Kakkabusol na saray Fariseo si Jesus kanian manaanap iray rason pian erelen da. Ibabaga da ya no agew na Sabaton et agto nayarin paabigen iray mansasakit. Balet aminsan ya Sabaton, walay anengneng nen Jesus ya lakin bulag ya mipapayabol diad karsada. Imbaga tod saray disipulo to: ‘Nengneng yo no panon ya onabig iyan laki diad pakapanyari na Dios.’ Linmutda si Jesus ed dalin pian makagaway pitek, insan to itan impurapor ed saray mata na laki. Imbaga nen Jesus ed sikato: ‘La ka, urasan moy matam diad tiponay danum na Siloam.’ Ginawa itan na laki, tan diad interon bilay to et natan labat akanengneng.

Agmakapanisia iray totoo. Intepet da: ‘Aya may laki ya datin akayurong ya mipapayabol, o kaparpara to labat? Imbaga na laki: ‘Siak imay inyanak ya bulag!’ Tinepetan na totoo: ‘Akin et makanengneng ka la ey?’ Nen imbaga tod sikaray agawa, inawit dad saray Fariseo.

Imbaga na laki ed saray Fariseo: ‘Pinuraporan nen Jesus na pitek so matak insan to ak ingganggan ya urasan ko. Nen inunor ko, akanengneng ak la.’ Imbaga na saray Fariseo: ‘No manpapaabig si Jesus diad agew na Sabaton, agnanlapud Dios sirin so pakapanyari to.’ Balet imbaga na arum: ‘No agnanlapud Dios so pakapanyari to, agton balot napaabig so sakit.’

Impatawag na saray Fariseo iray ateng na laki tan tinepetan da ra:  ‘Antoy agawa, akin et makanengneng la natan yay anak yo?’ Natatakot iray ateng to ta wala may imbaga na saray Fariseo ya siopaman ya manisia ed si Jesus et papawayen ed sinagoga. Kanian imbaga na saray ateng to: ‘Agmi amta. Sikato lay tepetan yo.’ Aminpigapiga nin tinepetan na saray Fariseo imay laki ya anggad imbaga to: ‘Imbagak lan amin ed sikayo. Akin et tepet ki lan tepet?’ Mamapasnok iray Fariseo, kanian sikatoy pinapaway dad sinagoga.

Inanap nen Jesus imay laki, tan tinepetan to: ‘Manisia ka ed Mesias?’ Imbaga na laki: ‘Manisia ak no nakabat ko.’ Imbaga nen Jesus: ‘Siak so Mesias.’ Mabait si Jesus, awa? Agto labat pinaabig imay laki, tinulongan to met ya nawalaan na pananisia.