Inar-aro min agi:

Seguradon antam ya maslak ya karga na Biblia et nipaakar ed totoo. Dakel ed sikara so matoor ya lalaki tan bibii ya asali da met iray subok ya aarapen tayo. Sikaray walaan na “liknaan a singa sikatayo.” (Santiago 5:17) Arum ed sikara so awalaan na problema tan kapagaan. Wala met iray asakitan lapud ginawa na kapamilya da odino kapananisiaan da. Tan wala ray akonsiensian maong lapud saray kasalanan da.

Aratan so pigaran rason no akin ya wala ray akaarawi ed si Jehova. Balet talaga kasin agda la labay so ompawil ed sikato? Andi, ta dakel ed sikara so singa samay salmista ya angipikasin: “Akaarawi ak a singa abalang a karnero. Anap mo komon so lingkor mo, ta agko nilingwanan iray ganggan mo.” (Salmo 119:176) Kasin onia met so naliliknam?

Agbalot lilingwanan nen Jehova iray lingkor to ya akaarawi ed pulok. Diad tua, aanapen to ni ingen ira—tan say kaslakan ya uusaren to et saray kaagian da. Singa bilang, nengnengen tayo no panon ya tinulongan nen Jehova si Job, ya dakdakel so dinalan ton subok—inmirap ya maong so bilay to, inatey iray ananak to, tan nansakit na grabe. Asakisakitan met ya maong si Job ed saray imbabaga na saray kakaaro to ya ontulong komon ed sikato. Anggano wala ray aliwan naisip to nipaakar ed si Jehova, agton balot tinaynan si Jehova. (Job 1: 22; 2: 10) Panon ya tinulongan nen Jehova si Job?

Unona, imbaki nen Jehova so lingkor to ya si Elihu ya ontulong ed si Job. Nen imbalikas nen Job iray nalilikna to, dinmengel ya maong si Elihu antis ya nansalita. Antoy imbaga tod si Job? Kasin sikatoy binalaw to, odino kinonsiensia to, o pinabaingan to? Kasin inisip to ya sikatoy mas matunong nen si Job? Andi, ta sikatoy nampaigiya ed espiritu na Dios. Kanian oniay imbaga to: “Nampara ta labat diad arapan na tuan Dios; pinorma ak met manlapud pitek.” Insan to pinaseguroan si Job: “Kanian agka nepeg ya ontakot ed siak, tan agka nepeg a nadesdes ed siak.” (Job 33:6, 7) Imbes ya aruman toy belat ya nalilikna nen Job, maaro ton pinaseseg tan sinimbawa.

Labay min ipaamta ya ontan so ginawa mi nen ipaparaan mi iyan brosyur. Unona, dinmengel kami nin maong tan maalwar min inisip so kipapasen tan imbaga na saramay akaarawi. (Proverbio 18:13) Insan mi kinonsultay Biblia. Nampikasi kami pian naamtaan mi no panon ya tinulongan nen Jehova iray lingkor to nensaman ya akaarawi met ed sikato. Kayari to, inusar mi iratan ya salaysay ed Biblia tan saray eksperiensya na saray agagi natan pian napawala iyan brosyur. Komon ta basaen mo iya. Tandaan mo ya inar-aro mi ka.

Mananguley ya Ulop na Saray Tasi nen Jehova