1, 2. Akin et inarom si Jehova a Dios?

KASIN inarom so Dios? Nayarin indedikam lay sarilim ed sikato lapud panangarom ed sikato. Nayarin sikato so sankaapitan ya kaarom. Balet antis mo nin aroen si Jehova, inaro to ka la. Nabasa tayo ed Biblia: “Mangaaro itayo, lapud say Dios so inmunan angaro ed sikatayo.”​—1 Juan 4:19.

² Isip mo pay amin ya ginawa nen Jehova pian ipanengneng so panangaro to ed sikatayo. Inter toy dalin ya balibalin panayaman tayo tan amin nin kaukolan tayo pian maliket so bilay tayo. (Mateo 5:43-48; Apocalipsis 4:11) Labay ton nawalaan itayo na maong ya relasyon ed sikato, tan nanggaway paraan pian naaralan tayoy nipaakar ed sikato. No babasaen tayoy Biblia, ondedengel tayo ed si Jehova. Tan no manpipikasi itayo, dedengelen to tayo. (Salmo 65:2) Igigiya tan papabiskegen to tayo panamegley na mabiskeg ya masanton espiritu to. (Lucas 11:13) Imbaki to ni ingen diad dalin so inar-aro ton Anak pian ibulos itayo ed kasalanan tan patey.​—Basaen so Juan 3:16; Roma 5:8.

3. Antoy gawaen tayo pian mansiansian malet so pikakaaro tayo ed si Jehova?

³ Isip mo pan magano so sakey ed saray sankaapitan  ya kaarom, samay wadtan ya lanang no maliket ka tan no maermen ka. Kaukolan so sagpot pian napansiansian malet so ontan ya pikakaaro. Ontan met ed pikakaaro tayod si Jehova, say sankaapitan ya nakaaro tayo. Say pikakaaro tayod sikato et nayarin mansiansia ed andi-anggaan. Kanian ibabaga na Biblia: “Mansiansia kayo ed panangaro na Dios.” (Judas 21) Panon tayon nagawaan itan? Oniay ebat na Biblia: “Saya so kabaliksan na panangaro ed Dios, ya unoren tayo ray ganggan to; tan saray ganggan to et aliwan makapabelat.”​—1 Juan 5:3.

4, 5. (a) Antoy kabaliksan na “panangaro ed Dios”? (b) Kapigan mo alikna ya inarom lay Jehova?

⁴ Antoy kabaliksan na nabasa ed Biblia ya “panangaro ed Dios”? Aliwan say panangaro na Dios ed sikatayo so tutukoyen na saya, noagta say panangaro tayo ed sikato. Kasin natandaan mo ni no kapigan mo unaan ya alikna ya inarom lay Jehova?

⁵ Isip mo pa lamet imay aliknam nen unaan mon naaralan ya labay nen Jehova ya manbilay tayoy andi-anggaan diad balon mundo to. Naaralan mo ray amin ya paraan ya ginawa nen Jehova pian magmaliw itan ya posible, tan atalosan mo ya mabmablin regalo so inter tod sikatayo nen imbaki tod dalin so mismon Anak to. (Mateo 20:28; Juan 8:29; Roma 5:12, 18) Nen naaralan mo ya inar-aro kan maong nen Jehova, asabi so pusom, tan manlapud saman et aliknam ya inarom met la.​—Basaen so 1 Juan 4:9, 10.

6. Antoy gawaen mo no inarom so sakey ya too? Antoy ginawam lapud panangarom ed Dios?

⁶ Balet say aliknam ya panangaro ed Dios et gapoan ni labat. Singa bilang, no inarom so sakey ya too,  agmo labat ibaga so “Inar-aro ta ka.” Noagta lapud panangarom, napakiwas kan gawaen iray bengatlan mamaliket ed sikato. Ontan met, say panangarom ed si Jehova so mamakiwas ed sikan manbilay diad paraan ya makapaliket ed sikato. Lapud inmaralem itan ya panangaro, nayarin indedikam so sarilim ed sikato tan nampabautismo ka. Nen ginawam itan, insipan mon manlingkor kad si Jehova diad andi-anggaan. (Basaen so Roma 14:7, 8.) Panon mon tooren itan ya sipan?

7. No inaro tayoy Jehova, antoy gawaen tayo? Anto ray arum ed saray ganggan to?

⁷ Lapud inaro tayoy Jehova, “unoren tayo ray ganggan to.” Panon tayon nagawaan itan? Unoren tayo iray ibabaga to. Diad Biblia, naaralan tayo no anton klase na kabibilay so labay nen Jehova. Singa bilang, ibabaga tod sikatayo ya mauges so manbuanges, mantakew o mantila, misekso ed agtayo legal ya asawa base ed Biblia, odino mandayew ed antokaman o siopaman nilikud ed sikato.​—1 Corinto 5:11; 6:18; 10:14; Efeso 4:28; Colosas 3:9.

8, 9. Panon tayon naamtaan no antoy labay nen Jehova ya gawaen tayo ed saray situasyon ya anggapoy nabasa ed Biblia ya espisipikon ganggan? Mangiter na alimbawa.

⁸ Balet pian napaliket tayoy Jehova, agtayo labat basta unoren iray ganggan to. Agto tayo inikdan na detalyadon listaan na saray ganggan parad kada situasyon ed bilay tayo. Kanian wala ray pankanawnawa ya anggapoy nabasa ed Biblia ya espisipikon ganggan no antoy gawaen tayo. Panon tayon makapanggawa na dugan desisyon? (Efeso 5:17) Diad Biblia et wala ray prinsipyo, saray manunan katuaan ya mangibabangat ed sikatayo no antoy panmoria nen Jehova ed saray bengatla. Tan legan  tayon babasaen so Biblia, mas nakabat tayo si Jehova bilang sakey ya Persona. Naaralan tayo so paraan na panagnonot to, pati saray labay tan agto labay.—Basaen so Salmo 97:10; Proverbio 6:16-19; nengnengen so Kaaruman ya Impormasyon 1.

⁹ Singa bilang, panon tayon mandesisyon no antoy pilien tayon bantayan ed TV odino nengnengen ed Internet? Anggapoy imbaga nen Jehova ya eksakton gawaen tayo. Balet inikdan to itayo na saray prinsipyo ya ontulong ed sikatayon manggawa na dugan desisyon. Dakel ed saray panagligliwaan natan et napno na karawalan tan sekso. Diad Biblia et ibabaga nen Jehova ya “kabusol to so siopaman a mangaarod inkaruksa” tan ‘ukomen to iray manggagawa na seksual ya imoralidad.’ (Salmo 11:5; Hebreo 13:4) Panon ya makatulong irayan prinsipyo pian duga iray desisyon tayo? No amta tayo lan kabusol nen Jehova so sakey ya bengatla odino ipapasen to itan ya imoral, nepeg ya arawian tayo itan.

10, 11. Akin et uunoren tayoy Jehova?

¹⁰ Akin et uunoren tayoy Jehova? Aliwan pian napaliisan tayoy dusa tan saray problema ya resulta na makapuy iran desisyon. (Galacia 6:7) Uunoren tayoy Jehova lapud inaro tayo. No panon ya labay na ananak ya paliketen so ama ra, labay tayo met ya paliketen so Ama tayo ed tawen. Anggapo lay arum ya makapaliket ed sikatayo nen say pakaamtan aabobonan itayo nen Jehova!—Salmo 5:12; Proverbio 12:2; nengnengen so Kaaruman ya Impormasyon 2.

¹¹ Lanang tayon uunoren si Jehova aliwa labat ya no mainomay parad sikatayo odino lapud anggapoy arum ya napampilian tayo. Tan agtayo pipilien no dinan iran ganggan tan estandarte so unoren tan agtayo unoren.  (Deuteronomio 12:32) Imbes, sikatoy uunoren tayo ed amin a bengatla, singa samay salmista ya angibagan: “Labalabay ko ray ganggan mo, on, inad-arok iratan.” (Salmo 119:47; Roma 6:17) Labay tayon aligen si Noe ya inunor ton amin so ingganggan nen Jehova lapud labay ton ipanengneng so panangaro to. Ibabaga na Biblia ya no antoy ingganggan nen Jehova ed si Noe, “ontan so ginawa to.” (Genesis 6:22) Kasin labay mo ya ontan met so ibaga nen Jehova nipaakar ed sika?

12. Antoy gawaen tayo pian napaliket tayoy Jehova?

¹² Antoy nalilikna nen Jehova no uunoren tayo? Napapaliket tayoy puso to. (Proverbio 11:20; 27:11) Isip mo pa itan! Napaliket tayo so Amalsa ed uniberso no unoren tayo. Balet agto tayon balot pipiliten ya onunor ed sikato. Imbes, aabuloyan to itayo ya mandesisyon a bukor. Labay ya ibaga, sikatayoy mandesisyon no kasin manggawa tayoy duga odino aliwa. Labay nen Jehova ya pakiwasen itayo na panangaro tayod sikato ya manggawa na dugan desisyon pian nawalaan itayo na sankaabigan ya bilay.​—Deuteronomio 30:15, 16, 19, 20; nengnengen so Kaaruman ya Impormasyon 3.

13, 14. Panon tayon amta ya saray ganggan nen Jehova et aliwan mairap ya unoren? Mangiter na alimbawa.

¹³ Panon to no iisipen tayon mairap ya unoren iray ganggan nen Jehova odino lapud saratan et singa itayo napepegetan? Oniay malinew ya ibabaga na Biblia: “Saray ganggan to et aliwan makapabelat.” (1 Juan 5:3) Say Griegon salita parad “makapabelat” et inusar ed arum ya teksto pian deskribien iray agmakatunongan ya totontonen, odino totoo ya sasalien dan kontrolen tan sakitan so arum. (Mateo 23:4; Gawa 20:29, 30) Diad  bersion na Biblia ya Maung a Balita et oniay nabasa: “Aliwan mairap ya unoren iray ganggan to.” Saray ganggan nen Jehova et aliwan ‘ambelat,’ kanian aliwan mairap ya unoren. Sikatoy lanang ya makonsidera ed saray ipapagawa tod sikatayo.

¹⁴ Alimbawa, imadyin mon tutulongan moy kaarom ya onalis ed balon panayaman to. Inkahon to la ray gamit to. Wala ray kahon ya anlemew tan mainomay ya alsaen, balet wala met iray ambelat tan kaukolan ya duaran too so mangalsa. Kasin ipaalsa tod sikan bukor so ambelbelat ya kahon? Siempre andi! Akin ey? Lapud agto labay ya narisgo ka. Singa satan ya kaaro, agbalot ipagawa nen Jehova ed sikatayo iray panirapan tayo. (Deuteronomio 30:11-14) Natatalosan nen Jehova so kipapasen tayo. “Amta to so inkagawa tayo, a sankanonot ton dabok itayo.”​—Salmo 103:14.

15. Akin et makaseguro tayo ya saray ganggan nen Jehova et parad pankaabigan tayo?

¹⁵ Imbaga nen Moises ed nasyon na Israel ya saray ganggan nen Jehova et parad ‘pankaabigan da ed amin a panaon,’ tan no unoren da iratan et ‘mantultuloy iran manbilay.’ (Deuteronomio 5:28-33; 6:24) Ontan met natan. Amin ya ipapagawa nen Jehova et ontulong ed sikatayo pian magmaliw ya mas maliket so bilay tayo. (Basaen so Isaias 48:17.) Amta nen Jehova, say Ama tayo, no antoy sankaabigan parad sikatayo. (Roma 11:33) Ibabaga na Biblia: “Say Dios et aro.” (1 Juan 4:8) Kabaliksan na satan ya amin ya ibabaga tan gagawaen nen Jehova et lapud aro.

16. Panon tayon amta ya sarag tayoy magmaliw ya maunor anggano ag-itayo perpekto tan manbibilay tayod mauges a mundo?

¹⁶ Aliwan lanang ya mainomay parad sikatayo ya unoren so Dios. Manbibilay tayod mauges a mundo ya  uuleyan na Diablo. Iimpluensyaan to ray totoo ya manggawa na mauges. (1 Juan 5:19) Kaukolan tayo met ya labanan so agperpekton kanonotan tan liknaan tayo ta lapud saratan et walay tendensia tayon ag-unoren so Dios. (Roma 7:21-25) Balet say panangaro tayo ed si Jehova so mamapabiskeg ed sikatayon gawaen so duga. Nanenengneng to iray pansasagpot tayon unoren iray ganggan to, tan tutulongan to itayo panamegley na mabiskeg ya masanton espiritu to. (1 Samuel 15:22, 23; Gawa 5:32) Panamegley na masanton espiritu et niwala ed sikatayo iray kualidad ya makatulong pian mas mainomay tayon unoren si Jehova.​—Galacia 5:22, 23.

17, 18. (a) Anto ray aralen tayo ed sayan publikasyon? (b) Antoy pantongtongan tayo ed ontumbok ya kapitulo?

¹⁷ Diad sayan publikasyon, naaralan tayoy manbilay diad paraan ya makapaliket ed si Jehova. Aralen tayo met no panon tayon iyaplika ed mismon bilay tayo iray prinsipyo tan estandarte to ed moral. Tandaan ya ag-itayon balot pipiliten nen Jehova ya onunor ed sikato. No pilien tayoy onunor, onaligwas itayo tan nawalaan tayoy balibalin bilay ed arapen. Manuna ed amin, no unoren tayoy Dios, nipanengneng tayo so kaaralem na panangaro tayod sikato.​—Nengnengen so Kaaruman ya Impormasyon 4.

¹⁸ Pian nibiig tayo no antoy duga tan aliwa, inikdan nen Jehova so balang sakey ed sikatayo na konsiensia. No ipasal tayoy konsiensia tayo, ontulong itan pian “unoren tayo ray ganggan to.” Anto balet so konsiensia, tan panon tayon nipasal itan? Nengnengen tayo ed ontumbok ya kapitulo.