KASIN asalim la may agawad si Linda ya asakisakitay liknaan mo lapud ginawa na sakey ya agi? Makapaermen ta lapud ontan iran nagagawa, akatunda so arum ya manlingkor ed si Jehova. Kasin ontan so agawa ed sika?

Ompan nairapan tayon perdonaen so sakey ya agi ya akasakit ed sikatayo ta amta tayo ya saray Kristiano et nabibilin ya manaaroan. (Juan 13:34, 35) Kanian no walay aliwan ginawa na sakey ya agi ed sikatayo, nayarin nadismaya tayon maong tan nasakisakitan so liknaan tayo.—Salmo 55:12.

Ibabaga met na Biblia ya no maminsan et ‘walay rason na sakey ya manreklamo.’ (Colosas 3:13) Pero no nasali tayo itan ya mismo, ompan nairapan tayon mamerdona. Antoy makatulong ed sikatayo? Niraya so taloran prinsipyo ed Biblia:

Amta na Ama tayod tawen so amin ya nagagawa. Nanenengneng nen Jehova so amin ya nagagawa, pati saray ag-inkahustisya tan kairapan ya dadalanen tayo. (Hebreo 4:13) Naeermenan si Jehova no naiirapan tayo. (Isaias 63:9) Agton balot iyabuloy so “kairapan, odino gonigon,” o anggan anto—anggan sakey ni ingen ed saray lingkor to—ya “makapangisian ed sikatayo ed panangaro na Dios.” (Roma 8:35, 38, 39) Agta mas maabig no aligen tayoy Jehova, ya agtayo aabuloyan so anggan anto odino anggan siopa ya maneral ed relasyon tayo ed sikato?

Say pamerdona et aliwan panagkonsinti. No perdonaen tayo iray akagawa na lingo ed sikatayo, agto labay ya ibaga ya palelemewen, ibabaliwala, papalampasen, odino kokonsintien tayo so aliwan ginawa ra. Tandaan ya si Jehova et agton balot iyaabuloy so kasalanan, balet sikatoy mameperdona no walay basiyan ton gawaen itan. (Salmo 103:12, 13; Habacuc 1:13) No papasesegen itayo nen Jehova ya perdonaen so arum, singa to ibabaga ya sikatoy aligen tayo. ‘Agto pansiasiansiaen ya anggad angga so sakit na linawa to.’—Salmo 103:9; Mateo 6:14.

Say pangekal na sakit na liknaan et pankaabigan tayo. Akin ey? Isip mo pa iya: Manokdok kay sakey ya bato ya manga sakey kilo labat so belat to, insan mo iyunat so taklay mo. Nayarin diad gapo et agka nairapan. Balet panon to no pabayagen mo ni? Pigaran minuto o oras ya sarag mon pansiansiaen ya ontan? Imposible ya agka nakesawan! Siempre agnanaaruman so belat na bato. Balet diad ilalabas na oras, pakaliknam et manbelat lan manbelat itan. Ontan so kapara na panem-em na sakit  na linawa. Anggan diad gapo et singa anlemew labat itan, no pabayagen mo ni, onloor so sakit ya naliliknam. Kanian agtayo pankelawan ya ipapaseseg nen Jehova ya agtayo manem-em na sakit na linawa. Parad pankaabigan tayo itan.—Proverbio 11:17.

Antoy akatulong ed si Linda pian naekal toy sakit na linawa to ed samay agi ya akasakit ed sikato? Sakey ed saratan et say impandalepdep tod saray teksto ed Biblia no akin ya nepeg tayoy mamerdona. (Salmo 130:3, 4) Sikatoy lalon apakiwas ya mamerdona nen naamtaan to ya perdonaen itayo met nen Jehova no perdonaen tayo so arum. (Efeso 4:32–5:2) Lapud saratan ya naaralan to, imbaga to ya: “Aliknak ya si Jehova a mismo so mitotongtong ed siak.”

Asabi panaon, asarag nen Linda ya ekalen so sakit na liknaan to. Kanian pinerdona to may sister tan natan et sankaaro la ra. Intuloy to met so panlilingkor to ed si Jehova. Labalabay kan tulongan nen Jehova pian nagawaan mo met itan.