LEKSION 20
No Panon ya Naoorganisa so Kongregasyon
Si Jehova et Dios ya organisado. (1 Corinto 14:33) Kanian iilaloan tayo ya saray totoo to et organisado met. Panon ya naoorganisa so Kristianon kongregasyon? Antoy gawaen tayo pian nasuportaan itan?
1. Siopa so ulo na kongregasyon?
“Say Kristo et ulo na kongregasyon.” (Efeso 5:23) Diad tawen, idadaulo to so kimey na saray totoo nen Jehova ed interon mundo. Walay pinili nen Jesus ya “matoor tan makabat ya aripen”—melag ya grupo na saray eksperiensyadon elder odino mamatatken ya tatawagen met ya Mananguley ya Ulop. (Basaen so Mateo 24:45-47.) Singa saray apostol tan elder ed Jerusalem nensaman, say Mananguley ya Ulop et mangiiter na instruksion ed saray kongregasyon ed interon mundo. (Gawa 15:2) Pero saratan ya lalaki et aliwan lider na organisasyon mi. Mantitiwala ra ed si Jehova, kokonsultaen da so Salita to, tan manpapasakop ira ed si Jesus.
2. Anto so papel na saray elder?
Saray elder et eksperiensyadon lalaki ya ibabangat da so walad Biblia. Singa ra pastol na totoo nen Jehova ta tutulongan tan papabiskegen da ra. Anggapoy sueldo da ed sayan kimey da. Imbes, mabulos iran manlilingkor “diad arapan na Dios; aliwan lapud panangaro ed agmanepeg a nabang, noagta lapud labalabay [dan] gawaen itan.” (1 Pedro 5:1, 2) Saray elder et tutulongan na saray ministeryal a lingkor, tan onsabi panaon et magmaliw met iran kualipikado ya manlingkor bilang elder.
Tuturoen na Mananguley ya Ulop so arum ya elder pian magmaliw ya manangasikaso na sirkito. Sarayan manangasikaso na sirkito so ombibisita ed nanduruman kongregasyon pian mangiter na instruksion tan pabiskegen ira. Uusaren na saray manangasikaso na sirkito so walad Biblia ya kualipikasyon pian turoen iray brother ya magmaliw ya ministeryal a lingkor odino elder.—1 Timoteo 3:1-10, 12; Tito 1:5-9.
3. Anto so papel na kada Tasi?
Amin ed kongregasyon et idadayew da so “ngaran nen Jehova” diad saray aral tan diad pansasagpot dan manpulong.—Basaen so Salmo 148:12, 13.
DAKEL NI NAARALAN MO
Aralen no anton klase na lider si Jesus, no panon ya aaligen na saray elder so alimbawa to, tan no panon itayon mitulongan ed si Jesus tan saray elder.
4. Maomaong ya lider si Jesus
Maar-aro itayon iimbitaan nen Jesus. Basaen so Mateo 11:28-30, insan ebatan iya:
-
Antoy labay nen Jesus ya nalikna tayo ed pangidadaulo to?
Panon ya aaligen na saray elder si Jesus? I-play so VIDEO.
Malinew ya ibabangat na Biblia no panon ya gawaen na saray elder so kimey da.
Basaen so Isaias 32:2 tan 1 Pedro 5:1-3, insan ebatan iraya:
-
Antoy nibagam nen naamtaan mo ya singa si Jesus et maomaong met iray elder?
-
Anto ni ray arum ya paraan ya aaligen na saray elder si Jesus?
5. Gagawaen na saray elder so ibabangat da
Antoy labay nen Jesus ya pangituring na saray elder ed papel da? I-play so VIDEO.
Angiter si Jesus na alimbawa ya tumboken na saray mangidadaulo ed kongregasyon. Basaen so Mateo 23:8-12, insan ebatan iraya:
-
Antoy pandumaan na saray elder ya ontutumbok ed estandarte na Biblia tan saray lider na relihyon? Antoy panbiliban mo ed naobserbaan mo?
-
Pansasagpotan na saray elder ya pabiskegen so espiritualidad da tan na pamilya da
-
Aasikasoen na saray elder so amin ya agagi ed kongregasyon
-
Regular ya manpupulong iray elder
-
Saray elder et manbabangat. Ontutulong met ira ed panaglinis tan arum nin kimey
6. Sarag tayo so mitulongan ed saray elder
Ibabaga na Biblia so importantin rason no akin ya mitulongan tayo ed saray elder. Basaen so Hebreo 13:17, insan ebatan iraya:
-
Akin et ibabaga na Biblia ya ontulok tan manpasakop tayo ed saray mangidadaulo? Parad sika, duga kasi itan?
Basaen so Lucas 16:10, insan ebatan iya:
-
Akin et lanang tayon mitulongan ed saray elder anggano diad saray melag ya bengatla?
IBABAGA NA ARUM: “Agmo la kailangan so onloob ed sakey ya relihyon.”
-
Parad sika, anto ray bendisyon no say sakey et kaiba ed kongregasyon ya mandadayew ed Dios?
SUMARYO
Si Jesus so ulo na kongregasyon. Labalabay tayoy mitulongan ed saray elder ya manpapasakop ed sikato ta papabiskegen da tayo tan makakaaral tayo ed sikara.
Rebyu
-
Siopa so ulo na kongregasyon?
-
Panon ya tutulongan na saray elder so kongregasyon?
-
Anto so papel na kada sakey ya mandadayew ed si Jehova?
DISKOBRIEN
Nengnengen so ebidensya ya walan talagay malasakit na Mananguley ya Ulop tan arum nin elder ed saray Kristiano natan.
Amtaen so gagawaen na saray manangasikaso na sirkito.
Amtaen so papel na bibii diad kongregasyon.
“Kasin Walay Bibiin Ministro Diad Saray Tasi nen Jehova?” (Say Panag-bantayan-E, Setyembre 1, 2012)
Amtaen no panon ya mansasagpot iray elder pian napabiskeg iray kaagian da.
“Saray Elder—‘Kakimeyan Tayo Pian Manliket Itayo’” (Say Panag-bantayan, Enero 15, 2013)
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
