen iray bengatla a kontra ed Biblia, agta ontan?— Tan tandaan, no talagan inaro tayo si Jehova et labalabay tayon sikatoy napaliket.