LEKSION 58
Mansiansian Matoor ed si Jehova
Agbalot abuloyan na saray tuan Kristiano so anggan siopa odino anggan anto ya manpatunda ed panagdayew dad si Jehova. Seguradon ontan met so labay mo. Papablien nen Jehova so katooran mo. (Basaen so 1 Awaran 28:9.) Anto kasi ray situasyon ya nayarin nairapan kan mansiansian matoor ed sikato, tan antoy gawaen mo?
1. Anto ray nayarin gawaen na arum pian nairapan itayon manmatoor ed si Jehova?
Salien na arum ya patundaen itayon manlingkor ed si Jehova. Siopay manggawad satan ey? Saramay tinmunda lan manlingkor ed si Jehova tan mangikakayat na tila tungkol ed organisasyon to, ta labay dan pakapuyen so pananisia tayo. Say tawag ed sikara et apostata. Tan wala ray lider na relihyon ya mangikakayat na palson impormasyon tungkol ed sikatayo pian ontunda lan manlingkor ed si Jehova iramay agda aliklikas itan ya patit. Delikado no patulan tayo ray onsusumpa, no basaen tayo ray libro odino blog da, onlad website da, odino bantayan iray video da. Oniay imbaga nen Jesus tungkol ed saramay sasalien dan patundaen iray matoor ya manlilingkor ed si Jehova: “Paulyan yo ra labat. Bulag iran manangigiya. Sirin, no itabin na bulag so sakey nin bulag, napelag iran dua ed abot.”—Mateo 15:14.
2. Panon ya nanengneng ed saray desisyon tayo ya matoor tayod si Jehova?
Lapud inaro tayo si Jehova, paliisan tayoy anggan anto ya walay koneksion tod palson relihyon. Dapat aliwan konektado ed palson relihyon so trabaho tayo, organisasyon ya kawalaan tayo, tan arum nin gagawaen tayo. Oniay imbaga nen Jehova: “Paway kayo ed [Makapanyarin Babilonia], sikayo ran totook.”—Apocalipsis 18:2, 4.
DAKEL NI NAARALAN MO
Aralen no antoy gawaen mo pian agnapakapuy na arum so katooran mod si Jehova. Tan amtaen no panon mon nipanengneng so katooran mo diad ipaway mod Makapanyarin Babilonia.
3. Manalwar ed saray mangibabangat na aliwan tua
Antoy reaksion tayo no makarengel tayoy negatibo iran balita tungkol ed organisasyon nen Jehova? Basaen so Proverbio 14:15, insan ebatan iya:
-
Akin et agtayo basta panisiaan iray nababalitaan tayo?
Basaen so 2 Juan 9-11, insan ebatan iraya:
-
Panoy pangipasen tayod saray apostata?
-
Anggano agtayo direktan nakakatongtong iray apostata, anto ray posiblin paraan ya naimpluensyaan da tayo ed saray bangat da?
-
Anto kasi nalikna nen Jehova no dengelen tayo ray negatibon ibabaga na arum tungkol ed sikato tan ed organisasyon to?
4. Mansiansian matoor ed Dios no walay agin akagawa na seryoson kasalanan
No naamtaan tayon walay agi ya akagawa na seryoson kasalanan, antoy obligasyon tayo? Nengnengen ta no antoy naaralan ta’n prinsipyo ed samay Ganggan na Dios diad Israel nensaman. Basaen so Levitico 5:1.
Ipapaimano na satan ya teksto ya no naamtaan tayon akagawa na seryoson kasalanan so sakey, ibaga tayod saray elder so amta tayo. Pero antis tayon gawaen ’tan, mas maabig no bilinen tayo may akagawa na lingo ya sikaton mismo so onlad saray elder tan ipatua to so kasalanan to. No agto labay, ipanengneng tayon matoor tayod si Jehova tan ibaga tayod saray elder so amta tayo. Akin et pakanengnengan itan ya matoor tan inaro tayo . . .
-
si Jehovan Dios?
-
imay toon nankasalanan?
-
iray agagi ed kongregasyon?
No napepeligroy sakey ya agi, tulongan mo!
5. Agla ompapawil ed Makapanyarin Babilonia
Basaen so Lucas 4:8 tan Apocalipsis 18:4, 5, insan ebatan iraya:
-
Wala ni kasid listaan so ngaran ko ya membro ak ni na sakey ya palson relihyon?
-
Membro ak ni kasi na organisasyon ya konektado ed arum ya relihyon?
-
Susuportaan kasi na trabahok so palson relihyon?
-
Wala ni ra kasi aspekto na bilay ko ya konektado ed palson relihyon?
-
No on so ebat ko ed anggan dinan ed saraya, antoy gawaen ko?
Diad saratan ya amin, no mandedesisyon ka, dapat napansiansiam ya malinis so konsiensiam tan nipanengneng mon matoor kad si Jehova.
Antoy gawaen mo no kerewan da kay donasyon parad charity na relihyon?
IBABAGA NA ARUM: “No amtak so ibabaga na saray apostata tungkol ed Saray Tasi nen Jehova, di nidepensak so katuaan.”
-
Duga kasi ’tan? Akin ey?
SUMARYO
Pian mansiansia tayon matoor ed si Jehova, agtayo miuulop ed saramay mangibabangat na katilaan.
Rebyu
-
Akin et agtayo ondedengel ed saray propaganda o ideya na saray apostata?
-
Antoy gawaen tayo no naamtaan tayon akagaway seryoson kasalanan so sakey ya agi?
-
Panon mon naunor so pasakbay ya ompaway ed palson relihyon?
DISKOBRIEN
Amtaen no panoy dugan reaksion no wala ray mangikakayat na palson report odino balita tungkol ed Saray Tasi nen Jehova.
“Kasin Antam No Antoy Tua?” (Say Panag-bantayan, Agosto 2018)
Panon mon amta no say sakey ya organisasyon o aktibidad et onsusuporta ed Makapanyarin Babilonia?
Antoy ginawa na arum ya onkokontra pian pakapuyen so pananisia tayo?
Diad istorya ya say title to, “Ugaw Ak ni et Labay ko Lan Nakabat so Dios,” basaen so tungkol ed pari ya Shinto ya inmekal ed palson relihyon.
“Uumanen na Biblia so Bilay” (Say Panag-bantayan, Hulyo–Setyembre 2011)
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
