1, 2. Kasin nibaga ya aderal lay panamaley na sanasawa no wala ray problema da? Ipaliwawa.

SAY panangasawa et regalo nen Jehova. Nayarin magmaliw a mas maliket so sakey lapud satan. Balet, walan walay problema na amin ya sanasawa. No maminsan et ompan singa agla naupot iray problema, tan nayarin onarawi lay liknaan da ed sakey tan sakey.

² Agtayo la pankelawan ya no maminsan et wala ray onlesan problema na sanasawa. Balet, saratan ya problema et aliwan basiyan ya aderal lay panamaley da. Anggan saray sanasawan awalaan na seryoson problema et wala ray aromog dan paraan pian naayos so relasyon da tan mas napaelet so panamaley da. Anto iratan?

3, 4. No maminsan, antoy nayarin nagawa ed relasyon na sanasawa?

³ Diad panangasawa, mankasakey so duaran mandumaan ya too, ya kada sakey et walay sarili ton ideya, labay tan aglabay, tan paraan na panggawa ed saray bengatla. Ontan met, say asawan laki tan asawan bii et nayarin nandumaan so nanlapuan dan kipapasen ed bilay o kultura. Kaukolan so panaon tan sagpot pian nakabat a maong tan natalosan na sanasawa so sakey tan sakey.

 ⁴ Legan ya onlalabas so panaon, nayarin say pampokusan la na asawan laki tan bii et say sarili dan kapagaan ya anggad onarawi lay liknaan da ed sakey tan sakey. Ompan singa nandumaan lay bilay da. Antoy makatulong pian onapit lamet ira ed sakey tan sakey?

5. (a) Antoy makatulong ed sakey a Kristiano pian lalon onapit ed asawa to? (b) Unong ed Hebreo 13:4, antoy nepeg a pangipasen tayo ed panamaley?

⁵ Mangiiter si Jehova na sankaabigan a bilin ya makatulong ed sika tan ed asawam ya onapit ed Sikato tan ed sakey tan sakey. (Salmo 25:4; Isaias 48:17, 18) Ibabaga tod sikatayo: “Komon ta say panangasawa et galangen na amin a totoo.” (Hebreo 13:4) No walay mabmabli tan importante ed sikatayo, papagalangan tayo itan. Proprotektaan tan agtayo itan papaulyanan. Ontan so labay nen Jehova ya pangipasen tayo ed panamaley.

6. Antoy ibabaga na Mateo 19:4-6 nipaakar ed panmoria nen Jehova ed panangasawa?

⁶ Si Jehova so angasal ed unonan sanasawa. Oniay imbaga na Anak to, si Jesus: “Agyo ta abasa a samay amalsa ed sikara diad gapo et ginawa to ran laki tan bii tan inkuan to: ‘Lapud saya et taynan na laki so ama tan ina to tan iyamong toy asawa to, tan sikaran dua et magmaliw a sakey a laman’? Kanian aliwa la ran duara, noagta sakey a laman. Sirin, say impankasakey na Dios et agnepeg a pansianen na too.” (Mateo 19:4-6) Manlapu lad gapo, inggagala nen Jehova ya permanente so panangasawa. Labay ton maapit tan maliket ya saniiba iray pamilya.

7. Antoy gawaen na sanasawa pian onelet so panamaley da?

⁷ Balet mas dakel natan so problema tan subok ya aarapen na saray sanasawa. No maminsan, masyadon ambelat so problema kanian ompan isipen na sanasawa ya agla naayos so panamaley da kanian agda la pansagpotan ya ayosen. Balet no natatalosan tayoy panmoria nen Jehova ed panangasawa, amta tayoy gawaen tayo.​—1 Juan 5:3.

8, 9. (a) Kapigan tayo nepeg ya unoren so panangigiya nen Jehova ed panangasawa? (b) Panon tayon nipanengneng ya importante ed sikatayo so panamaley tayo?

⁸ Say panangigiya nen Jehova et naynay ya pankaabigan tayo. Singa naaralan tayo la, oniay bilin to ed sikatayo: “Komon ta say panangasawa et galangen.” (Hebreo 13:4; Eclesiastes 5:4) No uunoren tayoy ganggan nen Jehova anggano mairap, seguradon nagunggonaan itayo.​—1 Tesalonica 1:3; Hebreo 6:10.

⁹ Importante ed sikatayo so panamaley tayo kanian agtayo manggawa odino mangibalikas na antokaman  ya maneral ed satan. Imbes, labay tayon paeleten so relasyon tayo ed asawa tayo. Panon tayon nagawaan itan?

10, 11. (a) Antoy seryoson problema na arum ya sanasawa natan? (b) Akin ya importante so paraan na pitotongtong tayo ed asawa tayo?

¹⁰ Nandurumay rason ya nasakitan na sakey so asawa to. Amta tayo ya agbalot nepeg ya sakitan na saray Kristiano so asawa da odino manggawa na antokaman ya mamasakit ed asawa da. Balet nayarin nasakitan tayoy sakey tan sakey ed saray ibabaga tayo. Saray salita tayo et nayarin magmaliw ya singa armas. Oniay imbaga na sakey ya asawan bii: “Sasakitan ak na asawak panamegley na salita. Tua ya anggapo ray sireg ed laman ko, balet asugat-sugat so pusok lapud saray paulit-ulit ya ansasakit a salita, singa say ‘Pabelat ka labat!’ tan ‘Anggapoy kuentam!’” Imbaga na sakey ya asawan laki ya sikatoy naynay ya papabaingan tan papangaranan na asawa to. Say kuan to: “Agko anggan nabitla ed arum a too iray salitan uusaren tod siak. Kanian agko labay so mitongtong ed sikato tan lanang ak lan mano-overtime ed trabaho. Mas maong ni man nen say masakbay ak ya onsempet.” Normal labat la natan iray makapasakit ya salita, odino maruksa tan makapabaing iran salita ya mamasakit ed liknaan.

¹¹ No ansakit so panagsalita na sanasawa, panlapuan itan na sugat ed emosyon ya mabayag ya onabig. Malinew ya aliwan ontan so labay nen Jehova ya pantrato na sanasawa ed sakey tan sakey. Balet posible ya nasakitan na sakey so asawa to ya agto naliklikas. Nayarin iisipen mo ya maomaong kad asawam, balet anton talagay nalilikna  to? Panon to no walay imbagam ya ansakit manaya ed sikato, kasin mabulos kan manguman?​—Galacia 5:15; basaen so Efeso 4:31.

12. Antoy nayarin makaapekto ed relasyon na sakey ed si Jehova?

¹² Importante ed si Jehova so paraan na pitotongtong tayod asawa tayo, wala man so makakarengel odino anggapo. (Basaen so 1 Pedro 3:7.) Papanonotan itayo na Santiago 1:26: “No iisipen na siopaman a too a sikatoy mandadayew ed Dios balet agto kokontrolen so dila to, papalikdoen toy puso to, tan say panagdayew to et andi-kakanaan.”

13. Anto ni sananey a rason ya nasakitan na sakey so asawa to?

¹³ Wala ni nepeg a panalwaran na sanasawa. Singa  bilang, antoy nalikna na asawam no dakel lan panaon so iiter mod arum? Anggano anggapo met so uges to, singa bilang no miulop kad ministeryo odino ontulong kad saray walaan na problema, kasin nasasakitan so asawam? Oniay imbaga na sakey ya Kristianon asawan bii: “No naiimanok ya dakel lan panaon tan atension so iiter to ed arum ya sister ed kongregasyon, nasasakitan ak. Pakaliknak et aliwa ak ya importante.”

14. (a) Anton katuaan so naaralan tayo ed Genesis 2:24? (b) Antoy nepeg ya itepet tayo ed sarili tayo?

¹⁴ Bilang Kristiano, walay responsabilidad tayo ed saray atateng tayo tan saray agagi ed kongregasyon. Balet no wala lay asawam, say manunan responsabilidad mo et say asawam. Imbaga nen Jehova ya say asawan laki et “mansiansia ed asawa to.” (Genesis 2:24, paimanod leksab) Nepeg ya say sankaimportantian ed sika et say liknaan na asawam. Tepetan moy sarilim: ‘Kasin iiter kod asawak so panaon, atension, tan panangaro ya kaukolan tan kanepegan to?’

15. Akin et nepeg ya paliisan na saray Kristiano so magmaliw ya masyadon maapit ed agda asawa?

¹⁵ No masyado kan maapit ed agmo asawa, panlapuan itan na problema. Nayarin onapit ya maong so liknaan mo tan nawalaan kay romantikon liknaan ed agmo asawa. (Mateo 5:28) Nayarin ombiskeg so ontan ya liknaan tan lapud satan et makapanggawa kay bengatlan agmamagalang ed panamaley mo.

16. Anton ganggan so iiter na Biblia nipaakar ed panangasawa?

¹⁶ Kayarin abitla ed Biblia so: “Komon ta say panangasawa et galangen,” oniay katuloyan to: “Ag-itan komon narutakan, ta ukomen na Dios iray manggagawa  na seksual ya imoralidad tan mikakalugoran.” (Hebreo 13:4) Diad sayan teksto, say literal ya kabaliksan na salitan “panangasawa” et ontutukoy ed seksual a relasyon na sanasawa. (Proverbio 5:18) Panon tayon nipanengneng ya rerespetoen tayo iyan relasyon tan agtayo dudutakan?

17. (a) Antoy panmoria na dakel a totoo natan nipaakar ed pikakalugoran? (b) Antoy nepeg ya panmoria na saray Kristiano ed pikakalugoran?

¹⁷ Iisipen na arum a totoo ya ayos labat no ag-ira manmatoor ed asawa ra. Agtayo labay ya naimpluensyaan itayo na ontan ya kanonotan. Malinew ya ipapaamta nen Jehova ya kabusol toy seksual ya imoralidad tan pikakalugoran. (Basaen so Roma 12:9; Hebreo 10:31; 12:29) No misekso tayo ed agtayo asawa, narutakan tayo so panamaley tayo. Ipapanengneng tayon agtayo rerespetoen so estandarte nen Jehova, tan ipepeligro tayoy relasyon tayo ed sikato. Kanian nepeg tayon paliisan so anggan say unonan kundang labat ya nayarin manresulta ed pikakalugoran. Kaibad satan so ipaliis ed agmanepeg ya ilinggis o panisip ed sananey a too.​—Job 31:1.

18. (a) Akin ya say pikakalugoran et singa met panagdayew ed palson dirios? (b) Antoy panmoria nen Jehova ed pikakalugoran?

¹⁸ Diad Ganggan ya inter ed Israel nensaman panamegley nen Moises, say pikakalugoran et ambelat a kasalanan, a singa say panagdayew ed saray palson dirios. Say dusa ed saratan ya kasalanan et patey. (Levitico 20:2, 10) Akin ya say pikakalugoran et singa met panagdayew ed palson dirios? No say sakey ya Israelita et nandayew ed palson dirios, agto tinoor so sipan ton manmatoor ed si Jehova. No sikatoy akikalugoran, agto tinoor so sipan ton manmatoor ed asawa to. (Exodo  19:5, 6; Deuteronomio 5:9; basaen so Malaquias 2:14.) Malinew ya nensaman et ipapasen nen Jehova ya ambelat a kasalanan so pikakalugoran.

19. Antoy makatulong ed sikatayo pian determinado itayon agbalot mikalugoran?

¹⁹ Diad panaon tayo ey? Anggano ag-itayo la sakop na Ganggan ya inter panamegley nen Moises, ag-anguman so panmoria nen Jehova ed pikakalugoran. No panon ya agtayon balot labay so mandayew ed palson dios, agtayon balot met labay so agmanmatoor ed asawa tayo. (Salmo 51:1, 4; Colosas 3:5) Ta no ontan so gawaen tayo, agtayo napagalangan so panamaley tayo tan say Dios tayo, si Jehova.​—Nengnengen so Kaaruman ya Impormasyon 26.

20. Panon ya makatulong ed panamaley so karunongan?

²⁰ Antoy gawaen mo pian onelet so panamaley mo? Oniay ibabaga na Salita na Dios: “Diad panamegley na karunongan et nipapaalagey so abung, tan diad panamegley na pakatebek et magmamaliw itan a malet.” (Proverbio 24:3) Say sakey ya abung et nayarin maligen tan makaparelaks a pasen, balet ompan magmaliw ya makarisgo tan aliwan komportable itan. Ontan met ed panangasawa. Seseguroen na marunong a too ya say panamaley to et maligen, komportable, tan makapaliket.

21. Panon ya makatulong so kakabatan pian onelet so panamaley?

²¹ Nipaakar ed satan ya abung, oniay intuloy na Biblia: “Diad panamegley na kakabatan et napapano iray kuarto to na amin a klase na mabli tan makapaliket iran kayamanan.” (Proverbio 24:4) Makatulong iray naaralan mo ed Salita na Dios pian onaligwas so panamaley mo. (Roma 12:2; Filipos 1:9) Legan yon saniban babasaen  so Biblia tan saray publikasyon tayo, pantongtongan yo no panon yon niyaplika iray nanaaralan yo. Manisip kayoy paraan ya nipanengneng yoy panangaro tan respeto, tan no panon kayon magmaliw ya maomaong tan maasikaso ed balang sakey. Ipikasim ed si Jehova ya tulongan to kan nawalaan na saray kualidad ya mamabiskeg ed panamaley mo tan mas lalo kan aroen na asawam.​—Proverbio 15:16, 17; 1 Pedro 1:7.

22. Akin ya nepeg tayon aroen, respetoen, tan pagalangan so asawa tayo?

²² Nepeg ya gawaen tayoy anggaay nayarian tayon aroen, respetoen, tan pagalangan so asawa tayo. Diad ontan et magmaliw ya mas maapit tan malet so panamaley tayo. Tan say sankaimportantian ed amin, napaliket tayoy Jehova.​—Salmo 147:11; Roma 12:10.