LEKSION 74
Nagmaliw ya Mesias si Jesus
Ipupulong nen Juan: ‘Walay onsabin mas makapanyari nen say siak.’ Nen manga 30 lay taon nen Jesus, manlapud Galilea et linmad Ilog Jordan. Ditan babautismoan nen Juan iray totoo. Labay nen Jesus ya sikatoy bautismoan met nen Juan, balet imbaga nen Juan: ‘Agak nayarin manbautismo ed sika. Sika dapat so manbautismo ed siak.’ Imbaga nen Jesus ed si Juan: ‘Labay nen Jehova ya bautismoan mo ak.’ Kanian linmasur irad Ilog Jordan, tan inlereg nen Juan so interon laman nen Jesus ed danum.
Kaimwas nen Jesus ed danum, nampikasi. Biglan linmukas so tawen, tan say espiritu na Dios et dinmapo ed sikato ya singa malapati. Insan nansalita si Jehova manlapud tawen: “Sika so Ana’ko, say inad-arok; inabobonan ta ka.”
Nen dinmapo ed si Jesus so espiritu nen Jehova, sikatoy nagmaliw ya Kristo, odino Mesias. Igapo to la so kimey ya ipapagawa nen Jehova ed sikato diad dalin.
Kayari nen Jesus ya abautismoan, linman tampol ed kalawakan tan 40 ya agew to diman. Kayari to ’tan, linma lamet si Jesus ed si Juan. Nen anengneng nen Juan ya nitan lay Jesus, imbaga to: ‘Sikato so Kordero na Dios ya mangekal ed kasalanan na mundo.’ Imbaga iya nen Juan pian naamtaan na totoo ya si Jesus so Mesias. Antam no antoy agawad si Jesus nen walad kalawakan? Nengnengen ta.
“Walay boses a nadngel manlapud tawen: ‘Sika so Ana’ko, say inad-arok; inabobonan ta ka.’”—Marcos 1:11
Ompan Nagustoan Mo Met
JESUS—SAY DALAN, SAY KATUAAN, SAY BILAY
Nampabautismo si Jesus
Akin et binautismoan si Jesus anta anggapoy kasalanan to?
EBAT ED SARAY TEPET ED BIBLIA
Anto so Bautismo?
Diad Biblia, dakel so nabasa tayo tungkol ed bautismo ed danum, say labay ya ibaga na bautismo, tan no akin ya importante itan.
