1-3. Akin ya nikadkaduma so impatey nen Jesus?

 SAKEY agew ngalngali 2,000 taon lay apalabas, sakey a toon inosente so nilitis ed korte, senentensiaan ed krimen ya agton balot ginawa, insan pinairap ya anggad inatey. Aliwan sikato so sankaunaan ya agmakatunongan tan maruksan pinatey; makapaermen, ta aliwa met ya sikato so sampot. Balet, say impatey to et nikadkaduma ed impatey na arum.

² Diad unor la ran oras antis ya ompatey iyan too, wala ray nikadkaduman agawa ed tawen, a tanda ya importante iman ya inkagawa. Anggano diad saman et kakkaktangan na agew, biglan binmilunget. A singa imbaga na sakey ya historian, “naandi so liwawa na agew.” (Lucas 23:44, 45) Insan sakbay ya ompatey iman ya too, imbesngaw to irayan agnalinglingwanan a salita: “Asumpal la!” On, diad impangiter toy bilay to, agawaan to so bengatlan alay abig. Satan ya impansakripisyo to so sankaabigan lan agawaan na too pian nipanengneng so aro.—Juan 15:13; 19:30.

³ Satan ya too et si Jesu-Kristo. Say impanirap tan impatey to ed saman a makapasinagem ya agew, Nisan 14, 33 C.E., et balitadon maong. Balet walay importantin katuaan a mabetbet a nibabaliwala. Anggaman nanirap ya maong si Jesus, wala ni sakey a mas nanirap tan mas baleg so insakripisyo to ed saman ya agew. Say impanengneng to ya panangaro et agbalot naparaan na anggan  siopa. Antoy ginawa to? Say ebat ed satan ya tepet so mangibangat ed sikatayo nipaakar ed sankaimportantian ya kualidad nen Jehova, say aro.

4. Panon ya atebek na sakey a Romanon sundalo ya si Jesus et aliwan ordinaryon too, tan anto so imbaga to?

⁴ Samay Romanon opisyal a sundalo ya angasikaso ed impamatey ed si Jesus et tinmakot lapud binmilunget sakbay ya inatey si Jesus tan yinmegyeg ya maksil. Inkuan to: “Tua a saya so Anak na Dios.” (Mateo 27:54) Kombinsido ya si Jesus et aliwan ordinaryon too. Saman a sundalo et kaiban amatey ed bogbogtong ya Anak na Sankatageyan a Dios! Panon so panangaro na Ama ed sayan Anak to?

5. Panon ya niyilustra so kabayag na panaon ya impaniba nen Jehova tan na Anak to diad tawen?

⁵ Tinawag na Biblia si Jesus a “say panguloan na amin a pinalsa.” (Colosas 1:15) Isipen pa labat​—apalsa la so Anak nen Jehova antis ya pinalsa so uniberso. Panon la sirin kabayag so impaniba na Ama tan say Anak? Ibabaga na arum iran sientista a say uniberso et manga 13 bilyon a taon la. Kasin naimadyin yo no panon karukey itan ya panaon? Pian natalosan na totoo no panon lan kabayag so uniberso base ed kalkulasyon na saray sientista, inusar na sakey a planetarium so tsart na panaon ya walay dukey ton 110 a metro. Legan ya manaakar iray bisita ed petek na satan a tsart, kada kupbang da et irerepresenta toy 75 milyon a taon ya bilay na uniberso. Diad sampot na satan a tsart, say interon awaran na too et inrepresenta panamegley na sakey a marka a singa kakapal labat na sakey a buek na too! Balet, anggano bilang ta susto iyan kalkulasyon da, satan ya interon tsart na panaon et kulang  ni pian irepresenta so dukey na bilay na Anak nen Jehova! Antoy ginawa to legan na satan ya panaon?

6. (a) Antoy ginawa na Anak nen Jehova antis ya linma diad dalin? (b) Awalaan na anton klase na impankasakey si Jehova tan na Anak to?

⁶ Malikeliket so Anak a nanserbi bilang “marundunong a komikimey” nen Ama to. (Proverbio 8:30) Ibabaga na Biblia: “Ag-apalsa so anggan sakey a bengatla no aliwan diad panamegley [na Anak].” (Juan 1:3) Kanian si Jehova tan say Anak to so saniban nankimey diad impamalsa na arum ni ran bengatla. Seguradon makapaliket iraman a panaon parad sikara! Amta tayo ya say aroan na ateng tan anak et talagan malet. Tan say aro et “perpekton bedber na pankakasakey.” (Colosas 3:14) Kanian, siopa ed sikatayo so makatebek no panon kaelet so relasyon dad sakey tan sakey ed ontan kabayag ya panaon? Malinew ya si Jehova a Dios tan say Anak to et impankasakey na sankaeletan lan bedber na aro.

7. Nen abautismoan si Jesus, panon ya imbalikas nen Jehova so liknaan to nipaakar ed Anak to?

⁷ Balet imbaki na Ama so Anak to diad dalin pian iyanak bilang sakey ya ugaw. Say panggawa ed satan et kabaliksan to ya pigaran dekada ya agto nakaiba diad tawen so inad-aro ton Anak. Interesadon maong si Jehova ed si Jesus kanian binantayan To manlapud tawen so imbaleg to bilang ayadyarin too. Nen manga 30 taon to, nampabautismo si Jesus. Antoy alikna nen Jehova ed ginawa na Anak to? Si Jehova lan mismo so nansalita manlapud tawen: “Saya so Ana’ko, say inad-arok, ya inabobonan ko.” (Mateo 3:17) Lapud matoor a ginawa nen Jesus so amin a nipropesiya nipaakar ed sikato, tan amin ya ingganggan ed sikato, seguradon aliketan ya maong so Ama to!—Juan 5:36; 17:4.

8, 9. (a) Anto so agawa ed si Jesus nen Nisan 14, 33 C.E., tan antoy epekto na satan ed Ama to? (b) Akin ya inabuloyan nen Jehova so Anak to a manirap tan ompatey?

 ⁸ Balet anto so alikna nen Jehova nen Nisan 14, 33 C.E.? Anto so liknaan to nen trinaidor si Jesus tan inaresto na saray grupo na totoo diad labi? Nen si Jesus et tinaynan na kakaaro to tan ilegal dan nilitis? Nen inelek-elekan, nilutdaan, tan pinoniti da? Nen sinisiplatan, ya asugatsugat tan mandaldala so beneg to? Nen impasak iray lima tan sali to ed panamairapan a kiew tan tinaynan dan akabitin diman legan a sikatoy ayew-ayewen na totoo? Anto so alikna na Ama nen kinmelyaw ed sikato so inad-aro ton Anak lapud graben paniirap to? Antoy alikna nen Jehova nen manpapanabos lay Jesus, tan diad sankaunaan a pankanawnawa manlapu lad gapo na interon panamalsa, say pinabpabli Ton Anak et naandi la?​—Mateo 26:14-16, 46, 47, 56, 59, 67; 27:38-44, 46; Juan 19:1.

⁹ Anggapoy salitan nausar tayo pian ideskribe so sakit ya alikna nen Jehova diad impatey na Anak to. Say nayarin nibaga tayo labat et say motibo nen Jehova diad impangiyabuloy to ed satan. Akin ya inabuloyan na Ama ya nalikna iratan? Walay balibalin ipapaamta nen Jehova ed sikatayo diad Juan 3:16​—sakey ya importantin bersikulo ed Biblia ya tinawag a sumaryo na maong a balita nipaakar ed si Jesus. Ibabaga to: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” Kanian say motibo nen Jehova et aro. Say impangibaki nen Jehova ed Anak to ya manirap tan ompatey lapud sikatayo et balibalin regalo tan sankaabigan ya paraan pian nipanengneng toy panangaro to.

10. Antoy kaukolan na totoo, tan antoy agawa ed kabaliksan na salitan “aro”?

¹⁰ Anto so kabaliksan na salitan “aro”? Adeskribe so aro bilang say manunan kaukolan na too. Manlapud inkiyanak ya anggad ipatey, labalabay na toon naliknay panangaro, onligsa ira lapud satan, tan nayari ni ingen ya onkapuy tan ompatey ira no anggapo itan. Balet anggano importante so aro, mairap itan ya ipaliwawa. Lanang ya pantotongtongan na totoo so nipaakar ed aro. Ondarakel iray libro, kansion, tan tula nipaakar ed satan. Balet agnin siansia nipapalinew na saratan so kabaliksan na aro. Diad tua, asobraan da lay panguusar ed sayan salita kanian mas mairap la ingen a natalosan so tuan kabaliksan na aro.

11, 12. (a) Panon ya makatulong so Biblia pian naaralan tayoy nipaakar ed aro, tan akin? (b) Anto ran klase na aro so inusar ed kadaanan a Griegon lenguahe, tan anton salita parad “aro” so mabetbet ya nauusar ed Kristianon Griegon Kasulatan? (Nengnengen met so paimanod leksab.) (c) Anto so mabetbet ya kabaliksan na a·gaʹpe base ed impangusar ed saya diad Biblia?

¹¹ Balet malinew ya ibabangat na Biblia so nipaakar ed aro. Inkuan na Vine’s Expository Dictionary of New Testament Words: “Napatnagan labat a say sakey et talagan maaro diad saray gagawaen to.” Saray ginawa nen Jehova ya akarekord ed Biblia so mangibabangat ed sikatayo nipaakar ed aro to​—say panangaro to ed saray pinalsa to. Alimbawa, wala ta ni arum a mas maabig a pakapatnagan ed sayan kualidad nen say samay sankaabigan lan paraan na impangipanengneng nen Jehova na aro to ya adeskribe diad bandad gapo? Diad onsublay iran kapitulo, imanoen tayo so dakel ni ran alimbawa no panon ya ipapanengneng nen Jehova so panangaro to ed saray gagawaen to. Sakey ni, nawalaan tayo na aralem  a pakatalos manlapud orihinal iran salita parad “aro” a nausar ed Biblia. Diad inmunan Griegon lenguahe, wala so apatiran salita parad “aro.” a Diad saraya, say sankabetbetan a nauusar ed Kristianon Griegon Kasulatan et a·gaʹpe. Sakey a diksionaryo na Biblia so anawag ed saya ya “say sankapuersaan a salitan naisip a parad aro.” Akin?

¹² Say a·gaʹpe et mabetbet ya ontutukoy ed aro ya igigiya na prinsipyo. Kanian aglabat itan akabase ed liknaan tayod sananey a too. Satan et malaklaknab, ipapanengneng tayo itan ed amin lapud amta tayon atan so duga. Tan say sankaimportantian, say Makristianon aro et aliwan makasarili. Alimbawa, nengnengen lamet so Juan 3:16. Anto so “mundo” ya inaro na Dios, tan lapud satan et inter to so bogbogtong ya Anak to? Ontutukoy itan ed saray totoo ya minabang ed dondon. Kaibad saya so dakel a totoon manbibilay ed paraan ya aliwan makapaliket ed Dios. Kasin inaro nen Jehova so balang sakey bilang personal a kaaro, a singa ed impangaro tod matoor ya si Abraham? (Santiago 2:23) Andi, balet maaron ipapanengneng nen Jehova so kamaongan to ed amin, anggano kaukolan so balbaleg a pansakripisyo to. Labay to ya amin et magbabawi tan manpasimbalo ed saray dalan da. (2 Pedro 3:9) Dakel so manggagawa na ontan. Saraya so malikeliket ton aawaten bilang kakaaro to.

13, 14. Antoy mangipapanengneng ya mabetbet a kaiba ed a·gaʹpe so aralem ya liknaan?

 ¹³ Balet, arum so walaan na lingon ideya nipaakar ed a·gaʹpe. Iisipen da a satan a klase na aro et anggapoy kaiban liknaan tan walad nonot labat. Diad tua, say a·gaʹpe et mabetbet a mangilalaktip ed personal a liknaan. Alimbawa, sanen insulat nen Juan ya, “Inaro na Ama so Anak,” inusar to so salitan a·gaʹpe. Kasin satan ya aro so andian na liknaan? Imanoen ya nen imbaga nen Jesus ya, “Aaroen na Ama so Anak,” inusar to so salitan phi·leʹo. (Juan 3:35; 5:20) Mabetbet ya say panangaro nen Jehova et walay kaiba ton aralem ya liknaan. Anggaman ontan, say panangaro to et aglabat anganggad liknaan. Satan et naynay ya igigiya na makabat tan maptek iran prinsipyo to.

¹⁴ Singa anengneng tayo la, amin ya kualidad nen Jehova et ayadyari tan balibali. Balet say aro so sankarakepan ed amin. Atan la so sankaabigan ya rason no akin ya labay tayoy onapit ed si Jehova. Makapaliket, say aro met so manunan kualidad to. Panon tayon amta?

15. Antoy ibabaga na Biblia nipaakar ed kualidad nen Jehova ya aro, tan akin ya duma itan? (Nengnengen met so paimanod leksab.)

¹⁵ Walay ibabaga na Biblia nipaakar ed aro ya agton balot ibabaga nipaakar ed arum iran manunan kualidad nen Jehova. Ag-ibabaga na Kasulatan a say Dios et pakayari odino say Dios et hustisya odino say Dios et karunongan. Saratan a kualidad so walad sikato tan sikato labat so panlalapuan na saratan, tan nipaakar ed sarayan talo et anggapoy makapipara ed sikato diad pangipanengneng ed saratan. Balet, nipaakar ed komapat ya  kualidad, dumay ibabaga na Biblia: “Say Dios et aro.” b (1 Juan 4:8) Anto so kabaliksan na satan?

16-18. (a) Akin ya ibabaga na Biblia a “say Dios et aro”? (b) Diad amin a pinalsa ed dalin, akin a say too so matukotukoy a simbolo na kualidad nen Jehova ya aro?

¹⁶ No imbagan “say Dios et aro,” aliwa yan simplin panangikompara a singano “say Dios et kapara na aro.” Agtayo nayarian a baliktaren so balikas tan ibaga ya “say aro et Dios.” Si Jehova et aliwa labat ya basta kualidad. Sikato so sakey a persona ya walaan na nanduruman liknaan tan kualidad likud ed aro. Balet, say aro so manunan kualidad nen Jehova. Kanian inkuan na sakey a reperensya nipaakar ed sayan bersikulo: “Say pakabidbiran ed Dios et aro.” Panon tayon natalosan itan? Singa onia tan ay: Say pakayari nen Jehova so mangiter ed sikato na pakayarin onkiwas. Say inkahustisya tan karunongan to so mangigiya ed ikiwas to. Balet say aro nen Jehova so mamakiwas ed sikato ya gawaen so sakey a bengatla. Tan naynay ya kaiba so aro no uusaren to so arum a kualidad to.

¹⁷ Mabetbet a nibagan si Jehova so mismon personipikasyon na aro. Sirin no labay tayon aralen so nipaakar ed aro, nepeg tayon aralen so nipaakar ed si Jehova. Siempre, sayan marakdakep a kualidad so nayarin nanengneng tayo ed saray totoo. Balet akin a diad totoo? Diad samay panaon na impamalsa, sarayan salita so mapatnag  ya imbaga nen Jehova ed Anak to: “Gawaen ta so too unong ed indengan ta, a miulibay ed sikata.” (Genesis 1:26) Diad amin a pinalsa ed dalin, saray totoo labat so makayarin mangaro tan diad ontan et aaligen da so Ama da ya walad tawen. Nonoten ya inusar nen Jehova so nanduruman pinalsa a mangisimbolo ed saray manunan kualidad to. Balet, pinili nen Jehova so sankaabigan a pinalsa to ed dalin, say too, bilang simbolo na manunan kualidad To, say aro.​—Ezequiel 1:10.

¹⁸ Sano ipapanengneng tayoy agmakasarilin aro ed arum, aaligen tayo so manunan kualidad nen Jehova. Singa itan ed insulat nen apostol Juan: “Mangaaro itayo, lapud say Dios so inmunan angaro ed sikatayo.” (1 Juan 4:19) Balet diad anto ran paraan ya si Jehova so inmunan angaro ed sikatayo?

19. Antoy amakiwas ed si Jehova ya mamalsa?

¹⁹ Aliwan balo so aro, ta atan so amakiwas ed si Jehova pian igapo so pamalsa. Agto itan ginawa lapud bukbukor to tan nakaukolan toy kaiba. Si Jehova so kompleto tan nagnap, anggapoy kulang ed sikato ya nayarin iter na arum. Balet say aro to et sakey ya aktibon kualidad, ya amakiwas ed sikaton manginabang na liket diad saray matalinon pinalsa to a makayarin mangapresya ed ontan a regalo. “Say gapoan na impamalsa na Dios” et say bogbogtong ya Anak to. (Apocalipsis 3:14) Insan sayan Marundunong a Komikimey so inusar nen Jehova diad impamalsa ed arum ni ran bengatla, a ginmapo ed saray anghel. (Job 38:4, 7; Colosas 1:16) Sarayan makapanyarin espiritu ya inikdan na kawayangan, talino, tan liknaan, et awalaan na pankanawnawan onapit ed sakey tan sakey, tan manuna ed amin, diad si Jehova a  Dios. (2 Corinto 3:17) Sirin, sikaray angaro lapud sikaray inmunan naaro.

20, 21. Panon ya amta nen Adan tan Eva ya inaro ira nen Jehova, balet antoy ginawa da?

²⁰ Kanian ontan met ed totoo. Manlapud gapo, si Adan tan Eva et naar-aron maong. Inerman so lingawan da ed Paraison ayaman da ed Eden, nanengneng da so ebidensya na panangaro na Ama ra ed sikara. Imanoen so ibabaga na Biblia: “Angiparaan si Jehova a Dios na sakey a hardin diad Eden, diad bandad bukig; tan inyan to diman so too a pinalsa to.” (Genesis 2:8) Asalim lay pinmasyar ed marakdakep a hardin odino parke? Anto so nanliketan mon maong? Say liwawan onsisinag ed saray bulong diad nisulinek a pasen? Saray mararakep a kolor na rosas? Saray alay abig ya ungol na agus na karayan, kansion na saray manok, tan uni na saray insekto? O saray angob na kakiewan, saray bunga tan rosas da? Tua ya balibali iray hardin, pero anggapoy hardin natan a nayarin ikompara ed samay diad Eden. Akin?

²¹ Saman a hardin et ginawa nen Jehova a mismo! Talagan sankarakepan. Amin a klase na nanduruman kakiewan tan malamis ya prutas et wadman. Say hardin et nasasalog ya maong, maawang, tan mabilabilay lapud saray balibali tan nanduruman ayayep. Si Adan tan Eva so walaan na amin a bengatlan mamaliket tan mamenek ed bilay da, a pati makapnek a kimey tan perpekton ulopan. Si Jehova so inmunan angaro ed sikara, tan walaan ira na sigpot a rason pian ontan met so gawaen da. Balet, agda itan agawaan. Imbes ya unoren day Ama ra ed tawen, nanrebelde ira ed sikato.​—Genesis, kapitulo 2.

22. Panon a saray ginawa nen Jehova diad samay rebelyon ed Eden so mamaneknek a matoor so aro to?

²² Agaylan makapaermen itan ed si Jehova! Balet kasin  sayan impanrebelde so amaawet ed maaron puso to? Andi! “Say matoor a panangaro to et mansiansia ya anggad angga.” (Salmo 136:1) Kanian, nanggawan tampol na maaron uksoyan pian nadondon iray ilalak nen Adan tan Eva ya walaan na dugan kipapasen na puso. Singa naaralan tayo la, kaiba ed satan ya uksoyan so dondon bagat na inad-aro ton Anak, anggano balbaleg so insakripisyo na Ama.​—1 Juan 4:10.

23. Anto so sakey a rason a si Jehova et “maliket a Dios,” tan anton importantin tepet so aralen ed ontumbok a kapitulo?

²³ On, manlapud gapo si Jehova so inmuna lan angipanengneng na aro ed totoo. Diad agnabilang a paraan, “say Dios so inmunan angaro ed sikatayo.” Lapud aro, niwalay pankakasakey tan liket, kanian agpankelawan a si Jehova so adeskribe bilang say “maliket a Dios.” (1 Timoteo 1:11) Anggaman ontan, walay sakey ya importantin tepet. Kasin inaro itayo nen Jehova bilang indibidual? Atan so aralen tayo ed ontumbok a kapitulo.