1. Anton liknaan so manidismaya ed dakel ya totoo tan ed pigaran tuan Kristiano?

 KASIN personal kan aaroen nen Jehova a Dios? Arum so onabobon ya aaroen na Dios iray totoo bilang grupo, ya singa ibabaga na Juan 3:16. Balet ompan isipen da met ya: ‘Agak balot nayarin aroen na Dios bilang indibidual.’ No maminsan, anggan saray tuan Kristiano et nayarin ontan met so nalikna da. Oniay imbaga na sakey ya lakin adismaya: “Agak manisian inaro ak na Dios.” Kasin no maminsan et ontan met so naliliknam?

2, 3. Siopa so malabay a napanisia itayon anggapoy kana tayo odino ag-itayo inaro nen Jehova, tan panon tayon nalabanan itan a kanonotan?

² Labay nen Satanas ya isipen tayon ag-itayo inaro tan agtayo importante ed si Jehova a Dios. Tua, mabetbet ya uusaren nen Satanas so inkamapaatagey na totoo pian palikdoen ira. (2 Corinto 11:3) Panisipen to ran mas atagey ira nen say arum. Balet panliketan to met iran pakapuyen diad panisip ya anggapoy kana da. (Juan 7:47-49; 8:13, 44) Lalo la ta manbibilay tayo lad “kaunoran iran agew.” Dakel natan so binmaleg ed pamilyan “anggapoy panangaro ra ed kapamilyaan da.” Arum so naynay ya makakapilimog ed totoon masesebeg, makasarili, tan anawet so ulo ra. (2 Timoteo 3:1-5) No abayag la ran namamaltrato, makakaeksperiensya na diskriminasyon, odino panagbusol, nayarin nalikna dan anggapoy kana da odino anggapoy mangaaro ed sikara.

³ No nadismaya ka ed ontan iran negatibon liknaan, agka naeekalay ilalo. No maminsan, dakel ed sikatayo  so manisip na negatibo ed sarili tayo. Balet tandaan, say Salita na Dios so adesinyo ya ‘mangipetek’ tan ‘mangigeba ed saray malmalet ya akaletneg.’ (2 Timoteo 3:16; 2 Corinto 10:4) Ibabaga na Biblia: “Napaseguroan tayoy puso tayo diad arapan to anggano kokondenaen itayo na puso tayo, lapud say Dios et mas baleg nen say puso tayo tan amta to so amin a bengatla.” (1 Juan 3:19, 20) Konsideraen tayo so apatiran paraan no panon itayon tutulongan na Kasulatan pian “napaseguroan tayoy puso tayo” ya inaro tayo nen Jehova.

4, 5. Panon ya say ilustrasyon nen Jesus nipaakar ed saray anuyaw et mangipapanengneng ya papablien itayo nen Jehova?

⁴ Unona, direktan ibabangat na Biblia a nanenengneng na Dios so kablian na kada sakey ed saray lingkor to. Alimbawa, inkuan nen Jesus: “Agta say duaran anuyaw et manbili labat na sakey a sinsilyo? Ingen ta anggapo ed saratan so napelag ed dalin ya ag-amta na Ama yo. Tan anggan saray buek yo et abilang ya amin. Kanian agkayo natatakot; mas mabli kayo nen say dakel ya anuyaw.” (Mateo 10:29-31) Nonoten pa no antoy kabaliksan na saratan a salita ed saray dinmengel ed si Jesus nen inmunan siglo.

⁵ Nayarin pankelawan tayo no akin a say sakey et manaliw na anuyaw. Bueno diad panaon nen Jesus, say anuyaw so sankamuraan a siwit a nasaliw bilang naakan. Imanoen a say sakey a sinsilyon walaay melag a kantidad et makasaliw lay duaran anuyaw. Balet inkuan nen Jesus ya no say sakey et mangaliw na anuyaw ed duaran sinsilyo, sikatoy makasaliw na aliwan apatiran anuyaw, noagta limara. Say buntok a siwit et singa anggapoy balor to. Nayarin saratan a pinalsa et anggapoy kana ed  pakanengneng na totoo, balet panon so impangipasen na Manamalsa ed saratan? Inkuan nen Jesus: “Anggapo ed saratan so nalingwanan na Dios.” (Lucas 12:6, 7) Natan et natatalosan tayo la so labay nen Jesus ya ibangat ed sikatayo. No papablien nen Jehova so sakey ya anuyaw, seguradon mas pablien to so sakey ya too! Unong ya impaliwawa nen Jesus, kabat nen Jehova so amin a detalye nipaakar ed sikatayo. Anggan saray buek ed ulo tayo et amta toy bilang da!

6. Akin ya segurado tayo ya realistiko si Jesus nen imbaga to ya abilang iray buek ed ulo tayo?

⁶ Amta toy bilang na buek tayo? Nayarin isipen na arum ya si Jesus et aliwan realistiko ed saya. Balet, isipen pa so nipaakar ed ilalon kioli. Seguradon kabkabat itayon maong nen Jehova pian palsaen to itayo lamet! Papablien to itayon maong kanian natandaan to so amin a detalye nipaakar ed sikatayo, pati amin ya impormasyon ed saray selula tayo, walad memorya tayo, tan amin ya agawad bilay tayo. a Kanian matmainomay to labat sirin ya bilangen so buek tayo, a diad kabkaabigan ya ulo et ontutubo so manga 100,000 ya buek.

7, 8. (a) Anto ray pigaran kualidad ya panliliketan nen Jehova a naromog legan ton uusisaen so kapusoan na totoo? (b) Anto ray pigaran gagawaen tayo a papablien nen Jehova?

⁷ Komadua, ibabangat ed sikatayo na Biblia no anto so papablien nen Jehova ed saray lingkor to. Diad simplin  panangibaga, panliliketan to iray maong ya kualidad tayo tan saray sagpot ya gagawaen tayo. Inkuan nen Arin David ed anak ton si Solomon: “Uusisaen nen Jehova so amin a kapusoan, tan natetebek toy amin a kanonotan tan motibo.” (1 Awaran 28:9) Legan ya uusisaen na Dios so binilyon a kapusoan na totoo ed sayan maruksa tan napnoy busolan ya mundo, seguradon naliketan no walad sikara so nanengneng ton mangaaro ed kareenan, katuaan, tan inkatunong! Antoy gawaen to no walay naromog ton too ya mangaaro ed sikato, labay toy manaral nipaakar ed sikato, tan ibaga tod arum so nanaaralan to? Ibabaga ed sikatayo nen Jehova ya iimanoen to iraman so manginanabang ed arum nipaakar ed sikato. Sikato ni ingen so walaan na “sakey a libro na pakanodnonotan” parad amin ya “ontatakot ed si Jehova tan ed saramay mandadalepdep ed ngaran to.” (Malaquias 3:16) Saratan a kualidad et mabli ed sikato.

⁸ Anto ray pigaran maabig a kimey a papablien nen Jehova? Seguradon amin ya sagpot ya gagawaen tayo pian  aligen so Anak to, si Jesu-Kristo. (1 Pedro 2:21) Say sakey a makanan kimey a papablien na Dios et say pangipulong ed maong a balita na Panarian to. Onia so nabasa tayo ed Roma 10:15: “Agaylay dakep iray sali na saramay mangiyaabawag na maong a balita nipaakar ed saray maong a bengatla!” Nayarin agtayo isipen ya saray sali tayo et “agaylay dakep.” Balet diad saya, irerepresenta na saratan so pansasagpot na saray lingkor nen Jehova diad pangipupulong dad maong a balita. Amin iratan ya sagpot et alay abig tan mabmabli ed sikato.​—Mateo 24:14; 28:19, 20.

9, 10. (a) Akin a makaseguro itayo a papablien itayo nen Jehova no susungdoan tayo iray mairap ya situasyon? (b) Antoy agbalot gagawaen nen Jehova no uusisaen toy kapusoan na saray lingkor to?

⁹ Papablien met nen Jehova so pansusungdo tayo. (Mateo 24:13) Tandaan, labay nen Satanas ya ibeneg mo si Jehova. Kada agew a mansiasiansia kan matoor ed si Jehova et sakey agew met ya akatulong kan naebatan iray kantiaw nen Satanas. (Proverbio 27:11) No maminsan, aliwan mainomay so mansungdo. Nasusubok tayo kada agew lapud problema ed bunigas, pinansyal, emosyon, tan arum ni. Makapadismaya met no agnagawa iray iilaloan tayo. (Proverbio 13:12) No sungdoan tayo irayan mairap ya situasyon, pablien itayo nen Jehova. Atan so rason no akin ya kinerew nen David ed si Jehova a tiponen To iray lua to diad “katat a pananginan,” tan inyarum to tekep na talek: “Agta akasulat iratan ed librom?” (Salmo 56:8) On, papablien tan tatandaan nen Jehova so amin a lua tan kairapan a susungdoan tayo legan a manmamatoor itayo ed sikato. Saratan met et papablien to.

¹⁰ Balet anggan dakel iray paneknek ya papablien itayo nen Jehova, nayarin nalikna tayo nin siansia ya anggapoy kana tan anggapoy mangaaro ed sikatayo. Nayarin  paulit-ulit tayon naisip: ‘Dakerakel balet iray mas matoor nen say siak. Seguradon nadismaya si Jehova no ikompara to ak ed arum!’ Ag-itayo ikokompara nen Jehova, tan agto iilaloan ya gawaen tayoy agtayo sarag. (Galacia 6:4) No uusisaen nen Jehova so kapusoan tayo, nenengnengen to anggan saray angkelag ya detalye, tan papablien to so amin ya maong ya nanengneng to ditan.

11. Antoy naaralan tayo ed si Jehova diad paraan na impangasikaso to ed kaso nen Abias?

¹¹ Komatlo, legan itayon uusisaen nen Jehova, maalwar ton nenengnengen iray maong ya kualidad tayo. Singa bilang, sanen ingganggan to ya say interon apostatan dinastiya nen Arin Jeroboam et kaukolan a deralen, ingganggan To a sakey ed saray anak na ari, si Abias, et ikdan na desentin ponpon. Akin? Lapud ‘akanengneng si Jehova a Dios na Israel na maabig a bengatla’ ed sikato. (1 Arari 14:1, 10-13) Diad tua, inusisa nen Jehova so puso na satan a kalangweran a laki tan walay aromog ton “maabig a bengatla.” Anggan melag labat ya kamaongan so anengneng nen Jehova, sinegurado to ya nirekord itan ed Biblia. Benendisyonan to ni ingen si Abias, kinasian to tan inabuloyan ton nawalaay desentin ponpon.

12, 13. (a) Panon a say agawad si Arin Jehosafat et pakapatnagan a nenengnengen nen Jehova so maong ed sikatayo anggano makapankasalanan itayo? (b) No nipaakar ed maong iran kimey tan kualidad tayo, panon ya onkikiwas si Jehova bilang maar-aron Ateng?

¹² Say sakey nin maabig ya alimbawa ya nenengnengen nen Jehova so maong ed sakey ya too et diad si Arin Jehosafat. Nen walay aliwan ginawa na ari, inkuan na propeta nen Jehova ed sikato: “Lapud saya et sinmanok si Jehova ed sika.” Ambelat itan ya mensahe! Balet  ag-anampot ditan. Intuloy to: “Anggaman ontan, wala ray maong a bengatlan anengneng ed sika.” (2 Awaran 19:1-3) Kanian say matunong a sanok nen Jehova so ag-angamper ed sikato a mangimano ed kamaongan a walad si Jehosafat. Agaylan pidumaan ed saray ag-ayadyarin totoo! Sano nasyosyodotan tayo ed arum, nayarin agtayo nanengneng so kamaongan da. Tan no mankasalanan itayo, say impakadismaya, kababaingan, tan pakakakonsiensia so nayarin mangamper ed sikatayo a nanengneng iray maong ya nagagawaan tayo. Balet tandaan a no magbabawi itayo ed saray kasalanan tayo tan pansagpotan tayon agla naulit iratan, perdonaen itayo nen Jehova.

¹³ Legan ya uusisaen ka nen Jehova, eekalen to iratan a kasalanan, no panon ya eekalen na saray manaanap na balitok iray agmakanan bato. Saray maong ya kualidad tan kimey mo ey? On, saraya et singa “piraso na balitok” ya isisinop nen Jehova! Isip mo pay panamabli na atateng ed drowing odino proyekto na ananak da ed eskuelaan ya pigay taon lan akasinop tan nayarin alingwanan la iratan na ananak da. Si Jehova so sankamaaroan ya Ateng. Basta mansiansia itayon matoor ed sikato, agton balot lingwanan iray maong a kimey tan kualidad tayo. Diad tua et impasen ton ag-inkatunong so pangilingwan ed saratan, tan sikato et sigpot ya matunong. (Hebreo 6:10) Uusisaen to itayo met ed sananey nin paraan.

14, 15. (a) Akin et ipapasen itayo nen Jehova ya mabmabli anggano aliwa tayon ayadyari? Iyilustra. (b) Anto so gawaen nen Jehova ed maong iran kualidad a naromog to ed sikatayo, tan panon ton ipapasen iray matoor a totoo to?

¹⁴ Say nenengnengen nen Jehova et say potensyal tayo aliwan saray kakapuyan tayo. Bilang ilustrasyon: Saray totoon mahilig ed art so mansagpot ya maong pian apigeren  so aderal ya drowing odino arum nin kimey. Alimbawa, diad National Gallery ed London, England, sanen pinaltog na sakey a too so drowing nen Leonardo da Vinci a mankantidad na $30 milyon, anggapo so angibaga ya ibantak la so drowing lapud aderal itan. Noagta, tampol ya inapiger itan ya obra-maestra a ngalngali la 500 taon so kabayag to. Akin? Lapud mabmabli itan ed saray mahilig ed art. Agta mas mabli kayo ni nen say anggan anton drowing? Diad pakanengneng na Dios et mabmabli kayo—anggano no maminsan et pakalikna yo et agkayo makana lapud atawir tayon ag-inkayadyari. (Salmo 72:12-14) Si Jehova a Dios, say Marundunong a Manamalsa ed totoo, et manggawa na paraan pian nipawil ed inkayadyari so amin ya maunor tan mangaaro ed sikato.—Gawa 3:21; Roma 8:20-22.

¹⁵ On, nenengnengen nen Jehova so maong ed sikatayo a nayarin agtayo nanengneng a mismo ed sarili tayo. Tan legan a manlilingkor tayo ed sikato, tulongan to tayon napaaligwas iray maong ya kualidad tayo anggad magmaliw tayo lan ayadyari.  Anggan panon lay pangipasen ed sikatayo na mundo nen Satanas, papablien nen Jehova iray matoor a lingkor to.—Aggeo 2:7.

16. Anto so sankabalgan a paneknek na panangaro nen Jehova ed sikatayo, tan panon tayon amta ya sayan regalo et parad sikatayon mismo?

¹⁶ Komapat, papaneknekan nen Jehova ya talagan inar-aro to tayo. Seguradon say dondon bagat nen Kristo so sankabalgan ya ebat ed katilaan nen Satanas a sikatayo so agmakana odino anggapoy mangaaro ed sikatayo. Agtayon balot lilingwanan a say impatey nen Jesus ed panamairapan a kiew tan say sakit ya sinungdoan nen Jehova ed impatey na inad-aro ton Anak et paneknek ya inaro da itayo. Makapaermen ta dakel a totoo so agmanisia a sayan regalo et parad sikaran mismo. Liknaen dan sikara et agmanepeg. Balet tandaan a si apostol Pablo so datin manamasegsegang ed saray patumbok nen Kristo. Ingen, insulat to: “[Say] Anak na Dios, ya angaro ed siak tan inter toy sarili to parad siak.”—Galacia 1:13; 2:20.

17. Diad anton paraan ya iyaasingger itayo nen Jehova ed sikato tan ed Anak to?

¹⁷ Papaneknekan met nen Jehova ya inaro to tayo diad itutulong tod sikatayo bilang indibidual pian nagunggonaan itayo ed bagat nen Kristo. Inkuan nen Jesus: “Anggapoy makaasingger ed siak likud no sikatoy iyasingger na Ama ya angibaki ed siak.” (Juan 6:44) On, sikatayo so personal ya iyaasingger nen Jehova ed Anak to tan iikdan to tayo na ilalon manbilay ya andi-anggaan. Panon? Panamegley na panagpulong a kimey, seseguroen ton naaralan tayo so maong a balita, tan uusaren toy masanton  espiritu to pian natalosan tayo so Biblia tan niyaplika iratan anggano aliwa tayon ayadyari. Kanian nibaga nen Jehova ed sikatayo so singa imbaga to ed Israel: “Agmangangga so panangarok ed sika. Kanian inyasingger ta kad siak tekep na matoor a panangaro.”—Jeremias 31:3.

18, 19. (a) Anto so sankaabigan a paraan ya ipapatnag nen Jehova so panangaro to ed sikatayo bilang indibidual, tan antoy mangipanengneng ya agto inter ed arum iyan responsibilidad? (b) Panon ya ipapaseguro na Salita na Dios a si Jehova a sikatoy ondedengel a walaan na empatya?

¹⁸ Inikdan itayo nen Jehova na pribilehyon manpikasi ed sikato tan no manpipikasi tayo, mas nalilikna tayo so panangaro tod sikatayo bilang indibidual. Iimbitaan na Biblia so balang sakey ed sikatayo ya ‘naynay a manpikasi’ ed Dios. (1 Tesalonica 5:17) Sikato so ondedengel. Sikato ni ingen so atawag a “Dumerengel na pikakasi.” (Salmo 65:2) Sayan responsabilidad et agto inmatalek ed siopaman, anggan ed sarilin Anak to. Isipen pa: Say Manamalsa na uniberso so mamapaseseg ed sikatayon onasingger ed sikato diad pikakasi, tekep na kawayangan ya mansalita. Tan anton klase na dumerengel si Jehova? Kasin ondedengel labat ya anggapoy panangiyansakit to tan anggapoy pibabali tod nagagawad sikatayo? Andin balot.

¹⁹ Si Jehova et walaan na empatya. Anto so empatya? Inkuan na sakey a matoor a maedad lan Kristiano: “Say empatya et sakit ya naliliknam ya walad pusok.” Kasin talagan apektado si Jehova ed sakit ya nalilikna tayo? Nabasa tayo so nipaakar ed saray kairapan na totoo ton Israel: “Kapagno nagogonigon ira, sikatoy nagogonigon met.” (Isaias 63:9) Aglabat nanenengneng nen Jehova so problema ra; sikatoy walaan na pililikna ed totoo. Pian  ipanengneng so empatya to ed saray lingkor to, oniay imbaga to: “Siopaman a maniwit ed sikayo et manidiwit ed bukel na matak.” b (Zacarias 2:8) Talagan ansakit itan! On, si Jehova et mililikna ed sikatayo. No nasasakitan itayo, sikatoy nasasakitan met.

20. Anton kanonotan so nepeg tayon paliisan no labay tayon unoren so simbawan walad Roma 12:3?

²⁰ Ag-isipen na Kristianon limpioy kanonotan to ya lapud sikatoy inaro tan papablien nen Jehova et wala lay rason ton manpaatagey tan magmaliw ya makasarili. Insulat nen apostol Pablo: “Diad panamegley na agnaparaan a kaabigan ya impatnag ed siak, ibagak ed balang sakey ed sikayo ditan ya agkayo maniisip na alabas ed sarili yo nen say manepeg yon isipen, noagta kada sakey et manisip diad paraan a pakapatnagan na limpion kanonotan unong ed pananisia ya inter na Dios ed sikato.” (Roma 12:3) Oniay ibabaga na arum ya patalos: “Ibagak ed balang sakey ed sikayo ya agto ipapasen so sarili to ya alabas ni nen say tua ya kablian to, noagta nepeg ya dugaruga labat so pangipasen tod sarili to.” (A Translation in the Language of the People, nen Charles B. Williams) Kanian legan tayon panliliketan so panangaro na Ama tayod tawen, komon ta nawalaan tayo na limpion kanonotan tan tandaan ya agtayo kanepegan so aro na Dios.—Lucas 17:10.

21. Anton katilaan nen Satanas so agtayon balot papanisiaan, tan anton panamaseguro nen Jehova so nepeg tayon panisiaan?

²¹ Sirin, balang sakey ed sikatayo et gawaen tayoy antokaman  a nayarian tayo pian ipulisay so amin a katilaan nen Satanas, pati say katilaan a sikatayo so agmakana odino anggapoy mangaaro ed sikatayo. No lapud saray eksperiensyam ed bilay et ipapasen mo ya mauge-uges kan too tan anggapoy makasarag ya mangaro ed sika anggan say Dios, odino saray maabig ya nagagawaan mo et melmelag tan agton balot naiimano, odino saray kasalanan mo et abalbaleg ya agnasakbongan na anggan say impatey na pinabpabli ton Anak, katilaan itan. Ekal mo iratan ed pusom! Itultuloy tayon paseguroan so kapusoan tayo na katuaan a nibalikas ed saray apuyanan a salita nen Pablo: “Kombinsido ak ya anggan say patey odino say bilay odino saray anghel odino saray gobierno odino saray bengatlan wala natan odino saray bengatlan onsabi odino saray pakayari odino say kaatagey odino say kaaralem odino anggan dinan nin pinalsa et agbalot makapangisian ed sikatayo ed panangaro na Dios a walad si Kristo Jesus a Katawan tayo.”—Roma 8:38, 39.