AMIN ya totoo et walay kapagaan da—anggan saray manlilingkor ed Dios. Insulat na Salmista: “Nadadaeg ak na saray kapagaan.” (Salmo 94:19) Tan imbaga nen Jesus ya wala ray “kapagaan ed bilay” diad panaon na anggaan, kanian dakel so makaamper ed sikatayo diad panlilingkor tayo ed si Jehova. (Lucas 21:34) Sika ey? Kasin no maminsan et singa labay mo met lay onsuko lapud irap na panagbilay, problema ed pamilya, odino sakit? Panon kan natulongan nen Jehova pian makapantultuloy kan manlingkor ed sikato?

Agtayo nasarag ya bukor iray kapagaan tayo. “Nadedetdetan kami ed amin a paraan,” so insulat nen apostol Pablo. “Nawewetwet kami . . . ; itutumba kami.” Balet imbaga to met ya “aliwan diad paraan ya agkami la makagalaw,” “wala nin siansiay napawayan mi,” tan “agkami nadederal.” Anto sirin so ontulong ed sikatayo? ‘Say pakayari a mas mabiskeg nen say pakayari na too.’ Atan imay pakayari ya manlalapud makapanyarin-amin ya Dios tayo, si Jehova.—2 Corinto 4:7-9.

Isip mo pa no panon kan akaawat nensaman na ‘pakayari a mas mabiskeg nen say pakayari na too.’ Kasin nanonotan mo ni no panon kan apaseseg na sakey a paliwawa tan aliknam ya tua tan agmanguman so panangaro nen Jehova ed sika? Kasin mas binmiskeg so pananisiam ed saray sipan nen Jehova legan mon ibabangat ed arum so ilalo tayod Paraiso? No mimiaral tan manpupulong tayo, napapabiskeg itayon anosan iray kapagaan ed bilay, tan ondedeen so nonot tayo pian maliket tayon makapanlingkor ed si Jehova.

No maminsan, ompan isipen tayo ya amayamay so kaukolan tayon gawaen. Singa bilang, labay nen Jehova ya iyuna tayo so Panarian tan itultuloy tayon gawaen iray espiritual ya rotina tayo. (Mateo 6:33; Lucas 13:24) Balet, panon to no nalilimitaay nagawaan mo lapud wala ray onkokontrad pananisiam, walay sakit mo, odino walay problemam ed pamilya? Odino lapud pantratrabahom et naupot lay panaon tan biskeg mo ya para komon ed kongregasyon? Lapud amayamay so kaukolan mon gawaen—tan limitadon maong so oras tan biskeg mo—nayarin naisip mo ya agmo la kaya. Ompan isipen mo ni ingen ya sobsobra la so pagagawa nen Jehova ed sika.

Natatalosan nen Jehova so situasyon mo. Agto iilaloan ya gawaen moy agmo nasarag. Tan amta to ya kaukolan mo nin palabasey panaon antis ya ompawil so pisikal tan emosyonal ya biskeg mo.—Salmo 103:13, 14.

Imanom pa no panon ya inasikaso nen Jehova si propetan Elias. Nen adismaya tan natatakot ya maong si Elias tan batik ed desierto, kasin sikatoy nampasnokan nen Jehova tan ingganggan ton ompawil ya tampol ed asainmin to? Andi. Amiduan angibaki na anghel si Jehova ya mamangon tan mangiter na kanen nen Elias. Pero  40 agew lay linmabas, siansia nin mapaga tan natatakot si Elias. Kanian, anto ni ginawa nen Jehova pian napabiskeg to? Unona, impanengneng nen Jehova ya sarasarag ton protektaan si Elias. Komadua, sikatoy niligliwa to panamegley na “kalmado tan makalnan boses.” Tan kaunoran, impaamta nen Jehova ed sikato ya wala ni nilibon matoor ya manlilingkor ed tuan Dios. Lapud saratan, apapawil nen Elias so pinasyan seseg to bilang propeta. (1 Arari 19:1-19) Antoy naaralan tayod saya? Nen mapagpagan maong si propetan Elias, sikatoy maan-anos tan mapangasin tinulongan nen Jehova. Tandaan mo, agbalot anguman si Jehova. Ontan nin siansia so panangaro to ed sikatayo.

No iisipen mo no antoy niiter mo ed si Jehova, dapat realistiko ka. Agmo ikokompara iray nagagawaan mo natan ed saray nagagawaan mo nensaman. Bilang ilustrasyon: No say sakey ya bumabatik et pigaran bulan o pigaran taon ya agnampraktis, agton tampol nipawil iray datin rotina to. Imbes, sikatoy onggapo ed simpli labat iran goal pian ombiskeg so laman to tan mas mapaot ed ibatik to. Sikatayo ran Kristiano et singa saray bumabatik. Manprapraktis tayo pian naabot tayoy goal tayo. (1 Corinto 9:24-27) Kasin walay naisip mon sakey ya goal ed espiritual ya sarag mon igapo natan? Singa bilang, sarag mon gawaen ya goal so miaral lamet. Ipikasim ed si Jehova ya tulongan to kan nagawaan itan. Legan ya ompapawil so biskeg mod espiritual, ‘natawayan mo tan nanengneng mo a si Jehova et maong.’ (Salmo 34:8) Tandaan mo ya amin a gagawaen mo pian ipanengneng ya inar-arom si Jehova et papablien to—anggan parad sika et melmelag itan.—Lucas 21:1-4.

Panon ya pinabiskeg nen Jehova si June pian mandesisyon ya ompawil ed sikato? Oniay imbaga nen June: “Lanang ak ya manpipikasi ed si Jehova ya tulongan to ak. Insan imbagad siak na manugang ko ya walay asemblea ed baley mi. Nandesisyon ak ya onatendi na sakey agew. Talagan balibali liknaan ko ya nakaiba lamet iray totoo nen Jehova! Aman ya asemblea so panamaseseg ya aalagaren ko. Natan et malikeliket ak lamet ya manlilingkor ed si Jehova, tan amtak ya aya so dugan pangusaran koy bilay ko. Apaneknekan kon mismo ya agko nayarin isian so sarilik tan kaukolan ko ray agagi. Misalsalamat ak ta akapawil ak ni.”