Ngalngali 70 ya taon lay linmabas manlapu nen pinmawil ed Jerusalem so dakel ya Israelita, balet say arum et manaayam nid nanduruman lugar ed Empiryo na Persia. Say sakey ed sikara et si Esdras ya saserdote, tan imbangat toy Ganggan nen Jehova. Abalitaan nen Esdras ya ag-uunoren na saray manaayam ed Jerusalem so Ganggan, kanian labay toy onla diman pian tulongan ira. Imbagad sikato nen Artaxerxes ya ari na Persia: ‘Say Dios et inikdan to kay karunongan pian nibangat moy Ganggan to. La ka sirin, tan itagar mo iramay labay toy milad sika.’ Tinipon nen Esdras so amin ya malabay ya ompawil ed Jerusalem. Nampikasi rad si Jehova ya protektaan to ra ed pambiahe da na arawi, insan la ra linma.

Kayari apatiran bulan, akasabi rad Jerusalem. Saray prinsipe ed Jerusalem et imbaga dad si Esdras: ‘Ag-inunor na saray Israelita si Jehova tan angasawa ray bibii ya mandadayew ed saray dios ya aliwan tua.’ Antoy ginawa nen Esdras? Tinmalimukor diad arap na totoo tan impikasi to: ‘Aman Jehova, dakdakel lay ginawam parad sikami, balet nankasalanan kamid sika.’ Nagbabawi iray totoo, balet wala ni ray gagawaen da ya aliwa. Kanian nampili si Esdras na saray mamatatken tan ukom ya mangasikaso ed sayan problema. Diad sinmublay ya taloran bulan, pinataynan da iramay agmandadayew ed si Jehova.

Linmabas so 12 ya taon. Naapiger la ray padir na Jerusalem. Tinipon nen Esdras iray totoo diad plaza tan binasa to so Ganggan na Dios. Nen imbukay nen Esdras so libro, inmalagey iray totoo. Indayew nen Esdras si Jehova, tan inyatagey na totoo so lima ra pian ipanengneng ya idadayew da met si Jehova. Insan binasa tan impaliwawa nen Esdras so Ganggan, tan dinmengel ya maong iray totoo. Inamin da ya agda lamet inunor si Jehova, tan manakis ira. Diad sinmublay ya agew, binasa lamet nen Esdras so Ganggan ed arap na totoo. Naamtaan da ditan ya dapat dan selebraan so Piesta na Saray Alolong. Kanian namparaan iran tampol parad satan ya piesta.

 Legan na pitoran agew ya piesta, maliket iray totoo tan akisalamat irad si Jehova ta dakel so ani ra. Anggapo lay mipara ed satan ya Piesta na Saray Alolong manlapu nen panaon nen Josue. Kayari na piesta, nantitipon iray totoo tan nampikasi ira: ‘Aman Jehova, inligtas mo kami kanian aliwa kami lan aripen, pinakan mo kami diad desierto, tan inter mod sikami iyan balibalin dalin. Balet paulit-ulit ya agmi ka inunor. Angibaki ka na saray propeta pian tulongan kamin manguman, pero agkami dinmengel. Balet maan-anos kad sikami. Ginawam nin siansia imay im-promise mod si Abraham. I-promise mi natan ed sika ya unoren mi ka la.’ Insulat da so promise da, tan tinatakan itan na saray prinsipe, Levita, tan saserdote.