1-3. (a) Antoy nalilikna na dakel a totoo ed trabaho da? (b) Anto ran tepet so ebatan tayo ed sayan kapitulo?

MANSASAGPOT iray totoo ed interon mundo pian nasuportaan so sarili da tan say pamilya da. Balet dakel so agmaliket ed trabaho da, tan wala ni ingen iray napipilitan labat ya mantrabaho ed kada agew. No ontan so naliliknam, antoy nagawaan mo pian mas naliketan kad trabahom? Antoy gawaen mo pian agka napipilitan ed pankikimey mo?

² Imbaga nen Jehova: “Balang sakey et nepeg a mangan tan oninum tan manliket ed amin a pansasagpot to. Saya et regalo na Dios.” (Eclesiastes 3:13) Pinalsa itayo nen Jehova ya kaukolan tan labay tayoy mankimey. Labay ton naliketan tayo ed saray nagagawaan tayo.​—Basaen so Eclesiastes 2:24; 5:18.

³ Kanian, anto sirin so makatulong pian naliketan tayo ed kimey tayo? Anto ran trabaho so nepeg ya paliisan na saray Kristiano? Panon tayon balansien so trabaho tan panagdayew tayo ed si Jehova? Tan anto so sankaimportantian ya kimey tayo?

4, 5. Antoy panmoria nen Jehova ed panagkimey?

⁴ Labalabay nen Aman Jehova so mankimey. Ibabaga na Genesis 1:1: “Diad gapo et pinalsa na Dios so tawen  tan say dalin.” Kayarin pinalsa na Dios so dalin tan amin a wadia, imbaga to ya amin a pinalsa et “agaylay abig.” (Genesis 1:31) Aliketan a maong so Amalsa ed saray ginawa to.​—1 Timoteo 1:11.

⁵ Ag-ontutundan mankimey si Jehova. Imbaga nen Jesus: “Say Amak et mankikimey ni anggad natan.” (Juan 5:17) Anggan agtayo amta so amin ya makapadinayew a gagawaen nen Jehova, wala ray amta tayo nipaakar ed saratan. Singa bilang, amta tayo ya sikatoy manpipili na saray nakaiba nen Jesu-Kristo ya manuley ed Panarian. (2 Corinto 5:17) Tuloytuloy met ya igigiya tan aasikasoen nen Jehova iray totoo. Lapud panagpulong ya nagagawa ed interon mundo, nakakabat na minilyon a totoo si Jehova tan naiikdan iray ilalo ya manbilay na andi-anggaan diad paraison dalin.​—Juan 6:44; Roma 6:23.

6, 7. Anton klase na komikimey si Jesus?

⁶ Singa say Ama to, labalabay nen Jesus so mankimey. Antis ya linmad dalin, sikato so “marundunong a komikimey” ya kaiba na Dios ed impanggawa ed amin a bengatla diad tawen tan dalin. (Proverbio 8:22-31; Colosas 1:15-17) Nen wadiad dalin si Jesus, tuloytuloy ya makulikulin nankimey. Nen ugaw ni, inaral toy magmaliw ya eksperton karpentero a manggagaway abung, yurongan, lamisaan tan arum ni. Marundunong si Jesus ed kimey to kanian sikatoy kabkabat bilang “karpentero.”​—Marcos 6:3.

⁷ Balet say sankaimportantian ya kimey nen Jesus diad dalin et say pangipulong na maong a balita tan pangibangat na nipaakar ed si Jehova. Sinumpal toy ministeryo to ed loob na talora tan kapalduan taon, tan nansagpot ya maong manlapud palbangon anggad lablabi  la. (Lucas 21:37, 38; Juan 3:2) Nanakar si Jesus na nilasus kilometro ed saray marabok ya karsada pian nipakabat so maong a balita ed dakel a totoo anggad posible.​—Lucas 8:1.

8, 9. Akin ya maliket si Jesus ed kimey to?

⁸ Parad si Jesus, say panggawa ed kimey na Dios et singa naakan. Satan so angiter ed sikato na kasil tan biskeg. Wala ray agew ya impasyay impankimey nen Jesus kanian agla angan. (Juan 4:31-38) Inusar toy amin a pankanawnawa ya tulongan so arum ya nakabat so Ama to. Kanian sarag ton ibaga ed si Jehova: “Inggloria ta ka diad dalin, a sinumpal koy kimey ya impagawam ed siak.”​—Juan 17:4.

⁹ Parehon mansasagpot a maong si Jehova tan si Jesus kanian naliliketan tan napepenek ira ed kimey da. Labay tayon ‘aligen so Dios,’ tan ‘maapit a tumboken iray bakat’ nen Jesus. (Efeso 5:1; 1 Pedro 2:21) Kanian importante ya mansagpot tayon maong tan iter tayoy sankaabigan tayo ed amin ya gagawaen tayo.

10, 11. Antoy makatulong pian magmaliw tayon positibo ed trabaho tayo?

¹⁰ Bilang lingkor nen Jehova, mansasagpot tayon maong pian nasuportaay sarili tan pamilya tayo. Labay tayon maliket tayo ed trabaho tayo, balet no maminsan et mairap. Kanian antoy marakep ya gawaen tayo no ag-itayo naliliketan ed trabaho tayo?

¹¹ Magmaliw ya positibo. Nayarin anggapoy nagawaan tayo pian umanen so pasen ya pantratrabahoan tayo odino say karakel na oras ya pantrabaho tayo, balet sarag tayon umanen so panmoria tayo. Makatulong no  isipen tayoy iilaloan nen Jehova ed sikatayo. Singa bilang: Iilaloan nen Jehova ya itarya na saray ulo na pamilya so pankaukolan na pamilya da diad anggaay nayarian da. Diad tua, ibabaga na Biblia a say sakey ya agto tataryaan so pamilya to et “alabas ni nen say toon anggapoy pananisia to.” (1 Timoteo 5:8) No sakey kan ulo na pamilya, mankuli ka pian nitaryaan moy pamilyam. Balanglan labay mo odino andi so trabahom, antam ya no itataryaan moy pamilyam et napapaliket mo met si Jehova.

12. Antoy gunggona no makuli tan matua itayo?

¹² Magmaliw ya makuli tan matua. Makatulong itan pian mas naliketan kad trabahom. (Proverbio 12:24; 22:29) Sakey ni, panmatalekan ka na amom. Saray matua ya empleyado et labalabay na saray amo lapud ag-ira mantakew na kuarta, materyales, odino oras. (Efeso 4:28) Manuna ed amin, nanenengneng nen Jehova no makuli tan matua ka ed trabahom. Nawalaan kay ‘malinis a konsiensia’ lapud antam ya napapaliket moy Dios ya inar-arom.​—Hebreo 13:18; Colosas 3:22-24.

13. Anto ni nayarin resulta no matua itayo ed trabaho?

¹³ Tandaan ya say ugalim ed trabaho et nayarin mangidayew ed si Jehova. Satan so sakey nin rason no akin ya nayarin naliketan ka ed trabahom. (Tito 2:9, 10) Ompan wala ni ingen so katrabahom ya manpaiyaral na Biblia lapud maabig ya alimbawam.​—Basaen so Proverbio 27:11; 1 Pedro 2:12.

14-16. Antoy nepeg tayon nonoten antis tayon awaten so sakey a trabaho?

¹⁴ Anggapoy nabasa ed Biblia ya listaan na saray trabaho ya nayari tan agnayarin awaten na sakey a Kristiano.  Balet nabasa ditan iray prinsipyo ya makatulong ed sikatayon manggawa na dugan desisyon nipaakar ed trabaho. (Proverbio 2:6) Usaren tayo iray prinsipyo na Biblia pian ebatan irayan tepet.

¹⁵ Kasin lapud sayan trabaho et makagawa ak na aglabay nen Jehova? Naaralan tayo la iray kagagawa ya kabusol nen Jehova, singa say panagtakew tan panagtila. (Exodo 20:4; Gawa 15:29; Efeso 4:28; Apocalipsis 21:8) Kanian manalwar tayo pian napaliisan tayo iray trabaho ya kontra ed estandarte nen Jehova.​—Basaen so 1 Juan 5:3.

 ¹⁶ Kasin susuportaan o ipapaseseg na sayan trabaho iray kagagawa ya kabusol nen Jehova? Singa bilang, panon to no walay mangala ed sika ya mantrabaho bilang receptionist na clinic parad aborsion? Aliwan mauges so magmaliw ya receptionist. Balet antam no antoy panmoria nen Jehova ed aborsion. Kanian anggano aliwan sikan mismo so manggagawa na aborsion, agka kasi nakonsiensia ya diad pakanengneng nen Jehova et kakutsaba ka ed satan?​—Exodo 21:22-24.

17. Antoy makatulong ed sikatayon manggawa na desisyon ya makapaliket ed Dios?

¹⁷ No iyaplika tayo iray prinsipyo na Dios, magmaliw tayon singa saramay adeskribe ed Hebreo 5:14 ya “diad panguusar dad pakayari ran manebek et nipapasal itan a mangibiig ed duga tan aliwa.” Tepetan moy sarilim: ‘No awaten ko yan trabaho, kasin wala ray nagapol? Kasin lapud sayan trabaho et kaukolan koy onla ed arum a bansa kanian nataynan koy asawak tan ananak ko? Antoy epekto na satan ed sikara?’

18. Akin et nayarin mairap ya iyuna so panagdayew tayo?

¹⁸ Nayarin mairap ya iyuna so panagdayew tayo ed si Jehova diad sarayan “mapeligro tan mair-irap a panaon.” (2 Timoteo 3:1) Mairap so mananap na trabaho tan mansiansia ed satan. Kaukolan tayon asikasoen so pamilya tayo balet amta tayo ya nepeg tayon iyuna so panagdayew tayo. Agtayo labay ya magmaliw a mas importante ed bilay tayo iray materyal a bengatla. (1 Timoteo 6:9, 10) Kanian panon tayon ‘naseguro iray mas importantin bengatla’ legan tayon itatarya so pankaukolan na pamilya tayo?​—Filipos 1:10.

19. Panon a makatulong so panagmatalek ed si Jehova pian magmaliw tayon balanse ed trabaho tayo?

 ¹⁹ Manmatalek ed si Jehova diad interon puso. (Basaen so Proverbio 3:5, 6.) Segurado tayo ya amta na Dios no antoy kaukolan tayo tan iyaansakit to tayo. (Salmo 37:25; 1 Pedro 5:7) Ibabaga na Salita to: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo. Ta inkuan na Dios: ‘Agta kan balot taynanan, tan agta kan balot paulyanan.’” (Hebreo 13:5) Aglabay nen Jehova ya lanang tayon manaburido ed pangitarya tayoy pankaukolan na pamilya tayo. Aminpigapiga to lan impanengneng ya sarag ton itarya iray pankaukolan na totoo to. (Mateo 6:25-32) Anggan antoy situasyon tayo ed trabaho, regular tayon aaralen so Salita na Dios, ipupulong tayoy maong a balita, tan aatendian tayo iray Kristianon pantitipon tayo.​—Mateo 24:14; Hebreo 10:24, 25.

20. Panon tayon napansiansia ya simpli so bilay tayo?

²⁰ Pansiansiaen ya simpli so mata. (Basaen so Mateo 6:22, 23.) Importante ya pansiansiaen tayon simpli so bilay tayo pian nisentro tayo itan ed panaglingkor ed si Jehova. Amta tayo ya agtayo nepeg ya iyuna so kuarta, maluhon panagbilay, odino sankabaloan iran gadyet, nen say pikakaaro tayo ed Dios. Anto sirin so makatulong ed sikatayon iyuna iray mas importante? Gawaen tayoy anggaay nayarian tayo ya ag-onutang. Balet no walay utang tayo, manggawa tayoy paraan pian nabawasan itan odino nabayaran lan amin. No agtayo manalwar, nayarin upoten na materyal iran bengatla so dakel ya panaon tan biskeg tayo, tan ompan agtayo la makapanpikasi, makapanaral, odino makapanpulong. Imbes ya abuloyan tayon magmaliw ya komplikado so bilay  tayo lapud saray materyal a bengatla, labay tayon aralen so mankontento ed saray talagan kaukolan, singa say “naakan tan kawes.” (1 Timoteo 6:8) Tan anggan antoy situasyon tayo, maabig no sagpaminsan et usisaen tayoy kipapasen tayo no panon tayon naaruman so panaglingkor tayo ed si Jehova.

21. Akin et kaukolan tayoy mandesisyon no antoy iyuna tayo ed bilay tayo?

²¹ Seguroen ya duga iray prayuridad. Kaukolan tayon makabat ya usaren so panaon, biskeg, tan kaykayarian tayo. No agtayo manalwar, nayarin naupot so panaon  tayo ed saray aliwan tanton importantin bengatla, singa say edukasyon odino kuarta. Imbaga nen Jesus: “Itultuloy yo sirin ya anapen nin unona so Panarian.” (Mateo 6:33) Napatnagan ed saray desisyon, kagagawa, inagew-agew a rotina, tan saray labay tayon gawaen ed bilay no antoy manuna ed puso tayo.

22, 23. (a) Anto so sankaimportantian ya kimey tayo bilang Kristiano? (b) Antoy makatulong pian maliket tayod kimey tayo?

²² Say sankaimportantian ya kimey tayo et say panlingkor ed si Jehova tan pangipulong ed maong a balita. (Mateo 24:14; 28:19, 20) Singa si Jesus, labay tayon gawaen so sankaabigan tayo ed sayan kimey. Saray arum et inmalis ed saray lugar ya mas dakel so kaukolan ya manpulong. Tan wala ray nanaral na sananey a lenguahe pian napulongan da ray totoo ya mansasalita ed satan ya lenguahe. Mitongtong ka ed saramay ontan so ginawa ra, tan tepetan mo ra. Seguradon ibaga rad sika ya nagmaliw a mas maliket tan makabaliksan so bilay da.​—Basaen so Proverbio 10:22.

²³ Diad panaon tayo, dakel ed sikatayo so manguusar na dakel ya oras ed trabaho, odino diad pigaran trabaho, pian labat nitarya iray manunan pankaukolan na pamilya tayo. Amta itan nen Jehova, tan aapresyaen to so amin ya gagawaen tayo pian naasikasoy pamilya tayo. Kanian itultuloy tayo komon ya aligen si Jehova tan si Jesus ya mankuli tayo, anggan antoy kimey o trabaho tayo. Tan agtayo komon lilingwanan ya say sankaimportantian ya kimey tayo et say panlingkor ed si Jehova tan pangipulong ed maong a balita na Panarian na Dios. Satan so mangiter ed sikatayo na tuan liket.