Antis ya onggapoy Paskua nen taon 32 C.E., pinmawil iray apostol kayari dan nampulong. Naknaksawan ira, kanian imbaga nen Jesus ya onlugan irad baloto paonlad Betsaida pian manpainawa ra diman. Balet nen asingger la rad gilig na dayat, anengneng nen Jesus ya tinmumbok ed sikara so libolibon totoo. Anggano labay komon nen Jesus so manpainawa kaiba iray apostol to, inarap to nin siansia iray totoo. Pinaabig to ray kaiba dan mansasakit tan binangatan to ra. Sanagew to ran binangatan tungkol ed Panarian na Dios. Nen onlalabi la, inmasingger iray apostol tan imbaga dad si Jesus: ‘Ompan narasan la ray totoo. Paalis mo la ra pian makasaliw iray naakan da.’

Imbaga nen Jesus: ‘Agda la kaukolan so onalis. Pakan yo la ra dia.’ Tinepet na saray apostol: ‘Anto ey, isaliwan mi ray tinapay?’ Balet imbaga nen apostol Felipe: ‘Anggano dakel ni kuarta tayo, kulang so nasaliw tayon tinapay parad onian karakel ya totoo.’

Tinepet nen Jesus: ‘Dakel so awit tayon naakan?’ Inmebat si Andres: ‘Limara labat ya tinapay tan duaran melag ya sira so awit tayo. Kulang yan maong.’ Imbaga nen Jesus: ‘Awit yo dia tay tinapay tan sira.’ Pinayurong tod dika iray totoo ya agrupo-grupo. Wala ray grupo na 50 tan wala ra met so grupo na 100. Inala nen Jesus iray tinapay tan sira, tinmangay ed tawen, tan nampikasi. Insan to inter iratan ed saray apostol, tan imbunog dad totoo. Amin ya 5,000 ya lalaki, pati iray bibii tan ugugaw, et angan tan naksel ira. Tinipon na saray apostol so kera pian anggapoy nasayang, tan  napnapno ni so 12 ya baskit! Makapakelaw man ya milagro, awa?

Pambiliban na totoo si Jesus kanian labay dan gawaen ya ari. Balet amta nen Jesus ya agni asabi so panaon ya sikatoy gawaen nen Jehova ya ari. Kanian pinasempet la nen Jesus iray totoo tan imbaga tod saray apostol to ya onla la rad basil na Dayat na Galilea. Linmugan irad baloto da, balet si Jesus et linman bukor ed palandey. Akin ey? Ta labay to ya walay panaon ton manpikasi ed Ama to. Anggano busy ya maong si Jesus, walan walay panaon ton manpikasi.