Say sampot ya nila nen apostol Pablo diad samay komatlon impanbiahe to et diad Jerusalem. Diman et sikatoy inerel tan impriso. Sakey a labi, diad pasingawey et imbagad sikato nen Jesus: ‘Onla kad Roma tan manpulong ka diman.’ Manlapud Jerusalem et inawit si Pablo ed Cesarea tan duay taon ya akapriso diman. Nen inyarap day Pablo ed si Gobernador Festo, imbaga to: ‘Labay ko ya say mangukom ed siak et say Cesar, diad Roma.’ Imbaga nen Festo: “Lapud inmapela kad Cesar, onla ka sirin ed Cesar.” Inlugan day Pablo ed barko paonlad Roma, tan sikatoy inibaan na duaran agagi, si Lucas tan si Aristarco.

Legan iran walad dayat, walay sinmabin maksil ya bagyo, tan nantultuloy itan ed pigaran agew. Inisip na amin ya akalugan ed barko ya ompatey la ra. Balet imbaga nen Pablo ed sikara: ‘Diad kugip ko et imbagad siak na anghel: “Agka natatakot, Pablo. Makasabi ka ed Roma, tan amin ya akalugan ed barko et makaligtas.” Agkayo sirin mapaga. Agtayo ompatey.’

Agtinmunda so bagyo ed loob na 14 ya agew. Insan akanengneng iran siansia na isla, say isla na Malta. Sinmagar ed kabatoan so barko tan agaygay, pero amin ya 276 ya lugan to et akaligtas. Saray arum et linmangoy tan wala ra met so pinmeket ed saray agaygay ya tabla tan nampaletaw ira anggad akasakbit ira. Inasikaso ira na saray tagad Malta tan inggawaan da ray apoy ya pandangdangan da.

Kayari taloy bulan, inlugan na saray sundalo si Pablo ed sananey a barko paonlad Roma. Kasabi tod man, inabet na saray agagi. Nen anengneng ira nen Pablo, akisalamat ed si Jehova tan apabiskeg. Anggano priso si Pablo, sikatoy pinayagan ya manayam ed nirentaan ya abung balet ta walay guardia ton sundalo. Duay taon ya nanayam diman. Wala ray ombibisitad sikato tan impulong tod sikara so Panarian na Dios tan imbangat to ra tungkol ed si Jesus. Sinulatan met nen Pablo iray kongregasyon diad Asia Minor tan Judea. Talagan inusar nen Jehova si Pablo pian ipulong so maong a balita diad dakel a bansa.