LEKSION 24
Siopa Iray Anghel tan Antoy Gagawaen Da?
Labay nen Jehova ya nakabat tayo so pamilya to diad tawen. Kaiba ed pamilya to iray anghel ya tatawagen ya “ananak na Dios.” (Job 38:7) Antoy ibabaga na Biblia tungkol ed saray anghel? Sarag da kasin impluensyaan iray totoo? Kasin amin ya anghel et parte na pamilya na Dios?
1. Siopa ray anghel?
Antis ya ginawa nen Jehova so dalin, pinalsa to ni ray anghel. Singa si Jehova, agnanengneng iray anghel ta espiritu ra, tan manaayam ira ed tawen. (Hebreo 1:14) Minilyon iray anghel, tan nanduruma so personalidad na kada sakey ed sikara. (Apocalipsis 5:11) Sikaray “manusumpal ed salita [nen Jehova] tan manguunor ed boses to.” (Salmo 103:20) Nensaman, wala ray pankanawnawa ya ibabaki nen Jehova iray anghel to pian ipasabi so mensahe to, tulongan tan iliktar iray totoo to. Natan, igigiya na saray anghel iray Kristiano ed totoo ya labay dan nakabat so Dios.
2. Siopa si Satanas tan saray demonyo to?
Wala ray anghel ya agnanmatoor ed si Jehova. Say unonan anghel ya nanrebelde et “samay tatawagen a Diablo tan Satanas, a mangibabalang ed interon mundo.” (Apocalipsis 12:9) Labay nen Satanas ya sikatoy dayewen na arum, kanian inimpluensyaan toy inmunan too, si Adan tan Eva, tan arum nin anghel ya manrebelde met. Saraman ya rebelden anghel et tatawagen ya demonyo. Pinaekal ira nen Jehova ed tawen tan imbantak to ra diad dalin, tan asingger la ran naderal.—Basaen so Apocalipsis 12:9, 12.
3. Panon itayon sasalien ya impluensyaan nen Satanas tan saray demonyo?
Si Satanas tan saray demonyo to et ibabalang o iimpluensyaan da so dakel a totoo, tan uusaren da so demonismo o espiritismo. Satan et mauges ya kagagawa ya pitongtong ed saray espiritu. Singa bilang, saray arum ya totoo et onkokonsulta ed saray astrologo, managparles, managhula, tan albularyo. Saray arum et manpapatambal panamegley na espiritismo. Naloloko tan napapanisia met iray totoo ya sarag day mitongtong ed saray inaatey. Balet, imbaga nen Jehova: “Agkayo onaasingger ed saray espiritista, tan agkayo onkokonsulta ed saray managparles.” (Levitico 19:31) Imbaga iya nen Jehova ed sikatayo ta labay to tayon protektaan ed si Satanas tan ed saray demonyo. Kakalabanen da so Dios, tan labay da tayon sakitan.
DAKEL NI NAARALAN MO
Amtaen so maong ya gagawaen na saray anghel, no akin ya delikado so espiritismo, tan no panon itayon naprotektaan ed si Satanas tan ed saray demonyo.
4. Tutulongan na saray anghel iray totoo ya nakabat si Jehova
Aliwan saray anghel na Dios so direktan manpupulong ed saray totoo. Pero, sarag dan igiya iray tuan Kristiano pian naanap iray totoon labay dan nakabat so Dios. Basaen so Apocalipsis 14:6, 7, insan ebatan iraya:
-
Akin et kailangan tayoy tulong na saray anghel pian makapanpulong tayo?
-
Antoy naliliknam nen naamtaan mon sarag kan igiya na saray anghel ed saray totoon labay dan naamtaan so katuaan ya walad Biblia? Akin ey?
5. Ipulisay o iwasan so espiritismo
Kakalabanen nen Satanas tan saray demonyo si Jehova, tan kalaban da tayo met. Basaen so Lucas 9:38-42, insan ebatan iya:
-
Antoy gagawaen na saray demonyo ed saray totoo?
Agtayo labay so manpaimpluensya ed saray demonyo. Basaen so Deuteronomio 18:10-12, insan ebatan iraya:
-
Antoy gagawaen na saray demonyo pian naimpluensyaan tan nakatongtong da tayo? Anto ran kagagawa so naoobserbaan mo ed lugar yo?
-
Parad sika, kasin duga labat ya imbawal nen Jehova so espiritismo? Akin ey?
I-play so VIDEO, insan ebatan iraya.
-
Parad sika, delikado kasi may insulong nen Palesa ed anak to ya anting-anting? Akin ey?
-
Antoy kailangan ya gawaen nen Palesa pian naprotektaan ed saray demonyo?
Manlapu la nensaman, agmanpapaimpluensya iray tuan Kristiano ed saray demonyo. Basaen so Gawa 19:19 tan 1 Corinto 10:21, insan ebatan iya:
-
Akin et kailangan mon deralen so amin ya gamit mo ya walay koneksion to ed espiritismo?
6. Taloen si Satanas tan saray demonyo to
Say lider na saray demonyo et si Satanas. Balet, say lider na saray matoor ya anghel et say arkanghel ya si Miguel, sananey ya ngaran nen Jesus. Panon kabiskeg si Miguel? Basaen so Apocalipsis 12:7-9, insan ebatan iraya:
-
Siopa so mas mabiskeg? Si Miguel tan saray anghel to odino si Satanas tan saray demonyo to?
-
Parad sika, dapat kasin takotan na saray disipulo nen Jesus si Satanas tan saray demonyo to?
Sarag mon taloen si Satanas tan saray demonyo to. Basaen so Santiago 4:7, insan ebatan iya:
-
Panon mon protektaan so sarilim ed si Satanas tan saray demonyo?
IBABAGA NA ARUM: “Anggapoy uges na pambantay na pelikula o panggalaw na tungkol ed espiritismo.”
-
Akin et delikado no ontan so iisipen mo?
SUMARYO
Tutulongan itayo na saray matoor ya anghel. Kakalabanen nen Satanas tan saray demonyo si Jehova tan uusaren day espiritismo pian lokoen da ray totoo.
Rebyu
-
Panon ya tutulongan na saray anghel nen Jehova iray totoo pian sikatoy nakabat da?
-
Siopa si Satanas tan saray demonyo to?
-
Akin et agtayo labay so mibabali ed espiritismo?
DISKOBRIEN
Amtaen iray ebidensya ya si Jesus so arkanghel ya si Miguel.
Nengnengen iray ebidensya ya say Diablo et aliwa labat ya mauges ya walad dalem na too.
Nengnengen no panon ya nibulos so sakey ya bii ed impluensya na saray demonyo.
“Aromog To so Gagala ed Bilay” (Say Panag-bantayan, Hulyo 1, 1993)
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
