Nanayam si Jose tan Maria diad Nazaret, kaibay Jesus tan arum nin ananak da. Pian nabilay nen Jose so pamilya to, nantrabaho bilang karpentero. Binangatan to ra tungkol ed si Jehova tan saray Ganggan To. Lanang ya oonla ed sinagoga so pamilya da pian mandayew, tan tinaon met iran oonlad Jerusalem parad Paskua.

Nen 12 so taon nen Jesus, nambiahe so pamilya da paonlad Jerusalem, ya singa dati lan gagawaen da. Dakdakel so totoo ya linma diman pian selebraan so Paskua. Kayari na Paskua, nambiahe lan pasempet si Jose tan Maria, tan say amta ra et kaibay Jesus ed grupo da. Balet nen aanapen da lad saray kakanayon da, agda manaya kaiba.

Kanian pinmawil irad Jerusalem, tan taloy agew dan inanap so anak da. Insan ira linmad templo. Wadman si Jesus ya akayurong ed pegley na saray managbangat, ya ondedengel ya maong tan balibali ray tepet tod sikara. Lapud pambiliban na saray managbangat si Jesus, sikato lay tetepetan da. Tan pankelawan da ray ebat to. Amta da ya natatalosan toy Ganggan nen Jehova.

 Naaburidon maong si Jose tan Maria, kanian imbaga nen Maria: ‘Ana’ko, aliber mi lay amin a pasen ed panaanap mid sika! Nakar mo a?’ Imbaga nen Jesus: ‘Agyo sirin naisip ya wadia ak ed abung nen Amak?’

Akila si Jesus ed saray atateng to ya sinmempet ed Nazaret. Imbangat nen Jose si Jesus ya mankarpentero. Anto kasi ugali nen Jesus nen ugaw ni? Legan ya ombabaleg si Jesus, naaruman ni so karunongan to, tan lalo ton apaliket so Dios tan labalabay na totoo.