PART 4
Pakakakonsiensia—“Linisan Mo Ak ed Kasalanan Ko”
“Inmasensoy bilay na pamilya mi lapud balon trabahok, pero lapu met ed satan et akagawa ak na saray kontra ed prinsipyo na Biblia. Nanselebra ak la na saray holiday, akibiang ak lad politika, tan onloloob ak met la ed simbaan. Nagmaliw ak ya inaktibon Tasi nen Jehova diad 40 taon. Diad ilalabas na panaon, lalon naliliknak ya agak la naperdona nen Jehova. Singa agko met la naperdona so sarilik. Lalo la ta amtak lay katuaan nen ginawak iratan.”—Martha.
NO NAKOKONSIENSIA ka, talagan ambelat itan ed liknaan. Oniay insulat nen Arin David: “Saray lingok et onsasakbong ed ulok; singa iratan ambelbelat ya awit ya agko sarag a sakbaten.” (Salmo 38:4) Saray arum a Kristiano et agda nalabanan so sobran ermen da, tan parad sikara et agla ra naperdona nen Jehova. (2 Corinto 2:7) Duga kasi itan ya iisipen da? No akagawa ka na saray graben kasalanan, kasin taynan ka la nen Jehova tan agto ka lan balot naperdona? Andi!
“Pantongtongan Tayo ray Kaukolan ya Ipetek ed Baetan Tayo”
Agbalot taynan nen Jehova iray magbabawin nankasalanan. Diad tua, sikatoy manggagaway paraan pian makapawil ira. Diad samay ilustrasyon nipaakar ed managdarak ya anak, inkompara nen Jesus si Jehova ed maaron ama, ya say anak to et linmayas tan pinili toy mabanbanday ya panagbilay. Balet asabi panaon, anempet may anak. “Legan a wala nid arawi [so anak], sikatoy abantag nen ama to tan naabagey to, kanian binatik to tan nilakap to insan to inangoban.” (Lucas 15:11-20) Kasin labay moy onapit lamet ed si Jehova pero say pakaliknam et “arawi” ka ed sikato? Singa samay ama ed ilustrasyon nen Jesus, inar-aro ka nen Jehova tan tatalaranan toy ipawil mo ed sikato.
Balet panon to no pakaliknam ed agka la naperdona nen Jehova lapud grabe tan dakdakel so kasalanan mo? Imanom pa yay mensahe nen Jehova ed sika ya nabasad Isaias 1:18: “‘Dago kayo natan, tan pantongtongan tayo ray kaukolan ya ipetek ed baetan tayo,’ so inkuan nen Jehova. ‘Anggano saray kasalanan yo et ambalbalanga, napaputi iratan a singa niebe.’” Kanian anggan saray kasalanan tayo et singa ambalbalangan mantsa, ya imposiblin naekal ed amputin abel, sarag iratan ya perdonaen nen Jehova.
Aglabay nen Jehova ya tuloytuloy kan nairapan lapud pakakakonsiensiam. Anto sirin so gawaen mo pian perdonaen na Dios so kasalanan mo, nawalaan kay malinis ya konsiensia, tan nainawaan ka? Imanoen so duaran ginawa nen Arin David. Unona, oniay imbaga to: “Ipatuak ed si Jehova iray impakasumlang ko.” (Salmo 32:5) Tandaan ya imbaga la nen Jehova ed sika ya onasingger ka ed sikato diad pikakasi tan “pantongtongan yo ray kaukolan ya ipetek.” Gawam sirin so imbaga tod sika. Ipatuam iray kasalanan mo ed si Jehova tan ipaamtam ed sikato iray naliliknam. Lapud naeksperiensya itan a mismo nen David, oniay impikasi to: “Linisan mo ak ed kasalanan ko. . . . Agmo ipulisay, O Dios so sakey a puson asugatan tan maer-ermen.”—Salmo 51:2, 17.
Komadua, inawat nen David so tulong na Dios panamegley na imbaki ton propeta ya si Natan. (2 Samuel 12:13) Uusaren met natan nen Jehova iray elder ed kongregasyon ya impasal pian tulongan iray magbabawin nankasalanan tan nipawil day pikakaaro da ed si Jehova. No onasingger ka ed saray elder, usaren da so Kasulatan tan ipikasi da ka pian nalemeway pusom, nabawasan odino naekal iray negatibon naliliknam, tan tulongan da kan onabig ed espiritual.—Santiago 5:14-16.
Labay nen Jehova ya malinis so konsiensiam pian nainawaan ka
“Maliket so Too ya Aperdona La ed Insumlang To”
Nayarin mairap parad sika so pangipatua na saray kasalanan mo ed si Jehova a Dios tan onasingger ed saray elder. Ontan met so alikna nen David. Diad unaan, agto nin tampol impatua iray kasalanan to. (Salmo 32:3) Balet sanen impatua to iray kasalanan to tan impetek toy kabibilay to, sikatoy agunggonaan.
Say sakey ya gunggona nen David et alikna to lamet so liket. Insulat to: “Maliket so too ya aperdona la ed insumlang to, tan asakbongan lay kasalanan to.” (Salmo 32:1) Tan onia ni impikasi to: “O Jehova abuloyan mo ak pan mansalita, pian niyabawag koy dayew mo.” (Salmo 51:15) Lapud nainawaan la ed pakakakonsiensia to tan pinerdona la na Dios so kasalanan to, apabiskeg si David ya ibaga ed arum so nipaakar ed si Jehova.
Labay nen Jehova ya nawalaan kay malinis ya konsiensia pian nainawaan ka. Tan labay ton agka nakokonsiensia noagta maliket ka no ibagam ed arum so nipaakar ed sikato tan saray gagala to. (Salmo 65:1-4) Tandaan mo imay imbaga to ya “naperdona iray kasalanan yo, pian onsabi iray makapainawan panaon a manlapud si Jehova a mismo.”—Gawa 3:19.
Ontan so agawa ed si Martha. Oniay imbaga to: “Amay anakon laki et papawitan to ak ya lanang na magasin ya Panag-bantayan tan Onliing! Kalkalna ak ya akapawil ed si Jehova. Say sankairapan ya ginawak nen pinmawil ak et amay kerewen so panamerdona ed amin ya kasalanan ko. Balet akapampikasi ak lanlamang ed Dios tan akikasi ak ya perdonaen to ak. Singa mairap ya panisiaan ya 40 taon ni linmabas antis ak ya akapawil ed si Jehova. Say eksperiensyak et prueba ya anggano abaybayag kan akatunda, sarag mo lamet so manlingkor ed Dios tan naliknay panangaro to.”
Ompan Nagustoan Mo Met
SAY PANAG-BANTAYAN—PANARALAN YA EDISYON
Antoy Kabaliksan na Panamerdona nen Jehova ed Sika?
Say impideneng nen Jehova nensaman ed saray nankasalanan et mangibabangat ed sikatayon sikatoy akaparaan a mamerdona.
Onapit ed si Jehova
Say Dios ya “Akaparaan a Mamerdona”
No natandaan na Dios so amin, panon ton perdonaen iray kasalanan tan nalingwanan iratan?
