1, 2. Anton baleg a kimey so impasakbay nen Jesus, tan anto so importantin tepet?

DAKEL so pormisa na saray politiko ya agnatotoor. Anggan maong met so intension na arum ed sikara, agda nagagawaay impormisa da. Balet, makapalikliket ta aliwan ontan so Mesianikon Ari, si Jesu-Kristo, ta lanang ton totoorey sipan to.

² Sanen nagmaliw ya Ari si Jesus nen 1914, sikatoy akaparaan a manumpal ed propesiyan imbaga to manga 1,900 taon lay apalabas. Antis ya ompatey, impasakbay to: “Sayan maong a balita na panarian so nipulong ed interon dalin.” (Mat. 24:14) Say pakasumpal na satan et kabiangan na tanda na kiwawala to bilang ari ed Panarian. Balet, niay importantin tepet: Panon ya makapangorganisa so Ari na dakdakel ya mabulos a managpulong diad kaunoran iran agew, anta diad satan a panaon et dakel so makasarili, andiay panangaro, tan anggapoy takot ed Dios? (Mat. 24:12; 2 Tim. 3:1-5) Kaukolan tayon naamtaan so ebat ta nalalanor ed satan so amin a tuan Kristiano.

3. Panon ya impanengneng nen Jesus so panagmatalek, tan siopay akaaralan tod satan?

³ Imanoen pa lamet imay impasakbay nen Jesus. Agta ipapanengneng na salitan “so nipulong” ya walay talek to? On! Segurado si Jesus ya wala ray mabulos ya onsuporta diad kaunoran iran agew. Akin et ontan lay panagmatalek to? Naaralan to itan ed Ama to. (Juan 12:45; 14:9) Antis a nagmaliw ya too si Jesus, naobserbaan ton mismo ya matalek si Jehova a wala ray mabulos a mandayew ed Sikato. Amtaen tayo no panon itan ya impanengneng nen Jehova.

4. Anton kimey so kinerew nen Jehova ya suportaan na saray Israelita, tan antoy ginawa ra?

⁴ Pawilen tayo pa may agawa sanen ingganggan nen Jehova si Moises ya mangipaalagey na tabernakulo odino tolda ya pandayeway nasyon na Israel. Panamegley nen Moises, kinerew nen Jehova ed totoo to ya suportaan day kimey. Kuan nen Moises: “Siopaman a mabulos so puso to, sikato komon so mangiyakar na iyaapay ed Jehova.” Antoy resulta?  Saray totoo et ‘kinabuasan a nantultuloy ya angiyakar na saray bagbagat.’ Diad karakel na inawit da, kaukolan iran ‘paeren odino patundaen a mangiyakar’ na antokaman! (Exo. 35:5; 36:3, 6) Pinaneknekan na saray Israelita ya napanmatalkan ira nen Jehova.

5, 6. Base ed Salmo 110:1-3, antoy iilaloan nen Jehova tan nen Jesus ed saray tuan managdayew diad kaunoran iran agew?

⁵ Diad kaunoran iran agew, nailaloan met kasi nen Jehova ya mabulos a manlingkor iray mandadayew ed sikato? On! Masulok a 1,000 taon antis ya inyanak si Jesus diad dalin, pinuyanan nen Jehova si David ya isulat so panaon sano onggapon manuley so Mesias. (Basaen so Salmo 110:1-3.) Wala ray kalaban ya onsumpad si Jesus, say balon nitronon Ari. Balet, dakel met so onsuportad sikato. Ag-ira piliten ya manlingkor ed Ari. Anggan saray kalangweran et mabulbulos dan iyapay so inkasikara. Diad karakel da, sikaray miparad agnabilang ya linaew a manasakbong ed dalin no kabuasan. *

⁶ Amta nen Jesus ya ontutukoy ed sikato imay propesiya ed Salmo 110. (Mat. 22:42-45) Kanian, nailaloan ton wala ray matoor ya onsuporta ed sikato tan mabulbulos dan iyapay so inkasikara pian ipulong so maong a balita diad interon dalin. Antoy ipapanengneng na history? Akapangorganisa kasi so Ari na dakerakel tan mabulos ya managpulong diad sarayan kaunoran ya agew?

7. Sanen nitrono ya Ari si Jesus, antoy ginawa to pian iparaan iray onsusuportad sikato parad kimey ed arapen?

⁷ Ag-abayag kayarin nitronon Ari si Jesus, imparaan to ray papatumbok to parad baleg a kimey. Naaralan tayod Kapitulo 2 ya sikatoy nanggawa na panag-usisa tan  panaglinis manlapud 1914 anggad gapo na 1919. (Mal. 3:1-4) Insan nen 1919, tinuro toy matoor ya aripen a mangidaulo ed saray papatumbok to. (Mat. 24:45) Manlapu lad saman, ginmapon angitarya so aripen na espiritual a naakan​—panamegley na saray paliwawad kombension tan niimprintan publikasyon. Aminpigan nidanet ed saratan ya responsabilidad na kada Kristiano so manpulong.

8-10. Panon ya akatulong iray kombension pian napaseseg a manpulong iray agagi? Mangiter na alimbawa. (Nengnengen met so kahon ya “ Saray Kombension Nensaman ya Angipaseseg ed Panagpulong.”)

⁸ Saray paliwawa ed kombension. Lapud labay na Saray Estudyante na Biblia so makaawat na instruksion, nantitipon irad Cedar Point, Ohio, U.S.A., manlapud Setyembre 1-8, 1919, parad onunan baleg a kombension kayari Sankamundoan a Guerra I. Diad komaduan agew, nampaliwawa si Brother Rutherford tan prangka ton imbagad saray delegado: “Say misyon na sakey a Kristiano diad dalin . . . et iyabawag so mensahe na panarian na Katawan.”

⁹ Kayari taloy agew, agawa imay agnalinglingwanan ya paliwawa nen Brother Rutherford ya “Parad Saray Kaiban Komikimey.” Im-publish itan ed The Watch Tower diad teman “Mangipapalapag ed Panarian.” Inkuan nen Brother Rutherford: “Seryoson itepet na kada Kristiano ed sarili to, Akin et wadia ak ed dalin? Tan nepeg ya say ebat et, Mapangasin ginawa ak ya embahador na Katawan pian ipasabi ed mundo so mensahe na pikakareenan, tan pribilehyok tan obligasyon kon iyabawag itan a mensahe.”

¹⁰ Diad satan ya agnalinglingwanan a paliwawa, inyanunsio nen Brother Rutherford a walay balon magasin ya The Golden Age (tatawagen natan ya Onliing!). Iwanwan na satan so totoo ed Panarian, say alenleneg ya ilalo na katooan. Insan to intepet no pigarad saray inmatendi so malabay ya mangibunog ed sayan dyurnal. Oniay report na kombension: “Makapalikliket so reaksion da. Inmalagey so amin ya 6,000 ya inmatendi!” * Malinew, wala ray maliket tan mabulos ya onsusuportad Ari ya mangiyabawag ed Panarian to!

11, 12. Base ed The Watch Tower nen 1920, kapigan gawaen so kimey ya impasakbay nen Jesus?

¹¹ Saray niimprintan publikasyon. Panamegley na The Watch Tower, lalon linminew so kaimportantian na kimey ya impasakbay nen Jesus​—say pangipulong ed maong a balita na Panarian. Imanoey pigaran alimbawa diad gapo na 1920’s.

¹² Anton mensahe so iyabawag bilang kasumpalan na Mateo 24:14? Kapigan itan gawaen? Oniay impaliwawa na Hulyo 1, 1920 ya The Watch Tower diad artikulon “Ebanghelyo na Panarian”: “Sayan maong a balita et nipaakar ed panampot na daan ya uksoyan na saray bengatla tan say kiletneg na panariay Mesias.” Oniay malinew ya impaamta na artikulo no kapigan ipulong iyan mensahe: “Kaukolan ya  ipasabi iyan mensahe manlapud panaon na [unonan] sankamundoan a guerra anggad ‘baleg ya kairapan.’” Kanian, impaimano na artikulo: “Natan la so panaon . . . ya iyabawag ed amin ya Kakristianoan iyan maong a balita.”

13. Panon ya pinaseseg na The Watch Tower nen 1921 iray alanaan ya mabulos a mankimey?

¹³ Kasin piliten iray totoo na Dios ya manggawad kimey ya impasakbay nen Jesus? Andi. Say artikulon “Manpakpel Kayo,” ed Marso 15, 1921 ya isyu na The Watch Tower so amaseseg ed saray alanaan ya mabulos a mankimey. Kinerew ed sikaran tepetay sarili da: “Agta baleg a pribilehyok tan obligasyon koy mibiang ed sayan kimey?” Inkuan ni na artikulo: “Segurado kami ya no ipasen mon [pribilehyo so mibiang ed kimey], singa ka si Jeremias a diad puso to et ‘singa mandarlang ya apoy ya akapotan ed saray pukel’ to so salita na Katawan, tan mamapakiwas ed sikaton ag-ontundan mansalita.” (Jer. 20:9) Ipapanengneng na satan ya panamaseseg so talek nen Jehova tan nen Jesus ed saray matoor ya onsusuportad Panarian.

14, 15. Nen 1922, panon ya pinaseseg na The Watch Tower iray alanaan a Kristiano ya ipulong so mensahe?

¹⁴ Panon ya nipulong na saray tuan Kristiano so mensahe na Panarian? Diad antikey balet mapuersan artikulo ya “Importante so Panaglingkor,” ed Agosto 15, 1922 ya isyu na The Watch Tower, apakiwas iray alanaan a Kristiano ya “aktibon mangipalima na publikasyon ed saray totoo tan manpulong ed kaabungan, ya ibagan asingger lay panarian na tawen.”

¹⁵ Malinew ya manlapu nen 1919, uusaren la na Kristo so matoor tan makabat ya aripen pian maminpigan idanet so pribilehyo tan obligasyon na saray Kristiano ya iyabawag so mensahe na Panarian. Balet, antoy reaksion na Saray Estudyante na Biblia ed panamaseseg ya mibiang diad pangiyabawag ed Panarian?

16. Antoy reaksion na pigaran imboto ya elder ed ideyan amin et nepeg a mibiang ed ministeryo?

¹⁶ Nen 1920’s tan 1930’s, kinontra na arum so ideyan amin ya alanaan a Kristiano et nepeg a mibiang ed ministeryo. Impaliwawa na Nobyembre 1, 1927 ya Watch Tower so agawa: “Wala ray elder ed simbaan [kongregasyon] . . . ya agda labay ya ipaseseg ed saray agagi so pibiang ed panagpulong, tan sikaran mismo et agda labay so manpulong. . . . Kabusol da imay suhestion ya ipulong ed kaabungan so mensahe na Dios, say Ari tan say panarian to.” Oniay prangkan imbaga na artikulo: “Panaon la pian tandaan na matoor ya agagi iratan a totoo tan paliisan da ra, tan ibagad sikaran agla ra kualipikadon magmaliw ya elder.” *

17, 18. Antoy reaksion na maslak ya agagid kongregasyon ed instruksion na matoor ya aripen, tan antoy reaksion na minilyon a totoo diad apalabas ya 100 taon?

¹⁷ Makapalikliket, maslak ed saray agagid kongregasyon et akaparaan ya ontulok ed instruksion na matoor ya  aripen. Impasen dan pribilehyo ya inabang so mensahe na Panarian. Oniay imbaga na The Watch Tower ya Marso 15, 1926: “Saray matoor et manboluntaryo, . . . ya ibaga iyan mensahe ed saray totoo.” Tinoor na saratan a matoor a Kristiano so propesiyad Salmo 110:3 tan pinaneknekan dan mabulos iran onsusuporta ed Mesianikon Ari.

¹⁸ Diad apalabas ya 100 taon, mabulbulos ya inyapay na minilyon a totoo so inkasikara pian gawaen so kimey ya pangiyabawag ed Panarian. Diad onsublay iran kapitulo, pantongtongan tayo no panoy impanpulong da, saray paraan tan kagawaan ya inusar da, tan no antoy resulta. Balet, pantongtongan tayo nin unona no akin ya minilyon so boluntaryon mangipupulong ed Panarian, anggaman wala tayod makasarilin mundo. Legan tayon aamtaen so rason, tepetay sarili tayo, ‘Akin et inanabang kod arum so maong a balita?’

19. Akin et uunoren tayoy simbawa nen Jesus ya “itultuloy . . . ya anapen nin unona so Panarian”?

¹⁹ Sinimbawa nen Jesus iray papatumbok to ya “itultuloy . . . ya anapen nin unona so Panarian.” (Mat. 6:33) Akin ya uunoren tayo itan ya simbawa? Lapud bibidbiren tayoy kaimportantian na Panarian, say akasentroan na gagala na Dios. Singa naaralan tayod apalabas ya kapitulo, kalkalnan impaamta na masanton espiritu iray makapaliket ya katuaan nipaakar ed Panarian. Sano onsasabid puso tayo iratan ya mablin katuaan, napapakiwas itayon anapen nin unona so Panarian.

20. Panon ya ipapanengneng na ilustrasyon nen Jesus nipaakar ed akaamot a kayamanan so reaksion na papatumbok to ed simbawan itultuloy ya anapen nin unona so Panarian?

²⁰ Amta nen Jesus no antoy reaksion na papatumbok to ed simbawan anapen nin unona so Panarian. Imanoey ilustrasyon to nipaakar ed akaamot ya kayamanan. (Basaen so Mateo 13:44.) Legan ya gagawaen na samay uupaan ya dumaralos so inagew-agew ya kimey to, akaromog na akaamot ya kayamanan tan amoria ton tampol ya mabmabli itan. Antoy ginawa to? “Lapud liket to et sikatoy linman angilako ed kaykayarian to tan sinaliw to iman ya uma.” Antoy naaralan tayo? Nen naamtaan tayoy katuaan na Panarian tan atalosay kablian na satan, maliket itayon nansakripisyo pian niyuna tayoy Panarian. *

21, 22. Panon ya ipapanengneng na saray matoor ya onsusuportad Panarian ya iyuuna da itan? Mangiter na alimbawa.

²¹ Panamegley na gawa aliwan diad salita labat, papaneknekan na saray matoor ya onsusuportad Panarian ya uunaen da itan. Uusaren day bilay, abilidad, tan kaykayarian da pian ipulong so Panarian. Baleg so insakripisyo na dakel pian makapanlingkor ya full-time. Apaneknekan na saray makulin managpulong ya bebendisyonan nen  Jehova iray mangiyuunad Panarian. Niay sakey ya alimbawa nensaman.

²² Si Avery tan Lovenia Bristow et colporteur (payunir) diad southern United States manlapu nen mansampot so 1920’s. Kayari na pigaran taon, imbaga nen Lovenia: “Malikeliket kami nen Avery ya nampayunir diad dakel a taon. Wala ray panaon ya agmi amtay pangalaan mi isaliw na gasolina o naakan. Balet lanang ya mangitatarya si Jehova. Agkamin balot tinmundan nampayunir. Walan-wala iray nakaukolan mi.” Anonotan nen Lovenia imay agawa nen manlilingkor irad Pensacola, Florida tan anggapo lay kuarta tan naakan da. Kasempet dad trailer da, walay duaran bag ya napnoy grocery tan walay akasulat ya, “Impangaro na Pensacola Company.” * Legan ya iisipen nen Lovenia so pigaran dekadan impanpayunir to, oniay inkuan to: “Agkamin balot pinaulyanan nen Jehova. Agto kamin balot dinismaya.”

23. Antoy panmoriam ed naamtaan mon katuaan na Panarian, tan antoy determinadom ya gawaen?

²³ Aliwan pareparehoy nagawaan tayod panagpulong. Nandurumay sirkumstansya tayo. Balet parad sikatayon amin, pribilehyo so interon kamarerwan pangiyabawag ed maong a balita. (Col. 3:23) Lapud importantid sikatayo so nalmo tayon mablin katuaan na Panarian, mabulos tan akaparaan tayon mansakripisyo pian sigpot ya makapanlingkor. Agta ontan so determinadom ya gawaen?

24. Antoy sakey ed saray baleg ya agawaan na Panarian diad kaunoran iran agew?

²⁴ Diad apalabas ya 100 taon, talagan susumpalen na Ari so propesiya ton nabasad Mateo 24:14. Tan agto pipiliten iray papatumbok to. Lapud ag-ira kabiangan na sayan makasarilin mundo, mabulbulos dan inyapay so inkasikara pian manpulong. Say pangipupulong dad maong a balita ed interon mundo et kabiangan na tanda na kiwawala nen Jesus bilang Ari ed Panarian​—tan sakey itan ed saray baleg ya agawaan na Panarian diad kaunoran iran agew.